តាមរយៈលទ្ធផលដែលអគ្គនាយកដ្ឋានពន្ធដារសម្រេចបាន នេះ សបញ្ជាក់ឱ្យឃើញថា បញ្ហាភាពមិនច្បាស់លាស់នៃសេដ្ឋកិច្ចសកលរួមទាំងកម្ពុជា នាពេលបច្ចុប្បន្ននេះ មិនបានជះឥទ្ធិពលធ្ងន់ធ្ងរដល់ដំណើរការប្រមូលចំណូលពន្ធអាកររបស់អគ្គនាយកដ្ឋានពន្ធដារកម្ពុជានោះទេ។
នាកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែវិច្ឆិកា និងរយៈពេល១១ខែ ឆ្នាំ២០២៣ របស់អគ្គនាយកដ្ឋានពន្ធដារ នាថ្ងៃទី១៩ ខែធ្នូ ឆ្នាំ២០២៣ ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋ មន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ បានគូសបញ្ជាក់ថា ចំណូលពន្ធ-អាករ ដែលអគ្គនាយកដ្ឋានពន្ធដារ ប្រមូលបានជាក់ស្ដែងតាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានពន្ធដារ នៅ១១ខែឆ្នាំ២០២៣នេះ សម្រេចបានជាង៣ពាន់៣រយលានដុល្លារអាម៉េរិក ស្មើនឹងជិត៩៤% នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣។ ក្នុងនោះចំណូលពន្ធពីប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក (E-Commerce )នៅ១១ខែឆ្នាំនេះ សម្រេចបានប្រមាណជាង៦៨លានដុល្លារ។
អត្ថបទគួរអាន
បើតាម ឯកឧត្តម គង់ វិបុល ការបន្តខិតខំពង្រឹងអនុលោមភាពសារពើពន្ធ និងការពង្រឹងអភិបាលកិច្ច-រដ្ឋបាលកិច្ចល្អ គឺជារបៀបវារៈ និងជាមូលដ្ឋានគ្រឹះ ដ៏សំខាន់សម្រាប់ពង្រឹងការគ្រប់គ្រងប្រមូលចំណូលពន្ធ ដើម្បីជាប្រយោជន៍ដល់ការគាំទ្រថវិកាជាតិ។ ជាមួយគ្នានោះ ឯកឧត្តម ក៏បានណែនាំដល់ថ្នាក់ដឹកនាំ និងមន្ត្រីគ្រប់លំដាប់ថ្នាក់ឱ្យពង្រឹងការអនុវត្តប្រកបដោយការយកចិត្តទុកដាក់នូវវិធានការលើកទឹកចិត្ត និងសម្រួលផ្នែកពន្ធដារជូនដល់វិស័យឯកជន ជាពិសេសវិធានការ និងដំណោះស្រាយថ្មីៗពាក់ព័ន្ធនឹងពន្ធដារ ដែលប្រមុខរាជរដ្ឋាភិបាលកម្ពុជា បានប្រកាសដាក់ចេញកាលពីជំនួបក្នុងវេទិការាជរដ្ឋាភិបាល-ផ្នែកឯកជនលើកទី១៩ នាពេលកន្លងទៅ និងបន្តពង្រឹងការអនុវត្តប្រកបដោយការយកចិត្តទុកដាក់លើការពង្រឹងគុណភាពការផ្តល់សេវា និងប្រសិទ្ធភាពការងាររបស់អគ្គនាយកដ្ឋានពន្ធដារ។
សូមជម្រាបថា បើតាមការអះអាងរបស់ឯកឧត្តម គង់ វិបុល នាពេលកន្លងមក អគ្គនាយកដ្ឋានពន្ធដារ មានបេសកកម្មក្នុងការប្រមូលចំណូលពន្ធប្រមាណជាង៣ពាន់៥រយលានដុល្លារ នៅក្នុងឆ្នាំ២០២៣ នេះ ដែលមានការកើនឡើងជាង២៦% បើធៀបនឹងឆ្នាំ២០២២ ខណៈនៅឆ្នាំ២០២៤ អគ្គនាយកដ្ឋានពន្ធដារដាក់ផែនការប្រមូលចំណូលពន្ធឱ្យបានជាង៤ពាន់លានដុល្លារ៕
None
