ក្រុមហ៊ុន«គ្រាក់ៗ»ទាំង១០ដែលក្ដោបក្ដាប់សេដ្ឋកិច្ចកម្ពុជា (ភាគ២)

ចង់ដឹងថា តើកំពូលក្រុមហ៊ុនទាំង៥នៅភាគទី២នេះ បាននិងកំពុងកាន់កាប់នូវជំនួញអ្វីខ្លះនៅកម្ពុជា? តោះ! អញ្ជើញអានទាំងអស់គ្នា៖

៦. ក្រុមហ៊ុន សូគីមិច អ៊ីនវេសមិន គ្រុប (Sokimex Investment Group)

លោកឧកញ៉ា សុខ គង់ ប្រធានក្រុមប្រឹក្សាភិបាលក្រុមហ៊ុន សូគីមិច អ៊ិនវេសមិន គ្រុប។

លោកអ្នកភាគច្រើនប្រហែលជាធ្លាប់បានស្គាល់យ៉ាងច្បាស់ពីឈ្មោះស្ថានីយប្រេងឥន្ធនៈ សូគីមិច ដែលមានសាខានៅទូទាំងប្រទេស ប៉ុន្ដែ មានមនុស្សមិនច្រើននោះទេ ដែលបានជ្រាបច្បាស់ពីក្រុមហ៊ុន ក៏ដូចជាអាជីវកម្មផ្សេងៗជាច្រើនទៀត ដែលស្ថិតនៅក្រោមក្រុមហ៊ុនសូគីមិច អ៊ីនវេសមិន គ្រុប មួយនេះ។

បើតាមគេហទំព័រផ្លូវការរបស់ក្រុមហ៊ុនមួយនេះ បានឲ្យដឹងថា ក្រុមហ៊ុននេះបានចាប់ផ្ដើមឡើងដំបូងពីក្រុមហ៊ុនផលិតនិងនាំចេញកៅស៊ូនៅកម្ពុជានៅឆ្នាំ១៩៩០ ហើយក៏បាននិងកំពុងបន្តអភិវឌ្ឍខ្លួនជាបន្តបន្ទាប់នៅលើវិស័យសំខាន់ៗជាច្រើនរបស់សេដ្ឋកិច្ចកម្ពុជា។

សណ្ឋាគារ សុខា ភ្នំពេញ នៅត្រើយម្ខាងទល់មុខព្រះបរមរាជវាំង រាជធានីភ្នំពេញ។

ស្ថិតនៅក្រោមការគ្រប់គ្រងរបស់លោកឧកញ៉ា សុខ គង់ ក្រុមហ៊ុនវិនិយោគក្នុងស្រុកដ៏ធំមួយនេះកំពុងមានប្រតិបត្តិការលើអាជីវកម្ម ក៏ដូចជាការវិនិយោគធំៗជាច្រើននៅកម្ពុជា តួយ៉ាង សណ្ឋាគារសុខា ភ្នំពេញ សុខា អង្គរ រីសត រមណីយដ្ឋានឆ្នេរសមុទ្រ សុខា នៅខេត្តព្រះសីហនុ រមណីយដ្ឋានឋានសួគ៌បូកគោ កាស៊ីណូ នៅខេត្តព្រះសីហនុ ការវិនិយោគលើគម្រោងអចលនទ្រព្យមួយចំនួន រោងចក្រកាត់ដេរ និងមានស្ថានីយប្រេងឥន្ធនៈ សូគីមិច ជាច្រើនសាខានៅទូទាំងប្រទេស ខណៈដែលក្រុមហ៊ុននេះក៏មានស្ថានីយធំសម្រាប់ផ្ទុកនិងចែកចាយប្រេងឥន្ធនៈដ៏ធំជាងគេនៅកម្ពុជាផងដែរ។

៧. ក្រុមហ៊ុន ម៉ុង ឫទ្ធី គ្រុប (Mong Reththy Group)

ឈ្មោះលោកឧកញ៉ា ម៉ុង ឫទ្ធី បច្ចុប្បន្ន ត្រូវបានគេស្គាល់ថា ជាសេដ្ឋីចិត្តធម៌មួយរូប ដោយសារតែលោកជារឿយៗ តែងតែបង្ហាញនូវសមានចិត្តជាមួយអ្នកទីទាល់ក្រ ពិសេស តាមរយៈបណ្ដាញសង្គម។

ទន្ទឹមនឹងនេះ លោកក៏ត្រូវបានមហាជនស្គាល់ថា ជាសហគ្រិនកសិកម្មដ៏លេចធ្លោរបស់កម្ពុជាមួយរូបផងដែរ ដោយសារតែក្រុមហ៊ុនរបស់លោក បាននិងកំពុងពង្រីកវិនិយោគលើវិស័យនេះគួរឲ្យកត់សម្គាល់។

