រាជរដ្ឋាភិបាលថៃ នៅតែមានសុទិដ្ឋិនិយមខ្ពស់ ចំពោះការនាំចេញទំនិញរបស់ខ្លួន ថាអាចធ្វើបានប្រសើរជាងការព្យាករណ៍ទៅទៀត ដោយក្នុងខែមីនាកន្លងទៅនេះ ថៃ ធ្វើការនាំចេញទំនិញបាន ២២ពាន់លានដុល្លារអាមេរិក ជាតួលេខខ្ពស់ជាងបង្អស់ ក្នុងរយៈពេល ១៩ខែចុងក្រោយ។
លោកស្រី ភីមឆាណុក វុន ករ ផុន មន្ត្រីជាន់ខ្ពស់នៃក្រសួងពាណិជ្ជកម្មថៃ បានគូសបញ្ជាក់ថា ទោះបីជាមានបញ្ហាប្រឈមជាច្រើន កំពុងកើតមានឡើងនៅក្នុងសេដ្ឋកិច្ចសកលលោក ដោយសារតែមេរោគកូវីដ១៩ ក៏ដោយ ប្រទេសថៃ នៅតែមានវិស័យសំខាន់ៗគាំទ្រដល់កំណើនសេដ្ឋកិច្ច នោះគឺ វិស័យម្ហូបអាហារ មុខទំនិញប្រើប្រាស់ប្រចាំថ្ងៃ និងវិស័យកសិកម្ម ដែលបានឆ្លើយតបទៅនឹង តម្រូវការផលិតផលកសិកម្ម និងអាហារកែច្នៃរួច អំឡុងពេលកើតមានកូវីដ១៩នេះ។
លោកស្រីបន្តថា ថៃ ជាប្រទេសផលិតចំណីអាហារកែច្នៃដ៏មានសក្តានុពលមួយ នៅលើសកលលោក ដូច្នេះហើយ ថៃ អាចចាប់យកឱកាសនេះ ទាក់ទាញទំនុកចិត្ត និងការទទួលស្គាល់ពី អ្នកប្រើប្រាស់ជុំវិញសកលលោក ឲ្យកាន់តែជឿជាក់លើ ផលិតផលថៃ។
អត្ថបទទាក់ទង!
លើសពីនេះ ប្រទេសចិន កំពុងតែងើបឡើងវិញពី វិបត្តិកូវីដ១៩នេះ ហើយផលិតកម្មរបស់សហគ្រាសចិន នឹងអាចដំណើរការពេញលេញឡើងវិញ នៅចុងខែមេសានេះ ដែលវានឹងផ្តល់អត្ថប្រយោជន៍ ដល់ការនាំចេញរបស់ប្រទេសថៃ ទាក់ទងនឹងខ្សែចង្វាក់ផ្គត់ផ្គង់ទៅកាន់ចិន។
សូមជម្រាបថា នៅក្នុងត្រីមាសទី ១ ដើមឆ្នាំ ២០២០នេះ ថៃ សម្រេចការនាំចេញបាន ៦២ពាន់លានដុល្លារអាមេរិក កើនឡើង ០,៩% ធៀបនឹងរយៈពេលដូចគ្នាកាលពីឆ្នាំមុន និងសម្រេចបានអតិរេកពាណិជ្ជកម្មជាង ៣,៩ពាន់លានដុល្លារអាមេរិក ហើយក្រសួងពាណិជ្ជកម្មថៃក៏បានព្យាករណ៍ដែរថា ការនាំចេញ នឹងមានកំណើនចន្លោះពី ០ ដល់ ២% បើសិនជាការដឹកជញ្ជូនជាមធ្យម សម្រេចបាន ២០ ទៅ ២១ពាន់លានដុល្លារអាមេរិក ក្នុងមួយខែ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
