ថៃ កំពុងភ័យខ្លួនក្រោយចិន ព្រមានឱ្យប្រុងប្រយ័ត្នចំពោះការប្រើពាក្យ ចិនប្រផេះ ឬជនល្មើសច្បាប់លាបពណ៌លើពលរដ្ឋខ្លួន

លោក ស៊ូរ៉ាសាក់ ផាន់ឆារឿន វូរ៉ាគុល (Surasak Phancharoenworakul) រដ្ឋមន្ត្រីក្រសួងទេសចរណ៍ និងកីឡាថៃ បានអះអាងថា ឯកអគ្គរដ្ឋទូតចិន ប្រចាំក្រុងបាងកក ​បាន​លើកឡើងពីការព្រួយបារម្ភអំពីការលាបពណ៌ជនជាតិចិនថា ជាជនល្មើសច្បាប់​​ និងបានជំរុញឱ្យថៃចៀសវាងការប្រើពាក្យ Grey Chinese ឬចិនប្រផេះ ដែលអាចប៉ះពាល់ដល់កិត្តិយសជនជាតិចិន។ ឯកអគ្គរដ្ឋទូតចិន បានសង្កត់ធ្ងន់ថា ប្រសិនបើមានភ្ញៀវទេសចរចិនណាបំពានច្បាប់ អាជ្ញាធរថៃ អាចចាត់ការតាមផ្លូវច្បាប់បាន ប៉ុន្តែមិនគួរប្រើពាក្យ Grey Chinese លាបពណ៌ជនជាតិចិនទូទៅថា ជាជនល្មើសច្បាប់​​នោះឡើយ ព្រោះវាអាចប៉ះពាល់ដល់ទំនាក់ទំនងរវាងប្រទេសទាំងពីរ។

ទោះជាយ៉ាងណាឯកអគ្គរដ្ឋទូតចិន បានទទួលស្គាល់ថា មានបុគ្គលជនជាតិចិនមួយចំនួនប្រព្រឹត្តខុសច្បាប់ ប៉ុន្តែភ្ញៀវទេសចរចិនភាគច្រើនធ្វើដំណើរមកប្រទេសថៃ ដោយស្របច្បាប់ និងបានរួមចំណែកយ៉ាងសំខាន់ក្នុងការជួយគាំទ្រសេដ្ឋកិច្ចថៃ។ នេះបើតាមការលើកឡើងរបស់រដ្ឋមន្ត្រីក្រសួងទេសចរណ៍ថៃ ដែលបានបន្ថែមថា ថៃនឹងបន្តអនុវត្តច្បាប់យ៉ាងម៉ឺងម៉ាត់ដោយមិនយោគយល់ជាតិសាសន៍​ណាមួយឡើយ ពោលគឺជនណាបំពានច្បាប់ នឹងត្រូវទទួលខុសត្រូវតាមផ្លូវច្បាប់។

បន្ថែមលើនេះ រដ្ឋមន្ត្រីទេសចរណ៍ថៃ ក៏បានលើកឡើងពីករណីអាជីវកម្មដឹកជញ្ជូន និងសេវាកម្មមួយចំនួន ដែលគ្រប់គ្រងដោយជនជាតិចិន តែបម្រើការសម្រាប់តែអតិថិជនចិនដូចគ្នា ដែលសកម្មភាពនេះអាចនឹងខុសច្បាប់ថៃ។ លោកបានសង្កត់ធ្ងន់ថា ដើម្បីដោះស្រាយបញ្ហាស្មុគស្មាញនេះឱ្យមានប្រសិទ្ធភាព និងមិនឱ្យប៉ះពាល់ដល់សាច់ញាតិការទូត គឺត្រូវការកិច្ចសហការគ្នាយ៉ាងជិតស្និទ្ធរវាងស្ថាប័នគន្លឹះៗរបស់ថៃ រួមមានក្រសួងពាណិជ្ជកម្ម និងក្រសួងដឹកជញ្ជូនផងដែរ៕

ដោយ: តែម សុខុម