អ្នកនាំពាក្យរាជរដ្ឋាភិបាលថៃ បានលើកឡើងថា ផែនការនេះ នឹងគ្របដណ្តប់ទៅលើ ១លាន ៨សែនគ្រួសារ ដែលមានផ្ទៃដីដាំដុះកៅស៊ូប្រមាណ ២លាន ៧សែនហិកតា។
នាពេលកន្លងមក ក្រៅពីកៅស៊ូ រាជរដ្ឋាភិបាលថៃ ក៏មានការធានាលើតម្លៃសម្រូវអង្ករផងដែរ ដោយការធានាតម្លៃអង្ករ គឺនឹងមានការផ្តល់សំណង បើសិនជា តម្លៃទីផ្សារ ធ្លាក់ចុះទាបជាងតម្លៃគោលដែលបានកំណត់ ប៉ុន្ដែ ចំពោះការធានាតម្លៃកៅស៊ូវិញ កសិករ នឹងទទួលបាននូវ ការធានាតម្លៃអតិបរមា ៦០បាត ឬប្រមាណ ១ដុល្លារ ៨០សេនក្នុងមួយគីឡូក្រាម សម្រាប់សន្លឹកកៅស៊ូឆៅ និង ១ដុល្លារ ៧០សេន សម្រាប់ជ័រកៅស៊ូ ដោយក្នុងមួយគ្រួសារកំណត់មានផ្ទៃដីដាំដុះ ត្រឹមតែ ៤ហិកតាប៉ុណ្ណោះ។
នៅក្រោមផែនការនេះ អ្នកចៀរជ័រកៅស៊ូ មានសិទ្ធិទទួលបាន ៤០% នៃតម្លៃ និងម្ចាស់ចម្ការទទួលបាន ៦០% ហើយធនាគារកសិកម្ម និងសហករណ៍កសិកម្មរបស់រដ្ឋ ជាអ្នកគ្រប់គ្រងផែនការនេះ ដែលនឹងចាប់ផ្តើមពីខែតុលា ឆ្នាំ ២០២១នេះ រហូតដល់ខែកញ្ញា ឆ្នាំ ២០២២ខាងមុខ។
យ៉ាងណាក៏ដោយ ផែនការនេះ នឹងត្រូវបានដាក់ស្នើសុំទៅកាន់ គណៈរដ្ឋមន្ត្រីថៃ ដើម្បីអនុម័តនៅខែតុលា ខាងមុខនេះ។អត្ថបទគួរអាន
អ្នកនាំពាក្យរាជរដ្ឋាភិបាលថៃ ក៏បានបញ្ជាក់ដែរថា នាយករដ្ឋមន្ត្រីថៃ ប្រាយុទ្ធ ច័ន្ទអូចា បានបញ្ជាភ្នាក់ងារពាក់ព័ន្ធ ឲ្យការពារកុំឲ្យមានអំពើពុករលួយ ហើយធានាថា ប្រាក់ទាំងនោះ ត្រូវបញ្ជូនទៅដល់ដៃ កសិករផ្ទាល់តែម្តង។
នាយករដ្ឋមន្ត្រីថៃ ក៏បានបង្គាប់ឲ្យមានការតាមដានជាប្រចាំ ដើម្បីបង្កើនតម្លៃផលិតផលកសិកម្ម គាំទ្រដល់កសិករក្នុងការកាត់បន្ថយចំណាយផលិតកម្ម និងជំរុញការប្រើប្រាស់កៅស៊ូ ជាវត្ថុធាតុដើមនៅក្នុងវិស័យឧស្សាហកម្ម។
បើតាមទិន្នន័យពី ក្រសួងពាណិជ្ជកម្មថៃ បានបង្ហាញថា ក្នុងរយៈពេល ៥ខែ ដើមឆ្នាំ ២០២១នេះ ថៃ សម្រេចការនាំចេញកៅស៊ូជាង ២ពាន់លានដុល្លារអាមេរិក ដែលមានកំណើនជាង ៥០% ធៀបនឹងពេលដូចគ្នាកាលពីឆ្នាំមុន ហើយប្រសិនជាយើងគិតអំពីបរិមាណនាំចេញវិញ គឺជិត ១លាន ៤សែនតោន។
ទីផ្សារនាំចេញកៅស៊ូធំៗរបស់ថៃ រួមមាន ចិន ម៉ាឡេស៊ី ជប៉ុន អាមេរិក និងកូរ៉េខាងត្បូង ដោយទីផ្សារទាំងអស់នេះ សុទ្ធតែមានកំណើន ២ខ្ទង់ នៅក្នុងការនាំចេញ ៥ខែ ដើមឆ្នាំនេះ។
សូមជម្រាបដែរថា ប្រទេសថៃ បានបង្ហាញពីក្តីរំពឹងខ្ពស់ ក្នុងការសម្រេចនូវកំណើននាំចេញកៅស៊ូ ២៥% នៅក្នុងឆ្នាំ ២០២១នេះ ដោយក្នុងរយៈពេល ៥ខែ ដើមឆ្នាំ ការនាំចេញកៅស៊ូ មានកំណើន ៥០% ទៅហើយ៕អត្ថបទ៖ វណ្ណ វុឌ្ឍវិវឌ្ឍន៍
None
