ជាក់ស្ដែង តាំងពីដើមខែកុម្ភៈមក ពោលគឺបន្ទាប់ពីអាជ្ញាធរលុបចោលការធ្វើតេស្ដកូវីដ១៩លើអ្នកដំណើរបរទេស មុនពេលធ្វើដំណើរចូលប្រទេសថៃរួចមក គេសង្កេតឃើញថា ចំនួនភ្ញៀវទេសចរដែលបានចុះឈ្មោះធ្វើដំណើរមកកាន់ប្រទេសថៃ តាមរយៈកម្មវិធី Thailand Pass គឺបានកើនឡើងយ៉ាងគំហុកតែម្ដង។ នេះបើតាមការរាយការណ៍ដោយសារព័ត៌មានថៃបាងកកប៉ុស្ដិ៍។
អភិបាលនៃអាជ្ញាធរទេសចរណ៍ថៃ លោក យុទ្ធស័ក្ដិ សុផាសន បានលើកឡើងថា ទោះបីជាប្រទេសថៃ មានកត្តាប្រឈមដូចជា ទំនុកចិត្តក្នុងការធ្វើដំណើរថយចុះ, សេដ្ឋកិច្ចមិនសូវល្អ, វិបត្តិសង្ក្រាមនៅអ៊ុយក្រែន, បញ្ហាកង្វះខាតកម្លាំងពលកម្មនៅក្នុងវិស័យទេសចរណ៍, និងការប្រកួតប្រជែងដ៏ក្ដៅគគុកពីបណ្ដាប្រទេសគោលដៅទេសចរសំខាន់ៗជាច្រើនទៀតក្ដី ប៉ុន្ដែ ប្រទេសថៃនៅតែប្រកាន់ខ្ជាប់គោលដៅទទួលបានទេសចរអន្តរជាតិឲ្យបានក្នុងចន្លោះពី ៧ ទៅ១០លានាក់។ ជាក់ស្ដែង គិតតាំងពីដើមឆ្នាំរហូតដល់មកត្រឹមថ្ងៃទី ២៥ ខែមេសា ប្រទេសថៃទទួលបានអ្នកដំណើរបរទេសសរុបជាង៧១ម៉ឺននាក់។ ហើយគិតនៅក្នុងខែមេសាតែ១ប៉ុណ្ណោះ ចំនួនភ្ញៀវទេសចរអន្តរជាតិរំពឹងថា មានប្រមាណ៣០ម៉ឺននាក់។ កំណើននេះ គឺដោយសារតែរដ្ឋាភិបាល បានសម្រេចលុបចោលការតម្រូវឲ្យធ្វើតេស្ដកូវីដ១៩ ក្នុងរយៈពេល៧២ម៉ោងសម្រាប់អ្នកដំណើរពីក្រៅប្រទេស មុនពេលធ្វើដំណើរមកកាន់ប្រទេសថៃ ដោយការលុបចោលវិធានការនេះ គឺបានចាប់ផ្ដើមតាំងពីថ្ងៃទី១ ខែមេសាមកម្ល៉េះ។
អត្ថបទគួរអាន
លោក យុទ្ធស័ក្ដិ បាននិយាយថា ទីផ្សារគួរតែប្រមូលផ្ដុំនៅអំឡុងរដូវកាលដែលមានអ្នកធ្វើដំណើរច្រើននៅ៣ខែចុងក្រោយនៃឆ្នាំនេះ ហើយប្រទេសថៃរំពឹងថានឹងទទួលបានភ្ញៀវទេសចរបរទេសយ៉ាងហោចណាស់១លាននាក់ ក្នុងមួយខែ ចាប់ពីខែតុលាតទៅ។ បន្ថែមពីនេះ ការបន្ធូរបន្ថយលក្ខខណ្ឌលើការធ្វើដំណើរចូលប្រទេសថៃកាន់តែប្រសើរជាងមុនចាប់ពីថ្ងៃទី ១ ខែឧសភា ក៏ត្រូវបានគេមើលឃើញថា នឹងជួយទាក់ទាញភ្ញៀវទេសចរអន្តរជាតិកាន់តែច្រើនផងដែរ។
យ៉ាងណាមិញ សម្រាប់ទីផ្សាររយៈពេលវែងដូចជា ប្រទេសនៅមជ្ឈឹមបូព៌ា ជាពិសេសអារ៉ាប់ប៊ីសាអូឌីត រួមទាំងសហរដ្ឋអាមេរិក កាណាដា អាមេរិកឡាទីន និងបណ្ដាប្រទេសអឺរ៉ុប ក៏នៅតែស្ថិតក្នុងចំណោមទីផ្សារគោលដៅទេសចរណ៍សម្រាប់ថៃដែរ។
តាមរបាយការណ៍របស់ក្រុមប្រឹក្សាទេសចរណ៍ និងការធ្វើដំណើរពិភពលោក (WTTC) បានចេញផ្សាយនៅថ្ងៃទី ២១ មេសា បានឲ្យដឹងថា ឧស្សាហកម្មទេសចរណ៍ពិភពលោក ត្រូវបានរំពឹងថា នឹងវិលមករកកម្រិតដូចមុនពេលមិនទាន់មានកូវីដ១៩រាតត្បាតឡើងវិញ នៅឆ្នាំ២០២៣នេះ ដោយគេរំពឹងថា អត្រាកំណើននៅឆ្នាំ២០២៣ នឹងកើនលើសកំណើនពីឆ្នាំ២០២២ ដល់ទៅ ៥,៨% នៅគ្រាដែលកំណើនសេដ្ឋកិច្ចពិភពលោករំពឹងកើនឡើងត្រឹមតែ ២,៧%ប៉ុណ្ណោះ។ តាមរយៈកំណើនស្ទុះងើបឡើងវិញនៃឧស្សាហកម្មទេសចរណ៍នៅឆ្នាំក្រោយនេះ ត្រូវបានស្ថាប័នក្រុមប្រឹក្សាទេសចរណ៍ និងការធ្វើដំណើរពិភពលោកព្យាករទៀតថា នឹងអាចបង្កើតការងារថ្មីៗបានដល់១២៦លានកន្លែងផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
