អ្នកវិទ្យាសាស្ត្រចិន រកឃើញបច្ចេកវិទ្យាអាចចម្រាញ់ប្រេងឥន្ធនៈចេញពីធ្យូងថ្ម

ប្រព័ន្ធផ្សព្វផ្សាយចិន បានរាយការណ៍ថា រោងចក្រប្រែក្លាយធ្យូងថ្មទៅជាសារធាតុរាវដ៏ធំបំផុតនៅលើពិភពលោក កំពុងបង្ហាញវត្តមានយ៉ាងស្កឹមស្កៃនៅក្នុងប្រទេសចិន ដោយមានសមត្ថភាពកែច្នៃធ្យូងថ្មទៅជាប្រេងឥន្ធនៈពិសេសសម្រាប់បម្រើឱ្យប្រតិបត្តិការគ្រាប់រ៉ុក្កែត ព្រមទាំងប្រេងរំអិលម៉ាស៊ីនកម្រិតខ្ពស់។ គម្រោងបច្ចេកវិទ្យាកែច្នៃដ៏ទំនើប ដែលត្រូវបានវិនិយោគ និងប្រតិបត្តិការដោយក្រុមហ៊ុន China Energy Group និង Ningxia Coal Industry នេះមានទីតាំងស្ថិតនៅក្នុងតំបន់ស្វយ័ត និនហ្សា ហួ នៅភាគពាយ័ព្យនៃប្រទេសចិន ដោយបានចាប់ផ្តើមបើកដំណើរការកាលពីខែមុន ហើយត្រូវបានរំពឹងថា នឹងមានសមត្ថភាពកែច្នៃធ្យូងថ្មរហូតដល់២៤លានតោនក្នុងមួយឆ្នាំ។
ក្រុមអ្នកវិភាគបានចាត់ទុកការរកឃើញបច្ចេកវិទ្យាថ្មីរបស់ចិននេះ គឺជាការបោះជំហានយុទ្ធសាស្ត្រដ៏សំខាន់បំផុតសម្រាប់សេដ្ឋកិច្ចចិន ស្របពេលដែលតម្រូវការប្រេងឥន្ធនៈក្នុងស្រុករហូតដល់៤០% កំពុងពឹងផ្អែកលើការនាំចូលពីតំបន់មជ្ឈិមបូព៌ា។
លោក ហ៊ី ប៉េង (He Peng) អ្នកគ្រប់គ្រងនៅក្រុមហ៊ុន Ningxia Coal Industry បានលើកឡើងថា បច្ចេកវិទ្យានេះ គឺជាសមិទ្ធផលដ៏មានតម្លៃបំផុតនៅក្នុងវិស័យវិស្វកម្មគីមីធ្យូងថ្មរបស់ចិន។ លោកបានបន្ថែមថា ដើម្បីទប់ទល់នឹងហានិភ័យ និងធានានិរន្តរភាពថាមពលជាតិ កម្មវិធីស្រាវជ្រាវ និងចម្រាញ់ប្រេងចេញពីធ្យូងថ្មនេះត្រូវបានផ្តើមសិក្សាយ៉ាងយកចិត្តទុកដាក់តាំងពីឆ្នាំ២០០៤ មកម្ល៉េះ៕