ជាការគាំទ្រដល់ ការអភិវឌ្ឍវិស័យបច្ចេកវិទ្យាក្នុងស្រុក ឧបនាយករដ្ឋមន្រ្តីថៃ លោក សោមគីត ចតុស្រីបិតក បានមានប្រសាសន៍ គម្រោងដេញថ្លៃលើ អាជ្ញាបណ្ណបច្ចេកវិទ្យានេះ មិនត្រូវផ្តោតសំខាន់លើ តម្លៃថ្លៃហួសហេតុពេកទេ សំខាន់គឺការពង្រាយបណ្តាញបច្ចេកវិទ្យាថ្មីនេះ ដើម្បីគាំទ្រដល់ សេដ្ឋកិច្ច និងសង្គមជាតិ។
លោក សោមគីត បន្តថា ថៃ កំពុងតែប្រកួតប្រជែងជាមួយនឹង វៀតណាម ម៉ាឡេស៊ី និងភ្វីលីពីន ដើម្បីក្លាយជា មជ្ឈមណ្ឌលឌីជីថលពោរពេញដោយភាពច្នៃប្រឌិត ប្រចាំអាស៊ាន ដែលសុទ្ធតែមានគម្រោងដាក់ដំណើរការ ប្រព័ន្ធ 5G ក្នុងឆ្នាំ ២០២០ដូចៗគ្នា។
អត្ថបទទាក់ទង!
មានក្រុមហ៊ុនបច្ចេកវិទ្យាធំៗចំនួន ៤ បានបង្ហាញពីចំណាប់អារម្មណ៍ចូលមកវិនិយោគ ក្នុងប្រទេសថៃ ជាពិសេសក្នុង តំបន់ច្រករបៀងសេដ្ឋកិច្ចភាគខាងកើត ហើយក្រុមប្រឹក្សាវិនិយោគថៃ ត្រូវតែសម្របសម្រួល ការងារ ដើម្បីទាក់ទាញពួកគេ ឲ្យចូលមកវិនិយោគឲ្យបាន។
យោងតាមរបាយការណ៍សិក្សាមួយ ដែលមានឈ្មោះថា e-Conomy Southeast-Asia 2019 បានឲ្យដឹងថា សេដ្ឋកិច្ចឌីជីថលរបស់ប្រទេសថៃ ត្រូវបានគេព្យាករថា នឹងមានទំហំ ១៦ពាន់លានដុល្លារអាមេរិក ក្នុងឆ្នាំ ២០១៩នេះ ជាប់លំដាប់ថ្នាក់ទី ២ ក្រោមប្រទេសឥណ្ឌូនេស៊ី តែយ៉ាងណា ថៃ រំពឹងថា នឹងរក្សាបានកំណើន ២៩%ជារៀងរាល់ឆ្នាំ ដែលអាចធ្វើឲ្យ សេដ្ឋកិច្ចឌីជីថលរបស់ថៃ កើនដល់ ៥០ពាន់លានដុល្លារអាមេរិក ត្រឹមឆ្នាំ ២០២៥ខាងមុខ។
លើសពីនេះ សេដ្ឋកិច្ចឌីជីថលនៅក្នុងតំបន់អាស៊ីអាគ្នេយ៍ បានកើនដល់ ១០០ពាន់លានដុល្លារអាមេរិក ក្នុងឆ្នាំ ២០១៩នេះ ដោយមានប្រជាជនជាង ៣៦០លាននាក់ ភ្ជាប់ទំនាក់ទំនងជាមួយ ហើយតាមការព្យាកណ៍ទំហំសេដ្ឋកិច្ចនេះ នឹងកើនដល់ ៣០០ពាន់លានដុល្លារអាមេរិក ត្រឹមឆ្នាំ ២០២៥។
ទាក់ទងទៅនឹងវិស័យសេដ្ឋកិច្ច និងបច្ចេកវិទ្យានេះ ឯកឧត្តម ប្រាយុទ្ធ ចាន់អ៊ូចា នាយករដ្ឋមន្រ្តីថៃ មានប្រសាសន៍ដែរថា រាជរដ្ឋាភិបាលថៃ នឹងប្រើប្រាស់បច្ចេកវិទ្យា ដើម្បីប្រមូលទិន្នន័យសំខាន់ៗ ងាយស្រួលក្នុងការរៀបចំផែនការថវិកាជាតិ ឲ្យត្រូវចំចំណុចដែលមានបញ្ហា និងដោះស្រាយដោយមានប្រសិទ្ធភាពបំផុត។
ឧបនាយករដ្ឋមន្រ្តីថៃ លោក សោមគីត ចតុស្រីបិតក ក៏បានគូសបញ្ជាក់ដែរថា រាជរដ្ឋាភិបាលថៃ គ្រោងនឹងផ្លាស់ប្តូរទីភ្នាក់ងាររដ្ឋទាំងអស់ ឲ្យក្លាយទៅជា ឌីជីថលពេញលេញ ក្នុងរយៈពេល ៣ឆ្នាំ ចន្លោះឆ្នាំ ២០២០ និង ២០២២។
គួរបញ្ជាក់ថា រយៈពេលជាង ៥ឆ្នាំ ចុងក្រោយនេះ រាជរដ្ឋាភិបាលថៃ បានជំរុញឲ្យមានការប្រើប្រាស់បច្ចេកវិទ្យាទំនើបៗ នៅក្នុងប្រព័ន្ធការងារ ដើម្បីឆ្លើយតបទៅនឹង ភាពរីកចម្រើននៃបច្ចេកវិទ្យាសកល ដែលជាលទ្ធផល បានធ្វើឲ្យ ប្រទេសថៃ ទទួលបានចំណាត់ថ្នាក់ល្អ ក្នុងរបាយការណ៍ស្តីពីភាពងាយស្រួលធ្វើអាជីវកម្ម ឆ្នាំ ២០២០ របស់ ធនាគារពិភពលោក ដោយថៃ ឡើងពីលេខ ២៧ មកដល់លេខ ២១ ប្រសើរជាងមុន៕
None
