លោកចូ បៃដិន ថា លោកនឹងជួបជាមួយលោក ស៊ី ជីនពីង ដើម្បីនិយាយតទៅល់គ្នាឱ្យបានច្បាស់ពីសំណុំរឿងបាឡុងចារកម្ម
ប្រធានាធិបតីសហរដ្ឋអាមេរិកលោក ចូ បៃដិន បាននិយាយកាលពីថ្ងៃទី១៦កុម្ភៈថា លោកចង់ជួបជាមួយប្រធានាធិបតីចិនលោក ស៊ី ជីនពីង ដើម្បីនិយាយតទល់គ្នា…
បើតាមលោក ភូស៊ីត រតនាគុល អគ្គនាយកនៃនាយកដ្ឋានជំរុញពាណិជ្ជកម្មអន្តរជាតិឱ្យដឹងថា នាយកដ្ឋានរបស់លោក បានកំណត់ផែនការសកម្មភាពរយៈពេលប្រាំឆ្នាំ គឺពីឆ្នាំ ២០២៣ដល់ឆ្នាំ២០២៧ ដើម្បីកែលម្អប្រព័ន្ធពាណិជ្ជកម្មអន្តរជាតិរបស់ថៃ បង្កើនសមត្ថភាពប្រកួតប្រជែង សំដៅក្លាយជាអ្នកនាំចេញធំបំផុតលំដាប់ទី៥នៅអាស៊ី។
បច្ចុប្បន្នថៃ ឈរនៅលំដាប់ទី៨ជាអ្នកនាំចេញធំបំផុតនៅអាស៊ី ដែលនេះបើយោងតាមទិន្នន័យពីការសិក្សារបស់ វិទ្យាស្ថានគ្រប់គ្រងការអភិវឌ្ឍ តាមពីក្រោយប្រទេសសិង្ហបុរី ទីក្រុងហុងកុង ប្រទេសម៉ាឡេស៊ី ចិន ឥណ្ឌា កូរ៉េខាងត្បូង និងកោះតៃវ៉ាន់។
ប៉ុន្តែបើផ្អែកលើស្ថិតិតម្លៃនាំចេញក្នុងឆ្នាំ២០២១ ប្រទេសថៃ គឺជាប្រទេសនាំចេញធំបំផុតទី៩ នៅអាស៊ី បន្ទាប់ពីប្រទេសចិន ហុងកុង ជប៉ុន កូរ៉េខាងត្បូង សិង្ហបុរី តៃវ៉ាន់ ឥណ្ឌា វៀតណាម និងម៉ាឡេស៊ី។
កាលពីឆ្នាំទៅមិញ ការនាំចេញរបស់ថៃមានទំហំ ២៨៧ពាន់លានដុល្លារអាមេរិក ដែលស្មើនឹង ១,២៤% នៃពាណិជ្ជកម្មអន្តរជាតិសរុប ជាប់ចំណាត់ថ្នាក់លេខ២៤ក្នុងពិភពលោក។ ទោះយ៉ាងណា បើតាមលោក ភូស៊ីតអគ្គនាយកនៃនាយកដ្ឋានជំរុញពាណិជ្ជកម្មអន្តរជាតិដដែលបានលើកឡើងថា ក្រោមផែនការសកម្មភាពថ្មីនេះ ក្រសួងគ្រោងនឹងផ្តោតលើការពង្រឹង និងលើកកម្ពស់សហគ្រិនថៃសម្រាប់សកម្មភាពពាណិជ្ជកម្មអន្តរជាតិ លើកកម្ពស់តម្លៃសម្រាប់ផលិតផល និងសេវាកម្ម ពង្រីកបណ្តាញចែកចាយផលិតផល និងការលើកកម្ពស់គុណភាពនៃសេវាកម្មរបស់ក្រសួង។
ដោយឡែក សម្រាប់ឆ្នាំ២០២៣នេះ ក្រសួងពាណិជ្ជកម្មថៃនឹងរៀបចំសកម្មភាពសរុប ៤៥០កម្មវិធី ដើម្បីជំរុញការនាំចេញ ផ្តោតទៅលើទីផ្សារសំខាន់ៗចំនួន៤ ដូចជានៅមជ្ឈឹមបូព៌ា អាស៊ីខាងត្បូង ចិន និងអាស៊ីអាគ្នេយ៍រួមមាន កម្ពុជា ឡាវ មីយ៉ានម៉ា និងវៀតណាម។
ទោះយ៉ាងណា ថែនៅតែចង់រក្សាទីផ្សារប្រពៃណីរបស់ខ្លួន ដូចជាសហរដ្ឋអាមេរិក កាណាដា សហភាពអឺរ៉ុប ជប៉ុន ហុងកុង តៃវ៉ាន់ កូរ៉េខាងត្បូង អូស្ត្រាលី នូវែលសេឡង់ អាហ្វ្រិក និងអាមេរិកឡាទីន ជាដើម។
សូមជម្រាបថា ផែនការសកម្មភាព៥ឆ្នាំរបស់ថៃត្រូវបានដាក់ចេញ នៅចំពេលដែលរបាយការណ៍ផ្លូវការរបស់រដ្ឋាភិបាលក្រុងបាងកក បង្ហាញថា សេដ្ឋកិច្ចថៃសម្រេចបានកំណើន ២,៦%កាលពីឆ្នាំ២០២២ ធៀបឆ្នាំ២០២១ដែលមានត្រឹម ១,៦%។ ក្នុងនោះ ការនាំចេញបានជួយរក្សាប្រទេសថៃនៅលើគន្លងកំណើនវិជ្ជមាននេះ ប៉ុន្តែបានធ្លាក់ស្បើយបន្តិចនៅពេលដែលតម្រូវការចាប់ធ្លាក់ចុះ ពីទីផ្សារសហរដ្ឋអាមេរិក និងអឺរ៉ុប ដែលជាដៃគូពាណិជ្ជកម្មដ៏សំខាន់របស់ខ្លួន។ ការប៉ោងឡើងភ្លាមៗនៃតម្លៃប្រាក់បាត ធៀបនឹងប្រាក់ដុល្លារ ក៏មានទម្ងន់លើការនាំចេញផងដែរ៕
