រាជរដ្ឋាភិបាលថៃ កាលពីពេលថ្មីៗនេះ បានសម្រេចដាក់ចេញនូវកញ្ចប់ថវិកាប្រមាណ៧០ ពាន់លានបាត ឬស្មើនឹងប្រមាណជាង ២.៣០០ លានដុល្លារអាមេរិក ដើម្បីសង្គ្រោះថ្លៃស្រូវ ខណៈដែលការច្រូតកាត់ប្រចាំឆ្នាំ ត្រូវបានគេមើលឃើញថា នឹងមានជន់ជោរទីផ្សារនៅក្នុងខែនេះ។ នេះបើតាមការចុះផ្សាយដោយសាព័ត៌មានបាងកកប៉ុស្ដិ៍នៅថ្ងៃនេះ។
កាសែតបាងកកប៉ុស្ដិ៍បានរាយការណ៍ថា លោក វិឆ័យ ភោជណាគីត អគ្គនាយកនៃអគ្គនាយកដ្ឋានពាណិជ្ជកម្មផ្ទៃក្នុង បានឲ្យដឹងថា កិច្ចប្រជុំចុងក្រោយនៃអនុគណៈកម្មាធិការ គោលនយោបាយ និងការគ្រប់គ្រង ស្រូវអង្ករជាតិ ដែលដឹកនាំដោយរដ្ឋមន្ត្រីក្រសួងពាណិជ្ជកម្មថៃ គឺលោក ជូរិន ឡាក់សាណា វិស្សុត កាលពីសប្ដាហ៍មុននេះ បានអនុម័តលើគម្រោងទ្រទ្រង់ថ្លៃស្រូវនេះ ក្នុងទំហំទឹកប្រាក់សរុប ៧០ ពាន់លានបាត ឬស្មើនឹងប្រមាណ ជាង ២.៣០០ លានដុល្លារអាមេរិក។
អត្ថបទទាក់ទង!
ថវិកានេះ គឺសម្រាប់ប្រើប្រាស់គ្របដណ្ដាប់លើគម្រោងកម្ចី សម្រាប់ផ្ដល់ជូនកសិករ ដែលយល់ព្រមពន្យារពេលក្នុងការលក់ស្រូវរបស់ពួកគេ។ គម្រោងកម្ចីនេះ ក៏សម្រាប់កិច្ចសហការ កសិកម្មដើម្បីប្រមូលស្រូវអង្ករ និងបន្ថែមតម្លៃ, ការផ្ដល់ជាកម្ចីទន់ (Soft Loans) សម្រាប់កសិករ វិទ្យាស្ថានកសិកម្ម, កិច្ចសហការកសិកម្ម និងសហគ្រាសសហគមន៍ ដើម្បីសាងសង់ឃ្លាំងស្ដុកស្រូវ និងពន្យារពេលការលក់ស្រូវ ដើម្បីធានាបាននូវស្ថិរភាពថ្លៃស្រូវអង្ករ។ អត្រាប្រាក់កម្ចីនៃគម្រោងនេះ គឺមាន៣% ជាការឧបត្ថម្ភធន សម្រាប់ឈ្មួញអង្ករ ដែលយល់ព្រមស្ដុកអង្កររបស់ពួកគេ សម្រាប់រយៈពេល ២ ទៅ៦ខែ ដោយមិនទាន់បញ្ចេញលក់។
តាមគម្រោងកម្ចី សម្រាប់កសិករដែលយល់ព្រមពន្យារពេលលក់ស្រូវនេះ ត្រូវបានគេប៉ាន់ប្រមាណថា នឹងចំណាយអស់ថវិកាសរុបប្រមាណ១០ ពាន់លានបាត ឬស្មើនឹងប្រមាណ ៣៣០ លានដុល្លារអាមេរិក ហើយគម្រោងកម្ចីសម្រាប់វិទ្យាស្ថានកសិកម្ម រួមទាំងកិច្ចសហការកសិកម្ម ដើម្បីប្រមូលស្រូវអង្ករ និងបន្ថែមតម្លៃសម្រាប់ស្រូវអង្ករ នឹងចំណាយអស់ថវិកាប្រមាណ ១៥ ពាន់លានបាត ស្មើនឹងប្រមាណ ៥០០ លានដុល្លារអាមេរិក។
ក្រោម គម្រោងកម្ចីនេះ កសិករដែលយល់ព្រមពន្យារពេលលក់ស្រូវរបស់ខ្លួន រដ្ឋនឹងផ្ដល់ជូន១.៥០០ បាត ឬស្មើនឹងប្រមាណ៥០ ដុល្លារអាមេរិក ក្នុងស្រូវមួយតោន ជាមួយនឹងការគ្មានការកំណត់បរិមាណស្រូវ សម្រាប់កសិករ ដែលរក្សាទុកស្រូវនៅក្នុងឃ្លាំងស្ដុក ឬជង្រុករបស់ពួកគេផ្ទាល់។
គម្រោងកម្មវិធីកម្ចីនេះ នឹងត្រូវចូលជាធរមានភ្លាមៗ ខណៈដែលគណៈកម្មាធិការគោលនយោបាយស្រូវអង្ករជាតិ ដែលដឹកនាំដោយលោកនាយករដ្ឋមន្ត្រីថៃ បានអនុម័តជាគោលការណ៍រួចហើយ។
ការិយាល័យសេដ្ឋកិច្ចកសិកម្ម បានព្យាករថា ទិន្នផលស្រូវប្រចាំឆ្នាំរបស់ថៃ នៅឆ្នាំនេះ អាចនឹងនៅមាន ២៤ លាន ៥សែនតោនស្រូវ ក្នុងឆ្នាំ២០១៩ និងឆ្នាំ២០២០ ថយចុះប្រមាណជិត៣% ពី ២៥ លានតោនស្រូវ កាលពីរដូវប្រមូលផលឆ្នាំមុន៕
None