ជំនួញកសិកម្មដែលធ្វើឲ្យមនុស្សជាច្រើនស្គាល់ច្បាស់ពីក្រុមហ៊ុន ម៉ុង ឫទ្ធី គឺការដាំដុះដូងប្រេង ប៉ុន្ដែ បើនិយាយពីជំនួញដំបូងរបស់ក្រុមហ៊ុននេះ មិនមែនជាការដាំដុះដូងប្រេងនោះឡើយ តែវាជាក្រុមហ៊ុនសំណង់មួយដែលបានបង្កើតឡើងនៅឆ្នាំ១៩៨៩ ដោយទទួលសាងសង់លើហេដ្ឋារចនាសម្ព័ន្ធរបស់កម្ពុជា ដូចជា ផ្លូវ ថ្នល់ ស្ពាន សាលារៀន មន្ទីរពេទ្យ និងអគាររដ្ឋាភិបាលជាដើម។ នេះបើយោងតាមការកត់ត្រាពីគេហទំព័រផ្លូវការរបស់ក្រុមហ៊ុនមួយនេះ។

បន្ទាប់ពីក្រុមហ៊ុនសំណង់ក្មេងវត្ត និងចម្ការដូងប្រេងជាង ១៦០០ហិកតា ក្រុមហ៊ុន ម៉ុង ឫទ្ធី គ្រុប ក៏មានប្រតិបត្តិការលើជំនួញធំៗជាច្រើនទៀត ដូចជា កំពង់ផែសមុទ្រ ឧកញ៉ា ម៉ុង នៅខេត្តព្រះសីហនុ វិនិយោគលើចម្ការកៅស៊ូរាប់លានដើម ដាំដុះនិងនាំចេញផ្លែស្វាយ ផលិតនិងនាំចេញអង្ករ កសិដ្ឋានចិញ្ចឹមជ្រូក ក្រុមហ៊ុននាំចូលចែកចាយផលិតផលគ្រឿងចក្រសម្រាប់វិស័យកសិកម្ម និងវិស្វកម្ម។

ហើយថ្មីៗនេះ ក្រុមហ៊ុននេះក៏បានវិនិយោគលើការសាងសង់រោងចក្រផលិតចំណីសត្វដ៏ធំ ដោយចំណាយដើមទុនរាប់លានដុល្លារផងដែរ។

៨. ក្រុមហ៊ុន វើលប្រ៊ីដ គ្រុប (WorldBridge Group)

ក្រុមហ៊ុន វើលប្រ៊ីដ គ្រុប ត្រូវបានគេស្គាល់ច្បាស់បំផុត តាមរយៈការវិនិយោគសាងសង់គម្រោងអគារខុនដូខ្ពស់ៗនៅកម្ពុជា ដូចជា អគារខុនដូ The Bridge និង The Peak ជាដើម។ ប៉ុន្ដែ បើយើងនិយាយពីក្រុមហ៊ុនបុត្រសម្ព័ន្ធដែលមាននៅក្រោម វើលប្រ៊ីដ គ្រុប មានជាង ៣០ក្រុមហ៊ុនឯណោះ។

ក្រោមការដឹកនាំប្រកបដោយចក្ខុវិស័យរបស់ឧកញ៉ា សៀ ឫទ្ធី ដែលផ្ដើមឡើងពីក្រុមហ៊ុនដឹកជញ្ជូនតូចមួយ រហូតមកទល់ពេលនេះ ក្រុមហ៊ុនក្នុងស្រុកមួយនេះ ហាក់កំពុងឡើងកូដក្រឺតៗ ដោយបានពង្រីកខ្លួនជាបន្តបន្ទាប់ និងមានការវិនិយោគលើវិស័យផ្សេងៗជាច្រើន តួយ៉ាង ក្នុងវិស័យអចលនទ្រព្យ ក្រុមហ៊ុនបាននិងកំពុងវិនិយោគលើគម្រោងលំនៅឋាន និងខុនដូ The Bridge, The Peak, The Palm និងគម្រោងលំនៅឋានសម្រាប់អ្នកចំណូលទាបជាដើម។ លើសពីនេះ លោកឧកញ៉ា សៀ ឫទ្ធី ក៏បានវិនិយោគនិងសហការបង្កើតក្រុមហ៊ុនដឹកជញ្ជូនជាច្រើនក្រុមហ៊ុនផងដែរ។

លោកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន WorldBridge Group។ រូបថត៖ ហេង ភារម្យ

