ប្រធានសមាគមអ្នកនាំចេញអង្ករថៃ លោក ចារឿន ឡៅធម្មតាស បានឲ្យដឹង លទ្ធភាពខ្ពស់បំផុត នៃការនាំចេញអង្កររបស់ថៃ គឺនៅត្រឹម ៩លានតោនប៉ុណ្ណោះ ក្នុងឆ្នាំនេះ ដែលអាចបង្កើតចំណូលជាង ៤,៧ពាន់លានដុល្លារអាមេរិក ព្រោះថា ក្នុងរយៈពេល ៦ខែ ដើមឆ្នាំ ២០១៩នេះ ថៃ នាំចេញអង្ករបានត្រឹមតែ ៤,៣ លានតោន ដែលធ្លាក់ចុះ ១៩ភាគរយ ធៀបនឹងរយៈពេលដូចគ្នា កាលពីឆ្នាំមុន។
លោក បន្តថា កសិករ ជួបនឹងបញ្ហាគ្រោះរាំងស្ងួត នៅក្នុងពាក់កណ្តាលរដូវវស្សា ដោយសារតែ មិនសូវមានភ្លៀងធ្លាក់ ហើយបើសិន ក្នុងខែសីហា នៅតែគ្មានភ្លៀងធ្លាក់ទៀត ផលិតកម្មស្រូវអង្ករ ទូទាំងប្រទេសថៃ នឹងធ្លាក់ចុះយ៉ាងខ្លាំង។
អត្ថបទទាក់ទង!
កាលពីឆ្នាំ ២០១៨ ប្រទេសថៃ បាននាំចេញអង្ករជាង ១១លានតោន ដែលបានក្លាយជា ប្រទេសនាំចេញអង្ករធំ លំដាប់លេខ ២ លើសកលលោកនោះ បន្ទាប់ពីប្រទេសឥណ្ឌា។
លើសពីនេះទៅទៀត រាជរដ្ឋាភិបាលថៃ បានប្រកាសឲ្យ កសិករ ផ្អាកការធ្វើស្រូវប្រាំង នៅតាមតំបន់មួយចំនួន រហូតដល់ដើមឆ្នាំ ២០២០ ដើម្បីរក្សា ទឹក សម្រាប់ប្រើប្រាស់ក្នុងជីវភាពប្រចាំថ្ងៃ។
មិនមែនត្រឹមតែមានបញ្ហាគ្រោះរាំងស្ងួតប៉ុណ្ណោះទេ ថៃ ក៏កំពុងមានការព្រួយបារម្ភ ដោយសារតែ ប្រទេសចិន មានផែនការបង្កើនការនាំចេញអង្កររបស់ខ្លួន ហើយមិនត្រឹមតែប៉ុណ្ណោះ គឺមានតម្លៃថោកថែមទៀតផង។
លោក ឆូគីត អូផាវង្ស ប្រធានកិត្តិយសនៃ សមាគមអ្នកនំាចេញអង្ករថៃ បានលើកឡើងថា ក្នុងមួយឆ្នាំៗ ប្រទេស ចិន ផលិតអង្ករបាន ១២០លានតោន តែឆ្នាំនេះ គ្រោងនឹងនាំចេញអង្ករស្រូវចាស់ ប្រមាណ ៣លានតោន ខណៈដែលឆ្នាំមុន នាំចេញតែជិត ២លានតោនប៉ុណ្ណោះ។
រីឯតម្លៃអង្ករចិន ដែលដាក់លក់លើទីផ្សារវិញ គឺមានតម្លៃប្រមាណ ៣០០ដុល្លារអាមេរិក ហើយអង្ករថៃ ដែលមានប្រភេទស្រដៀងគ្នានោះ លក់ក្នុងតម្លៃ ៣៩០ដុល្លារអាមេរិកឯណោះ ខណៈដែល វៀតណាម លក់ជាង ៣៦០ដុល្លារអាមេរិក និងឥណ្ឌា លក់ជាង ៣៧០ដុល្លារអាមេរិក។
ទីផ្សារអាហ្វ្រិក គឺជាទីផ្សារដ៏មានសក្តានុពល សម្រាប់ចិន ដែលអ្នកប្រើប្រាស់នៅទីនោះ មានទម្លាប់បរិភោគ អង្ករស្រូវចាស់ បើនិយាយអំពីតម្លៃវិញ អង្ករចិន គឺថោកជាងគេ ហើយថៃ ក៏អស់ស្តុកអង្ករស្រូវចាស់ទៅទៀត។
គួរបញ្ជាក់ថា ចិន នៅតែបន្តបង្កើតប្រភេទពូជស្រូវជាច្រើនមុខទៀត ដែលទទួលបានទិន្នផលខ្ពស់ មានន័យថា ចិន នឹងពង្រីកការនាំចេញអង្ករទៅកាន់ បណ្តាប្រទេសអាស៊ាន ដោយលក់ក្នុងតម្លៃទាប ហើយនៅពេលនោះ ទីផ្សារអង្ករថៃ នឹងរងទុក្ខខ្លាំងជាងគេបំផុត៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
