ក្នុងរយៈពេលពីរឆ្នាំចុងក្រោយនេះ កោះតៃវ៉ាន់ ដែលចិនអះអាងថាជាទឹកដីរបស់ខ្លួននោះ បានថ្កោលទោសម្តងហើយម្តងទៀតទៅលើកងទ័ពអាកាសរបស់ប្រទេសចិន ដែលតែងហោះចូលក្នុងដែនអាកាសរបស់ខ្លួនជារឿយៗ នៅភាគនិរតីនៃដែនអាកាសដែលតៃវ៉ាន់ការពារ (ADIZ) និងនៅជិតកោះ ប្រាតាស (Pratas) ដែលគ្រប់គ្រងដោយកោះតៃវ៉ាន់ផងដែរ។
មួយវិញទៀត តៃវ៉ាន់ហៅសកម្មភាពយោធារបស់ចិននេះថា ជាការរៀបចំឡើង ដើម្បីបំបាក់កម្លាំងរបស់តៃវ៉ាន់ដោយធ្វើឲ្យយោធាតៃវ៉ាន់ញញើតនឹងឧត្តមភាពនៃយោធាចិន ហើយក៏ដើម្បីសាកល្បងការឆ្លើយតបរបស់តៃវ៉ាន់ផងដែរ។
ជាការឆ្លើយតប អាជ្ញធរកោះតៃវ៉ាន់បាននិយាយថា ខ្លួនបានបញ្ជូនយន្តហោះចម្បាំងទៅហោះព្រមានយន្តហោះចិនទាំងទាំង៣០គ្រឿងដែលបានហោះចូលមកដែនអាកាសរបស់ខ្លួន ឲ្យចាកចេញពីដែនអាកាសនោះផងដែរ និងក៏បានពង្រាយប្រព័ន្ធមីស៊ីល ដើម្បីត្រួតពិនិត្យយន្ដហោះទាំងនោះថែមទៀតផង។
អត្ថបទគួរអាន
គួរជម្រាបថា បើតាមការអះអាងរបស់ទីក្រុងតៃប៉ិ មានយន្តហោះរបស់ចិនចំនួន ៣៩ គ្រឿង ដែលបានហោះលើដែនអាកាសរបស់ខ្លួនកាលពីថ្ងៃទី ២៣ ខែមករាកន្លងទៅ។ ទោះជាយ៉ាងនេះក្តី ប្រទេសចិនមិនទាន់មានការឆ្លើយតបនឹងការលើកឡើងរបស់តៃវ៉ាន់ថ្មីនេះទេ ប៉ុន្តែកន្លងមកចិនបាននិយាយថា ទង្វើរបស់ខ្លួនគឺ ជាការធ្វើសមយុទ្ធដែលមានគោលបំណងក្នុងការការពារអធិបតេយ្យភាពរបស់ប្រទេសចិនតែប៉ុណ្ណោះ។
យ៉ាងណាមិញ យោធារបស់ប្រទេសចិនបាននិយាយកាលពីសប្តាហ៍មុនថា ខ្លួននឹងរៀបបានធ្វើសមយុទ្ធជុំវិញកោះតៃវ៉ាន់ ដែលវាជា "ការព្រមានដ៏បើកចំហ" មួយរបស់ទីក្រុងប៉េកាំង ដើម្បីប្រឆាំងនឹងការឃុបឃិតគ្នា របស់តៃវ៉ាន់ជាមួយសហរដ្ឋអាមេរិក។
ការណ៍នេះកើតឡើងបន្ទាប់ពីប្រធានាធិបតីអាមេរិកលោក Joe Biden បានធ្វើដំណើរទស្សនៈកិច្ចនៅតំបន់អាស៊ីកាលពីសប្តាហ៍មុន ហើយលោកបានបង្ហាញសញ្ញានៃការផ្លាស់ប្តូរគោលនយោបាយការបរទសអាមេរិកជុំរិញយុទ្ធសាស្ត្រលើកោះតៃវ៉ាន់ដោយនិយាយថា សហរដ្ឋអាមេរិកនឹងជួយជាផ្នែកយោធាប្រសិនបើប្រទេសចិនហ៊ានវាយប្រហារកោះតៃវ៉ាន់មែននោះ។
ទន្នឹមនឹងនេះដែរ មេដឹកនាំតៃវ៉ាន់លោកស្រី សៃ អ៊ីងវេន (Tsai Ing-wen) បាននិយាយកាលពីថ្ងៃទី៣១ឧសភាថា សហរដ្ឋអាមេរិកកំពុងរៀបចំផែនការលើ "កិច្ចសហប្រតិបត្តិការមួយ" រវាងកងទ័ពអាមេរិក និងយោធាតៃវ៉ាន់ ដើម្បីធ្វើឱ្យទំនាក់ទំនងសន្តិសុខកាន់តែស៊ីជម្រៅ ចំពោះអ្វីដែលរដ្ឋាភិបាលក្រុងតៃប៉ិត្អូញត្អែរថា ជាការគំរាមកំហែងកាន់តែខ្លាំងឡើងពីប្រទេសចិន។
គួរបន្ថែមថា នៅក្នុងជំនួបរវាងលោកស្រី និងសមាជិកព្រឹទ្ធសភាអាមេរិក ថាមមី ដាកខ៍វ៉ថ (Tammy Duckworth) នៅទីក្រុងតៃប៉ិកថ្មីៗនេះ លោកស្រី សៃ អ៊ីងវេន បាននិយាយថា វាជាសេណារីយ៉ូដ៏ល្អមួយដែលក្រសួងការពារជាតិសហរដ្ឋអាមេរិកកំពុងរៀបចំផែនការលើកិច្ចសហប្រតិបត្តិការរវាងកងយោធាអាមេរិក និងកងកម្លាំងការពារជាតិរបស់តៃវ៉ាន់"។
ទោបីជាបែបនេះក្តី លោកស្រី សៃ អ៊ីងវេន មិនបានប្រាប់លម្អិតអំពីរឿងនេះទេ ដោយគ្រាន់តែសង្កត់ធ្ងន់ថា នៅពេលអនាគតដ៏ខ្លីខាងមុខ លោកស្រីសង្ឃឹមថាតៃវ៉ាន់ និងសហរដ្ឋអាមេរិកនឹងនៅធ្វើការរួមគ្នាក្នុងនាមជាដៃគូយុទ្ធសាស្ត្រក្នុងតំបន់ ក៏ដូចជាភាពជាដៃគូផ្នែកសេដ្ឋកិច្ចឲ្យកាន់តែស៊ីជម្រៅថែមទៀត»។
អត្ថបទ៖ ហ៊ុន គន្ធថៃ
None