ងាកទៅផ្នែកសេវាហិរញ្ញវត្ថុវិញ ក្រុមហ៊ុនរបស់លោកឧកញ៉ា សៀ ឫទ្ធី ក៏មានបង្កើតធនាគារឯកទេស Oxley Worldbridge និងហាងបញ្ចាំ Cash U Up ជាដើម។ មិនទាន់អស់នោះទេ ក្រុមហ៊ុននេះ ក៏មានវិនិយោគលើវិស័យជាច្រើនទៀត ដូចជា ភោជនីយដ្ឋាននិងផ្នែកបច្ចេកវិទ្យា ផងដែរ។

រូបភាពអគារ The Peak ដែលផ្សព្វផ្សាយនៅលើគេហទំព័រក្រុមហ៊ុន។

ដោយឡែក ថ្មីៗនេះ ក្រុមហ៊ុន World Bridge Group ក៏ទើបតែសម្ពោធតំបន់សេដ្ឋកិច្ចពិសេសថ្មីរបស់ខ្លួននៅភាគខាងត្បូងរាជធានីភ្នំពេញ និងទើបតែសហការជាមួយដៃគូក្រៅស្រុកបង្កើតរោងចក្រដំឡើង និងផលិតរថយន្ដធុនធំម៉ាក កាំម៉ាស់ ហើយក៏ទើបតែបានចុះអនុស្សារណៈយោគយល់គ្នាជាមួយក្រុមហ៊ុន Sino Great Wall International ដ៏ធំរបស់ចិន ដើម្បីវិនិយោគលើការសាងសង់គម្រោងហេដ្ឋារចនាសម្ព័ន្ធសាធារណៈរបស់រាជរដ្ឋាភិបាលផងដែរ។

លើសពីនេះទៅទៀត ក្រុមហ៊ុន វើលប្រ៊ីដ គ្រុប ក៏មានប្រតិបត្តិការនៅក្រៅប្រទេសផងដែរ ដូចជា នៅប្រទេសឡាវ និងភូមា។

៩. ក្រុមហ៊ុន លី ហួរ គ្រុប (Ly Hour Group)

លោកឧកញ៉ា លី ហួរ ប្រធានក្រុមប្រឹក្សាភិបាលក្រុមហ៊ុន លីហួរ គ្រុប

ផ្ដើមចេញពីដើមទុនមាស២ជី ពាណិជ្ជករដ៏លេចធ្លោ លោកឧកញ៉ា លី ហួរ បាននិងកំពុងពង្រីកអាណាចក្រអាជីវកម្មរបស់ខ្លួនកាន់តែធំឡើងៗ។ បន្ទាប់ពីការហែលឆ្លងក្នុងវិថីជំនួញជិត៣ទសវត្សរ៍កន្លងមកនេះ ក្រុមហ៊ុន លី ហួរ គ្រុប ក៏មានចំណែកទីផ្សារធំគួរសមដែរ នៅក្នុងចរន្ដសេដ្ឋកិច្ចកម្ពុជា ពោលបើគិតមកទល់ពេលនេះ ក្រុមហ៊ុន លី ហួរ គ្រុប មានក្រុមហ៊ុនបុត្រសម្ព័ន្ធប្រមាណ១០ក្រុមហ៊ុនធំៗ។

ក្នុងនោះ ជំនួញមួយក្នុងចំណោមជំនួញជាច្រើនផ្សេងទៀត ដែលមហាជនស្គាល់ច្បាស់ជាងគេនោះ គឺ លីហួរ ប្តូរប្រាក់ និង លីហួរ វេរលុយ។

បុរីវិមានភ្នំពេញដែលជាគម្រោងលំនៅឋានវិនិយោគដោយលោកឧកញ៉ា លី ហួរ អ្នករកស៊ីលក់មាសនិងប្ដូរប្រាក់ដ៏ល្បីនៅកម្ពុជា។

ក្រៅពីក្រុមហ៊ុនទាំងពីរនេះ បច្ចុប្បន្ន ក្រុមហ៊ុន លី ហួរ គ្រុប ក៏មានក្រុមហ៊ុនបុត្រសម្ព័ន្ធជាច្រើនផ្សេងទៀត ដូចជា ក្រុមហ៊ុន លីហួរ ហាងបញ្ចាំ ក្រុមហ៊ុនលក់គ្រឿងអលង្ការ ក្រុមហ៊ុនអភិវឌ្ឍលំនៅឋាន បុរី វិមាន ភ្នំពេញ គ្រឹះស្ថានមីក្រូហិរញ្ញវត្ថុ លីហួរ ក្រុមហ៊ុន ទេពី (Tepi) វិនិយោគ កសិ-ឧស្សាហកម្មដំណាំកៅស៊ូ និងក្រុមហ៊ុន លីហួរ លីស៊ីង (ជួលរថយន្ត) ជាដើម។

