ថៃត្រូវបានរបាយការណ៍មួយអះអាងថា ជាទឹកដីមានករណីឆបោកតាមទូរសព្ទខ្ពស់ជាងគេនៅអាស៊ី

Gogolook ដែលជាក្រុមហ៊ុនអភិវឌ្ឍន៍កម្មវិធី Whoscall ក្រុមហ៊ុន TrustTech រួមជាមួយអង្គការប្រឆាំងការឆបោកជាសកល (The Global Anti-Scam Alliance) បានរៀបចំកិច្ចប្រជុំកំពូលស្ដីពីការប្រឆាំងការឆបោកនៅអាស៊ី (ASAS) ជាលើកដំបូងមិនធ្លាប់មាននៅទីក្រុងតៃប៉ិ កោះតៃវ៉ាន់ ជាកន្លែងដែលគេបញ្ចេញរបាយការណ៍ខាងលើនេះ។

របាយការណ៍នេះអះអាងថា ពលរដ្ឋអាស៊ី ភាគច្រើនមានការជឿជាក់ជ្រុលថា ខ្លួនមានសមត្ថភាពទប់ទល់អំពើឆបោកតាមអ៊ីនធឺណិត ខណៈដែលជនឆបោកបានចាប់ផ្តើមប្រើប្រាស់បច្ចេកវិទ្យាបញ្ញាសិប្បនិម្មិត AI ដើម្បីធ្វើឱ្យការឆបោកកាន់តែមានភាពស្មុគស្មាញ និងពិបាកចាប់។

ប្រភពដដែលបានសង្កត់ធ្ងន់ថា ពលរដ្ឋថៃទំនងជាត្រូវបានឆបោកតាមទូរស័ព្ទច្រើនជាងគេនៅអាស៊ី ដែលភាគច្រើនធ្វើឡើងតាមរយៈបណ្តាញសង្គម រួមមាន Facebook, LINE និងអ៊ីមែល ខណៈដែលមនុស្សជាងពាក់កណ្តាលនៃទ្វីបនេះប្រឈមការជួបប្រទះនឹងជនឆបោកយ៉ាងតិចម្តងក្នុងមួយសប្តាហ៍។

របាយការណ៍ដដែលបង្ហាញថា អាស៊ីកំពុងក្លាយជាគោលដៅដ៏សំខាន់សម្រាប់ឧក្រិដ្ឋជនដែលទំនងជាប្រើប្រាស់បច្ចេកវិទ្យា AI ដើម្បីប្រព្រឹត្តការឆបោកកាន់តែលឿន និងកាន់តែងាយស្រួលនៅពេលប្រតិបត្តិការនៅបរទេស ដែលពិបាកនឹងស្វែងរក និងតាមចាប់ខ្លួន។

ដើម្បីដោះស្រាយបញ្ហានេះ កិច្ចប្រជុំនៅកោះតៃវ៉ាន់ខាងលើនេះបានជំរុញឱ្យគ្រប់ប្រទេសលើកកម្ពស់ការផ្លាស់ប្តូរព័ត៌មាន និងបង្កើនកិច្ចសហប្រតិបត្តិការក្នុងតំបន់រវាងភាគីពាក់ព័ន្ធ ដើម្បីកំណត់អត្តសញ្ញាណ និងទប់ស្កាត់ឧក្រិដ្ឋជនឱ្យបានទាន់ពេល។

របាយការណ៍ស្ដីពីការឆបោកនៅអាស៊ីប្រចាំឆ្នាំ២០២៣ បានបង្ហាញថា ជាង៥០% នៃអ្នកដែលត្រូវបានស្ទង់មតិចំនួន២ម៉ឺននាក់ក្នុង១១ប្រទេសនៅអាស៊ីអះអាងថា ពួកគេបានជួបប្រទះនឹងជនឆបោកយ៉ាងតិចម្តងក្នុងមួយសប្តាហ៍ តាមរយៈការទំនាក់ទំនងតាមទូរសព្ទ និងសារ SMS ជាបណ្តាញដ៏សំខាន់ ដែលជនឆបោកប្រើដើម្បីទំនាក់ទំនងជាមួយជនរងគ្រោះ។

របាយការណ៍បានអះអាងថា ពលរដ្ឋក្នុងប្រទេសថៃទំនងជាត្រូវបានឆបោកតាមទូរសព្ទ៨៨% បន្ទាប់មកម៉ាឡេស៊ីប្រមាណ៨៣% ហុងកុង៨១% និងវៀតណាមប្រមាណជា៨០%។

ឧត្ដមសេនីយឯក ថាត់ឆៃ ភីថានីឡាបុត (Thatchai Pitaneelaboot) ជំនួយការស្នងការប៉ូលិសថៃ បានអះអាងថា ការឆបោកតាមអ៊ីនធឺណិតកើតឡើងញឹកញាប់បំផុតនៅក្នុងប្រទេសថៃ ហើយទឹកប្រាក់ដែលពលរដ្ឋថៃ បានខាតបង់ក៏មានចំនួនច្រើនដែរ៕

ដោយៈ សរ សុជាតិ