សហព័ន្ធនិយោជកនៃក្រសួងពាណិជ្ជកម្ម និងឧស្សាហកម្មថៃ បានប៉ាន់ប្រមាណថា ចាប់ពីខែមីនា រហូតដល់ចុងបញ្ចប់នៃការរីករាលនៃមេរោគ Covid-19 យ៉ាងហោចណាស់ នឹងមានកម្មករនិយោជិត ៦លាន៥សែននាក់ នឹងត្រូវបានបាត់បង់ការងារធ្វើ នេះប្រសិនបើរាប់បញ្ចូលទាំងពលករអន្តោប្រវេសន៍ និងអ្នកដែលធ្វើការក្នុងវិស័យការងារក្រៅប្រព័ន្ធផងដែរនោះ។
លោក សុឆាត ផនឆៃ វីសេសកុល អគ្គនាយកនៃនាយកដ្ឋានការងារ បានឲ្យដឹងថា មានពលរដ្ឋថៃសរុបជាង ១៤ម៉ឺននាក់ បានចុះឈ្មោះ ដើម្បីទទួលបានអត្ថប្រយោជន៍ពីការបាត់បង់ការងារធ្វើ នៅក្នុងខែមីនាកន្លងទៅ ដែលចំនួននេះ មានការកើនឡើង៧២% ពីតួលេខកាលពីខែកុម្ភៈ ដែលមានពលរដ្ឋមកចុះឈ្មោះតែជាង ៨ម៉ឺននាក់ និងកើនឡើងជិត១០០% បើធៀបនឹងចំនួនពលរដ្ឋដែលបានចុះឈ្មោះកាលពីខែមករា។
អត្ថបទទាក់ទង!
លោក វិសេសកុក បានគូសបញ្ជាក់ថា ពលរដ្ឋថៃ ដែលបាត់បង់ការងារ និងធ្លាប់បានចូលវិភាគទានដល់បេឡាជាតិរបបសន្ដិសុខសង្គម យ៉ាងតិច ៦ខែជាប់គ្នា អាចចុះឈ្មោះដើម្បីស្នើសុំជំនួយនេះបាន។
រដ្ឋមន្ត្រីក្រសួងការងារថៃ លោក ចាទូ មង្គល សុនណាកុល បាននិយាយថា ចំពោះប្រជាពលរដ្ឋ ដែលបានបាត់បង់ការងារ ដោយសារនិយោជករបស់ពួកគេត្រូវផ្អាកអាជីវកម្ម ដោយសារតែផលប៉ះពាល់នៃ Covid-19 គឺអាចមានសិទ្ធិទទួលបានការផ្ដល់ជូន ៧០% នៃប្រាក់ឈ្នួលចុងក្រោយរបស់ពួកគេ សម្រាប់រយៈពេល ៦ខែ ដែលមានចាប់ពី ១ម៉ឺន៥ពាន់បាត ឬស្មើនឹងប្រមាណ ៤៥៧ ដុល្លារ ឡើងទៅ។
សម្រាប់អ្នកដែលបានដាក់ពាក្យលាឈប់ពីការងារវិញ គឺនឹងទទួលបាន ៤៥% នៃប្រាក់ឈ្នួលចុងក្រោយរបស់ពួកគេផងដែរ។
រដ្ឋមន្ត្រីក្រសួងការងារថៃ បានបញ្ជាក់ដែរថា ចំពោះនិយោជិត ដែលត្រូវបានដាក់ឲ្យនៅដាច់ដោយឡែករយៈពេល ១៤ថ្ងៃ ពួកគេក៏អាចចុះឈ្មោះសម្រាប់ទទួលបានសំណងនេះដូចគ្នា នៅការិយាល័យសន្ដិសុខសង្គម៕
None
