ស្ថិតក្នុងបរិការណ៍នេះ សហព័ន្ធឧស្សាហកម្មថៃ រំពឹងថា វានឹងផ្តល់ផលប្រយោជន៍ច្រើនដល់ក្រុមហ៊ុននាំចេញចំណីអាហាររបស់ថៃ ដ្បិតថា ប្រទេសក្បែរខាងកម្ពុជាមួយនេះ គឺជាប្រទេសមានការផលិត និងនាំចេញស្បៀងអាហារដ៏ធំមួយនៅក្នុងតំបន់។ នេះបើយោងតាមការចុះផ្សាយសារព័ត៌មាន Bangkok Post។
លោក ក្រៀងក្រៃ ធៀននុគុល (Kriengkrai Thiennukul) ប្រធានសហព័ន្ធឧស្សាហកម្មថៃបាននិយាយថា ប្រទេសជាច្រើនត្រូវបានគេរំពឹងថា នឹងទទួលរងនឹងការខ្វះខាតស្បៀងអាហារ ដោយសារតែប្រទេសមួយចំនួនដែលជាអ្នកនាំចេញស្បៀងអាហារដូចជា ឥណ្ឌា ស៊ែប៊ី កាហ្សាក់ស្ថាន កូសូវ៉ូ និង អេហ្ស៊ីប បានរឹតបន្តឹងការនាំចេញស្បៀងអាហាររបស់ពួកគេ រួមទាំងស្រូវសាលីផងដែរ។ ប្រធានសហព័ន្ធឧស្សាហកម្មថៃរូបនេះបានបន្តថា ការសម្រេចចិត្តស្តុកទុកស្បៀងពីនៅក្នុងប្រទេសនីមួយៗ គឺត្រូវតែធ្វើដោយជៀសមិនរួច បន្ទាប់ពីទិន្នផលដំណាំធ្លាក់ចុះ ដែលជាលទ្ធផលនៃកង្វះខាតជី និង ចំណីសត្វចំពេលសង្គ្រាមរុស្ស៊ី-អ៊ុយក្រែនកំពុងបន្ត ដែលធ្វើឲ្យរំខានដល់ខ្សែចង្វាក់ផ្គត់ផ្គង់សំខាន់ៗ។
លោក Kriengkrai បានថ្លែងថា រុស្ស៊ី និងអ៊ុយក្រែន គឺជាប្រទេសដែលស្ថិតក្នុងចំណោមប្រទេសនាំចេញទំនិញធំជាងគេសម្រាប់ផ្គត់ផ្គង់ទីផ្សារសកល។
គួររំឭកថា ប្រទេសរុស្ស៊ី គឺជាប្រទេសដែលមានចំណែកនាំចេញ ថាមពល ក៏ដូចជាអ្នកផលិតស្រូវសាលី និង ពោតដ៏សំខាន់ ខណៈដែលអ៊ុយក្រែនជាអ្នកនាំចេញស្រូវសាលី និង ប្រេងផ្កាឈូករ័ត្នដ៏ច្រើនលើសលុបសម្រាប់តម្រូវការពិភពលោកផងដែរ។ នៅពេលដែលមានសង្គ្រាមរុស្ស៊ីឈ្លានពានអ៊ុយក្រែន បានកើតមានឡើងចាប់តាំងពីចុងខែកុម្ភៈមក វិបត្តិស្បៀងអាហារ និង ការកើនឡើងតម្លៃថាមពលពិភពលោកបានកើតមានឡើង ធ្វើឱ្យប៉ះពាល់ដល់ខ្សែចង្វាក់ផ្គត់ផ្គង់សកលយ៉ាងធ្ងន់ធ្ងរ។
អត្ថបទគួរអាន
យ៉ាងណាមិញ សហព័ន្ធឧស្សាហកម្មថៃ ជឿជាក់ថា ឧស្សាហកម្មស្បៀងអាហារថៃនឹងទទួលបានអត្ថប្រយោជន៍ពីស្ថានភាពនេះ ដោយសារការបញ្ជាទិញកើនឡើង ចំពេលមានការព្រួយបារម្ភកាន់តែខ្លាំងជុំវិញបញ្ហាកង្វះខាតស្បៀងអាហារសកល។
លោក Kriengkrai ប្រធានសហព័ន្ធឧស្សាហកម្មថៃ បានមានប្រសាសន៍ថា រោងចក្រអាហារថៃបានរៀបចំវត្ថុធាតុដើមសម្រាប់កែច្នៃម្ហូបអាហារ ដើម្បីបំពេញតម្រូវការកើនឡើងនៅក្នុងទីផ្សារអាហារពិភពលោកដែលរងផលប៉ះពាល់ដោយសង្គ្រាម។ លោកបានបន្តថា លោកមិនមានការព្រួយបារម្ភខ្លាំងអំពីកង្វះខាតវត្ថុធាតុដើមនៅក្នុងប្រទេសថៃនោះទេ ដោយសារតែប្រទេសនេះសម្បូរដោយផលិតផលកសិកម្ម។
ថ្វីបើបែបនេះក្តី លោក Kriengkrai បានមានប្រសាសន៍ថា សហព័ន្ធឧស្សាហកម្មថៃ កំពុងតាមដានការកើនឡើងតម្លៃប្រេងពិភពលោក ដែលអាចបណ្តាលឱ្យមានការកើនឡើងនូវអត្រាអតិផរណាបន្ថែមទៀត។ ក្នុងនោះ ការកើនឡើងតម្លៃប្រេងពិភពលោកត្រូវបានគេមើលឃើញថា បានជំរុញឲ្យមានការកើនឡើងយ៉ាងឆាប់រហ័សនៃអតិផរណារបស់ប្រទេសថៃ។
គួរជម្រាបថា ការិយាល័យគោលនយោបាយ និង យុទ្ធសាស្ត្រពាណិជ្ជកម្មថៃ បានរាយការណ៍ពីអតិផរណានៅក្នុងខែឧសភាឈានដល់ ៧,១% គឺជាកម្រិតខ្ពស់បំផុត បើធៀបក្នុងរយៈពេល ១៣ ឆ្នាំមកនេះ។
សហព័ន្ធឧស្សាហកម្មថៃ បាននិយាយថា សន្ទស្សន៍ផ្នែកឧស្សាហកម្មថៃបានធ្លាក់ចុះដល់កម្រិតទាបបំផុតក្នុងខែឧសភា ចំពេលមានភាពមិនច្បាស់លាស់ផ្នែកសេដ្ឋកិច្ចដោយសារការកើនឡើងអតិផរណារ និង បញ្ហាជម្លោះនយោបាយសកល៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
