តើផលិតផលទេសចរណ៍ទាំង៤ ដែលថៃកំណត់យកធ្វើជាអាទិភាព ដើម្បីបង្កើនប្រាក់ចំណូលនៅឆ្នាំក្រោយមានអ្វីខ្លះ?

ដើម្បីទាក់ទាញភ្ញៀវទេសចរបរទេសឱ្យបានកាន់តែច្រើន និងបង្កើនចំណូលពីវិស័យនេះ អាជ្ញាធរទេសចរណ៍ថៃ បានកំណត់យកទីផ្សារគោលដៅទេសចរណ៍ពិសេសចំនួន៤ រួមមាន ទេសចរណ៍សុខុមាលភាព ទេសចរណ៍ប្រណីត ទេសចរណ៍កីឡា និងទេសចរណ៍ក្រេបទឹកឃ្មុំ សម្រាប់ឆ្នាំ២០២៥។

លោកស្រី ជីរ៉ាវ៉ាឌី ឃុនស៊ុប (Chiravadee Khunsub) អនុប្រធានអាជ្ញាធរទេសចរណ៍ថៃ ទទួលបន្ទុកផលិតផលទេសចរណ៍ និងធុរកិច្ចបានលើកឡើងថា ភ្ញៀវទេសចរកំពុងស្វែងរកបទពិសោធន៍ទេសចរណ៍ដ៏មានន័យ ពោរពេញដោយការចងចាំមិនអាចបំភ្លេចបាននៅក្នុងប្រទេសថៃ ហើយទីផ្សារគោលដៅទេសចរណ៍ពិសេសទាំង៤ ខាងលើនេះបានទាក់ទាញចំណាប់អារម្មណ៍របស់បណ្ដាក្រុមហ៊ុនប្រតិបត្តិករទេសចរណ៍ ដោយសារទីផ្សារគោលដៅទេសចរណ៍ពិសេសទាំងនេះមានការចំណាយខ្ពស់។

ដោយយោងលើទិន្នន័យរបស់ក្រុមហ៊ុនស្រាវជ្រាវទីផ្សារ និងប្រឹក្សាយោបល់ Allied Market Research លោកស្រី ជីរ៉ាវ៉ាឌី ឃុនស៊ុប បានគូសបញ្ជាក់ថា ទីផ្សារគោលដៅទេសចរណ៍ពិសេសទាំង៤នេះមានទំហំប្រមាណជិត៩២០លានដុល្លារអាម៉េរិក នៅទូទាំងពិភពលោកក្នុងឆ្នាំ២០១៩ ហើយត្រូវបានគេប៉ាន់ប្រមាណថា នឹងឈានដល់១១,៥ពាន់លានដុល្លារអាម៉េរិក នៅត្រឹមឆ្នាំ២០២៧។

សូមបញ្ជាក់ថា ទេសចរណ៍ប្រណីតនៅក្នុងប្រទេសថៃ រកចំណូលបានសរុបជាង២ពាន់លានដុល្លារអាម៉េរិក ក្នុងឆ្នាំ២០២៣ ហើយត្រូវបានព្យាករថា ទេសចរណ៍ប្រណីតនេះនឹងសម្រេចបានកំណើនពី៨% ទៅ១០% ក្នុងមួយឆ្នាំៗ។

នៅក្នុងរយៈពេល៩ខែ​ ឆ្នាំ២០២៤ នេះ ភ្ញៀវទេសចរនៅក្នុងទីផ្សារគោលដៅទេសចរណ៍ពិសេសទាំង៤នេះ បានសម្រុកទៅលេងគោលដៅទេសចរណ៍សំខាន់ៗចំនួន៥ រួមមាន បាងកក ភូកេត ប៉ាត់តាយ៉ា ក្រាប៊ី និងសាមួយ ដោយពួកគេចំណាយជាមធ្យម២,៣០០ដុល្លារអាម៉េរិក ក្នុងដំណើរទេសចរណ៍មួយលើក ឬចំណាយជាមធ្យម១៨០ដុល្លារអាម៉េរិក ក្នុងមួយថ្ងៃ៕

ដោយ: តែម សុខុម