កត្តាអ្វីខ្លះជួយឲ្យថៃអាចជំនួសចិនក្លាយជាប្រទេសល្អបំផុតសម្រាប់ការចាប់ផ្តើមអាជីវកម្ម?

ប្រទេសថៃដែលមានប្រជាពលរដ្ឋជាង៧០លាននាក់បានជាប់ចំណាត់ថ្នាក់ទី២ជាប្រទេសល្អបំផុតក្នុងពិភពលោកក្នុងការចាប់ផ្តើមអាជីវកម្មនៅឆ្នាំ២០២៣។ នេះបើយោងតាមចំណាត់ថ្នាក់ដែលបានចេញផ្សាយនៅក្នុងរបាយការណ៍ US News and World Report ដែលចុះផ្សាយនៅលើសារព័ត៌មាន the Nation។ តាមការស្ទាបស្ទង់ដែលគេបានធ្វើនៅក្នុងចំណោមប្រទេសចំនួន៨៥ ដែលសុទ្ធតែជាគោលដៅខាងបណ្តាក់ទុនសំខាន់ៗនៅលើពិភពលោកបានឲ្យដឹងថា ទាំងស្ថានភាពនៃលក្ខខណ្ឌការងារ បញ្ហាពន្ធ និងលក្ខខណ្ឌរួមផ្សំផ្សេងៗទៀត ប្រទេសល្អបំផុតសម្រាប់ការចាប់ផ្តើមអាជីវកម្មនៅឆ្នាំ២០២៣ គឺឥណ្ឌា បន្ទាប់មកថៃ ហើយចិនធ្លាក់មកនៅលំដាប់ទី៣វិញ។

ចំណាត់ថ្នាក់នេះ ត្រូវបានបង្ហាញបន្ទាប់ពីគេបានស្ទាប់ស្ទង់ទៅលើមនុស្ស ដែលជាបុគ្គលគន្លឹះនៅក្នុងប្រព័ន្ធសេដ្ឋកិច្ចរបស់ប្រទេសទាំងអស់សរុបប្រមាណ១ម៉ឺន៧ពាន់នាក់។ ក្នុងចំណោមពួកគេទាំងនេះ មានអ្នកដែលអាចសម្រេចចិត្តចំនួន៤,៦០០នាក់នៅក្នុងពិភពអាជីវកម្ម ដូចជានាយកប្រតិបត្តិជាន់ខ្ពស់នៅក្នុងអង្គការ ឬម្ចាស់អាជីវកម្មខ្នាតតូច តែពួកគេអាចមានលទ្ធភាពជួលបុគ្គលិក និងកម្មករបម្រើសង្វាក់ផលិតកម្មបាន ។

តាមលក្ខខណ្ឌ ប្រទេសដែលបានទទួលចំណាត់ថ្នាក់ល្អ គឺផ្អែកទៅលើព័ត៌មានដែលកុ្រមការងារទទូលបានលើមូលដ្ឋានធំៗចំនួន៥ចំណុច រួមមានតម្លៃសមរម្យ, អវត្ដមាននៃឧបសគ្គការិយាល័យធិបតេយ្យ, តម្លៃផលិតកម្មទាប, ការតភ្ជាប់ទៅកាន់ទីផ្សារពិភពលោក និងលទ្ធភាពទទួលបានដើមទុនសម្រាប់ការងារវិនិយោគ និងធ្វើអាជីវកម្មជាដើម។

ក្រោយការស្ទាប់ស្ទង់ ប្រទេសដែលមានស្ថានភាពល្អបំផុត ពោលគឺលើប្រទេសថៃ និងចិន គឺឥណ្ឌា ហើយចំណាត់ថ្នាក់ក្រោមនេះជាបន្តបន្ទាប់រួមមានម៉ិកស៊ិក, សហរដ្ឋអាមេរិក, ហ្វីលីពីន,វៀតណាម, ប្រេស៊ីល, ម៉ាឡេស៊ី, និងអេស្ប៉ាញជាដើម។ មកដល់ពេលនេះក្រោមសម្ពាធនៃសង្រ្គាមសេដ្ឋកិច្ច ភាពតានតឹងរវាងសហរដ្ឋអាមេរិក និងចិន បានធ្វើឲ្យក្រុមហ៊ុនបរទេសនៅក្នុងប្រទេសចិនជាច្រើនបានសម្រេចចិត្តរើទីតាំងផលិតរបស់ពួកគេមកកាន់ប្រទេសផ្សេងៗ ដែលរួមមានឥណ្ឌា វៀតណាម និងថៃ។

បើតាមសេចក្តីរាយការណ៍មួយរបស់ទីភ្នាក់ងារសារព័ត៌មានអេភី មាន២ភាគ៣ នៃក្រុមហ៊ុន ៥៧០ ដែលសភាពាណិជ្ជកម្មអឺរ៉ុបបានអង្កេតបានបង្ហញថា ស្ថានភាពអាជីវកម្មនៅចិននៅក្នុងពេលនេះកំពុងតែមានស្ថានភាពពិបាក ហើយនៅក្នុងចំណោមនោះមានក្រុមហ៊ុន៣ នៅក្នុងចំណោមក្រុមហ៊ុន៥ បានឆ្លើយថា បរិយាកាសអាជីវកម្មនៅចិន គឺកំពុងតែរងការរំខានដោយស្ថានភាពនយោបាយ៕

ដោយៈ សរ សុជាតិ