លោកស្រី ណាន់ ធីកា ថ្នាក់ដឹកនាំជាន់ខ្ពស់នៃ នាយកដ្ឋានពាណិជ្ជកម្មថាមពល បានគូសបញ្ជាក់ថា ក្នុងរយៈពេល ១០ខែ ឆ្នាំ ២០២០នេះ ការប្រើប្រាស់ថាមពលប្រេងឥន្ធនៈនៅក្នុងប្រទេសថៃ បានធ្លាក់ចុះពី ១៥៧លានលីត្រក្នុងមួយថ្ងៃ មកនៅត្រឹម ១៣៧លានលីត្រក្នុងមួយថ្ងៃ ដែលថយចុះ ១៣% ធៀបនឹងពេលដូចគ្នាកាលពីឆ្នាំមុន។
លោកស្រី បន្តទៀតថា ការរឹតបន្តឹងលើការធ្វើដំណើរគ្រប់ប្រភេទ ទាំងផ្លូវអាកាស និងផ្លូវគោក នៅទូទាំងសកលលោក អំឡុងពេលនៃវិបត្តិកូវីដ-១៩នេះ គឺជាហេតុផលសំខាន់ ដែលធ្វើឲ្យមានការធ្លាក់ចុះនូវ តម្រូវការប្រើប្រាស់ថាមពលនេះ ហើយក្នុងនោះ ប្រទេសថៃ ក៏រងផលប៉ះពាល់ដូចគ្នាដែរ។
អត្ថបទទាក់ទង!
ចំពោះបញ្ហានេះ ប្រេងឥន្ធនៈសម្រាប់យន្តហោះ គឺធ្លាក់ចុះខ្លាំងជាងគេបំផុត ដល់ទៅ ៥៩% ដែលធ្លាក់ចុះការប្រើប្រាស់ពី ១៩លានលីត្រក្នុងមួយថ្ងៃ មកនៅត្រឹម ៧លានលីត្រក្នុងមួយថ្ងៃ។
ដោយឡែកអំឡុងពេល ១០ខែនេះ តម្រូវការប្រើប្រាស់សាំង ក៏មានការធ្លាក់ចុះ ២% ពី ៣២លានលីត្រ មកនៅត្រឹម ៣១លានលីត្រក្នុងមួយថ្ងៃ ហើយការប្រើប្រាស់ប្រេងម៉ាស៊ូត ធ្លាក់ចុះដូចគ្នារង្វង់ ៣%។
កាលពីដើមឆ្នាំ ២០២០នេះ នាយកដ្ឋានពាណិជ្ជកម្មថាមពល ក៏បានព្យាករដែរថា ការប្រើប្រាស់ប្រេងឥន្ធនៈ នៅក្នុងឆ្នាំនេះនឹងកើនឡើង ៣% ដែលដើរស្របគ្នាទៅនឹងកំណើន GDP របស់ប្រទេសថៃ តែយ៉ាងណា ធនាគារកណ្តាលថៃ បានធ្វើការព្យាករជាថ្មីកាលពីខែវិច្ឆិកាថា សេដ្ឋកិច្ចជាតិ អាចនឹងធ្លាក់ចុះ ៧% ក្នុងឆ្នាំ ២០២០នេះ។
គួរជម្រាបដែរថា ការធ្លាក់ចុះនូវ ការប្រើប្រាស់ប្រេងឥន្ធនៈរបស់ប្រទេសថៃ ធ្លាប់បានធ្លាក់ចុះម្តងប្រមាណ ០,៤% កាលពី ២៣ឆ្នាំមុន អំឡុងពេលវិបត្តិហិរញ្ញវត្ថុនៅក្នុងតំបន់អាស៊ាន ហើយការធា្លក់ចុះនាពេលនេះ គឺជាការធ្លាក់ចុះលើកទី ២ហើយ ក្រោយពីជួបប្រទះនឹងវិបត្តិធំៗ៕
None
