ថៃ ដាក់ចេញគម្រោងទុរេនឌីជីថល ដើម្បីបង្កើនការផលិត ក្រោយទីផ្សារទុរេនរងសម្ពាធការប្រកួតប្រជែងកាន់តែខ្លាំង

រដ្ឋាភិបាលថៃ រំពឹងថា តាមរយៈគម្រោងទុរេនឌីជីថល ដែលខ្លួនទើបដាក់ចេញ វានឹងជួយកសាងទំនុកចិត្តរបស់អ្នកប្រើប្រាស់ទាំងក្នុង និងក្រៅប្រទេស លើផលិតផលទុរេនរបស់ថៃ ដែលជាផ្លែឈើមានតម្លៃខ្ពស់នៅទូទាំងពិភពលោក។ ការដាក់ចេញគម្រោងទុរេនឌីជីថលរបស់ថៃនេះ ធ្វើឡើងចំពេលទីផ្សារទុរេនមានការប្រកួតប្រជែងដ៏ខ្លាំងក្លា ជាពិសេសពីប្រទេសនៅក្នុងតំបន់ដែលមានស្ថានភាពភូមិសាស្រ្តនិងអាកាសធាតុអំណោយផលសម្រាប់ដំណាំទុរេនដូចគ្នា។

លោក ផានតានូ វ៉ានណាង៉ាងសៃ (Pantanu Wannagangsai) ទីប្រឹក្សាក្រសួងសេដ្ឋកិច្ច និងសង្គមឌីជីថល បានអះអាងថា ការដាក់ចេញគម្រោងខាងលើវាស្របតាមគោលនយោបាយរបស់រដ្ឋាភិបាលថៃ ក្នុងការដោះស្រាយបញ្ហាបំណុល ប្រាក់ចំណូល តម្លៃនៃការរស់នៅ និងស្ថិរភាពសង្គម។

មកដល់ពេលនេះថៃ មានផ្ទៃដីដាំទុរេនសរុបជាង១៦ម៉ឺនហិកតា និងអាចប្រមូលផលទុរេនបានរហូតដល់១,៥៣លានតោន ខណៈផ្លែទុរេនថៃ ភាគច្រើន នាំចេញទៅកាន់ទីផ្សារចិន។ បើតាមការចុះផ្សាយរបស់ VN Express ចិនជាទីផ្សារនាំចូលទុរេនធំជាងគេមួយនៅលើពិភពលោក ដោយកាលពីឆ្នាំ២០២៣ កន្លងទៅ ចិនបាននាំចូលទុរេនរហូតដល់១,៤លានតោន ដែលមានតម្លៃរហូតដល់៦,៧ពាន់លានដុល្លារ។

ទីផ្សារទុរេនរបស់ចិន មិនមែនមានទំហំប៉ុននេះនោះទេ ពោលគឺអាចមានទំហំធំជាងនេះ។ តែយ៉ាងណាក៏ដោយ បច្ចុប្បន្នចិន កំពុងពង្រីកផលិតកម្មដាំដុះដំណាំនេះ ខណៈឡាវ កំពុងចាប់ផ្តើមដាំដំណាំនេះ ស្របពេលឥណ្ឌូនេស៊ី ដែលអាចប្រមូលផលទុរេនបានរហូតដល់ជិត២លានតោនក្នុង១ឆ្នាំ ក្នុងតម្លៃប្រមាណ៨ពាន់លានដុល្លារ ក៏កំពុងដាក់គោលដៅនាំចូលទៅកាន់ប្រទេសចិន ផងដែរ។ នៅពេលនេះប្រទេសដែលនាំចេញទុរេនទៅចិន ច្រើនជាងគេ គឺប្រទេសថៃ បន្ទាប់មកវៀតណាម៕

ដោយៈ សរ សុជាតិ