នៅមិនទាន់ចប់នោះទេ បើតាមប្រសាសន៍របស់ឧកញ៉ា លី ហួរ ធ្លាប់បានប្រាប់ ខេមបូណូមីស ថា ឆាប់ៗខាងមុខនេះ ក្រុមហ៊ុន លីហួរ ក៏មានគម្រោងវិនិយោគលើជំនួញថ្មីៗជាច្រើនផ្សេងទៀតផងដែរ។

១០. ក្រុមហ៊ុន វឌ្ឍនៈ អ៊ីនវេសមិន (Vattanac Investment)

អគារ វឌ្ឍនៈ ថៅវើ នៅកណ្ដាលរាជធានីភ្នំពេញ។

លោកអ្នកភាគច្រើន ពិសេស អ្នករស់នៅភ្នំពេញ ប្រហែលជាបានស្គាល់ច្បាស់ពីអគារពាណិជ្ជកម្ម វឌ្ឍនៈ ថៅវើ កម្ពស់៣៩ជាន់ ដែលជាអគារដ៏ខ្ពស់ជាងគេបំផុតនៅកម្ពុជា ដែលបានសាងសង់រួចរាល់ និងកំពុងដំណើរការជួលនាពេលបច្ចុប្បន្ននេះ។

ក្រៅពីការវិនិយោគសាងសង់អគារខ្ពស់ ដែលមានរូបរាងស្រដៀងនឹងសត្វនាគមួយនេះ ក្រុមហ៊ុននេះក៏មានការវិនិយោគលើវិស័យសំខាន់ៗជាច្រើនផ្សេងទៀតផងដែរ ដូចជា ធនាគារវឌ្ឍនៈ សួនឧស្សាហកម្ម វឌ្ឍនៈ ពីរកន្លែងដែលមានរោងចក្រជាច្រើន និងផ្ដល់ការងារដល់ប្រជាជនជាច្រើនម៉ឺននាក់ផងដែរ។

លោកឧកញ៉ា សំ អាង ប្រធានក្រុមប្រឹក្សាភិបាលក្រុមហ៊ុន វឌ្ឍនៈ អ៊ិនវេសមិន។

មិនតែប៉ុណ្ណោះ ក្រុមហ៊ុននេះក៏បាននាំចូលនូវម៉ាកម៉ូដអន្តរជាតិល្បីៗជាច្រើន ដូចជា សម្លៀកបំពាក់ ស្បែកជើង កាបូប និងគ្រឿងសម្អាងជាដើម។ល។ ពាណិជ្ជករដែលជាម្ចាស់ក្រុមហ៊ុនដ៏ធំមួយនេះ ត្រូវបានគេស្គាល់ថា គឺលោកឧកញ៉ា សំ អាង។

វត្តមានរបស់អគារវឌ្ឍនៈ ត្រូវបានគេមើលឃើញថា គឺជាការបង្ហាញឲ្យឃើញពីសក្ដានុពលនៃទីផ្សារអចលនទ្រព្យរបស់កម្ពុជា ខណៈដែលវត្តមានរបស់គម្រោងអគារធំៗជាច្រើនផ្សេងទៀត បាននិងកំពុងចាប់ផ្ដើមរីកដុះឡើងជាបន្តបន្ទាប់រហូតមកទល់បច្ចុប្បន្ន។

សូមបញ្ជាក់ជាថ្មីម្ដងទៀតថា រាល់ក្រុមហ៊ុនទាំង១០ ដែល ខេមបូណូមីស បានលើកយកមកបកស្រាយខាងលើនេះ មិនមែនជាការចាត់ជាចំណាត់ថ្នាក់នោះឡើយ ប៉ុន្តែ វាគ្រាន់តែជាការកត់សម្គាល់ជាក់ស្ដែងរបស់ ខេមបូណូមីស ប៉ុណ្ណោះ។

យ៉ាងណាក៏ដោយ យើងខ្ញុំក៏សូមអរគុណសម្រាប់ការតាមដានរបស់លោកអ្នក! និងសង្ឃឹមថា លោកអ្នកនឹងបន្តតាមដានអានអត្ថបទសំខាន់ៗរបស់ ខេមបូណូមីស ជាច្រើនផ្សេងទៀត។ សូមអញ្ជើញរីករាយ អាន និង ចែករំលែក តាមការគួរ!!!

None