នេះបើតាមការចេញផ្សាយរបស់កាសែត Bangkok Post នៅថ្ងៃពុធនេះ។
តាមធម្មតា តួនាទីជានាយករដ្ឋមន្ត្រីស្តីទីនៅប្រទេសថៃ គឺគ្មានសិទ្ធិអំណាចមើលការខុសត្រូវលើការតែងតាំងមន្ត្រីជាន់ខ្ពស់ និងធ្វើការសម្រេចចិត្តពីការចំណាយថវិកាជាតិសំខាន់ៗទាំងនេះទេ ព្រោះសិទ្ធិទាំង២នេះ គឺត្រូវឆ្លងកាត់ការពិភាក្សាជាមួយនាយករដ្ឋមន្ត្រីជាមុនសិន។
ប៉ុន្តែឥឡូវនេះ គឺថាលោកឧត្តមសេនីយ៍ ប្រាយុទ្ធ ចាន់អូចា ត្រូវបានតុលាការធម្មនុញ្ញបញ្ជាឱ្យផ្អាកតួនាទីរបស់លោកទៅហើយក្នុងពេលតុលាការកំពុងពិចារណាពីអាណត្តិរយៈពេល ៨ ឆ្នាំរបស់លោក ដូច្នេះហើយលោកឧត្តមសេនីយ៍ ប្រាវីត មិនចាំបាច់ធ្វើការពិគ្រោះយោបល់ជាមួយឧត្តមសេនីយ៍លោក ប្រាយុទ្ធ នោះទេ ខណៈបច្ចុប្បន្នលោកប្រាយុទ្ធ មិនអាចបំពេញតួនាទីជានាយករដ្ឋមន្ត្រីបាននោះដែរ។ នេះបើតាមឧបនាយករដ្ឋមន្ត្រីលោក Wissanu Krea-ngam ។
អ្នកជំនាញផ្នែកច្បាប់របស់រដ្ឋាភិបាលបាននិយាយថា គណៈរដ្ឋមន្ត្រីកាលពីថ្ងៃម្សិលមិញបានសម្រេចចិត្តអនុម័តដំណោះស្រាយថ្មីមួយដោយផ្ដល់សិទ្ធិអំណាចឱ្យលោក Prawit អាចធ្វើការតែងតាំងមន្ត្រី និងធ្វើការសម្រេចចិត្តអំពីថវិកា បន្ថែមពីលើអំណាចជានាយករដ្ឋមន្ត្រីផ្សេងទៀត។
អត្ថបទគួរអាន
លោកឧត្តមសេនីយ៍ Prawit បានធ្វើជាប្រធានកិច្ចប្រជុំគណៈរដ្ឋមន្ត្រីប្រចាំសប្តាហ៍កាលពីអង្គារក្នុងនាមជានាយករដ្ឋមន្ត្រីស្តីទីជាលើកដំបូងចាប់តាំងពីលោកឧត្តមសេនីយ៍ Prayut ត្រូវបានព្យួរតំណែងរបស់លោកកាលពីថ្ងៃទី២៤ សីហាមក ហើយអំណាចបន្ថែមរបស់ឧត្តមសេនីយ៍ Prawit ក៏បានចាប់ផ្ដើមឡើងមកតាំងពីពេលនោះមក។
ការសម្រេចរបស់គណៈរដ្ឋមន្ត្រីថៃនេះ ក៏បានគូសបញ្ជាក់ពីខ្សែបន្ទាត់នៃការបន្តតំណែងនៅក្នុងចំណោមឧបនាយករដ្ឋមន្ត្រីជាច្រើនរូបផងដែរ។ ប្រសិនបើលោកឧត្តមសេនីយ Prawit ដែលជាឧបនាយករដ្ឋមន្ត្រីជាន់ខ្ពស់បំផុតនេះ មិនអាចបំពេញតួនាទីជានាយករដ្ឋមន្ត្រីដោយហេតុផលណាមួយនោះ លោកនឹងត្រូវបន្តដោយលោក Wissanu បន្ទាប់មកត្រូវតែងតាំងលោក Anutin Charnvirakul ឬក៏ឧបនាយករដ្ឋមន្ត្រីផ្សេងៗទៀតតាមឋានន្តរៈស័ក្តិជាបន្តបន្ទាប់។
លោកឧត្តមសេនីយ៍ Prawit បានទទូចសុំមិនឱ្យធ្វើការរុះរើគណៈរដ្ឋមន្ត្រីតាមបក្សពួករបស់ខ្លួននោះទេ ដោយលោកបានសង្កត់ធ្ងន់ថា ហេតុអ្វីចាំបាច់ត្រូវធ្វើការផ្លាស់ប្តូរអ្វីមួយទាំងដែលអ្វីនោះនៅអាចដំណើរការបានល្អនៅឡើយនោះ?
ទន្ទឹមនឹងនោះដែរ គណបក្សប្រឆាំងបានយល់ស្របមិនឱ្យធ្វើការរំលាយសភានោះទេ ដរាបណាច្បាប់សំខាន់ៗមួយចំនួនស្ដីពីការរៀបចំការបោះឆ្នោតមិនទាន់ត្រូវបានអនុម័តទេនោះ ហើយគណបក្សនេះបានព្យាករពីភាពវឹកវរ ប្រសិនបើការរំលាយសភានឹងកើតឡើងឆាប់ៗនេះមែន។
បក្សប្រឆាំងជឿថាលោកឧត្តមសេនីយ ប្រាយុទ្ធ បានបញ្ចប់អាណត្តិអតិបរមា ៨ ឆ្នាំរបស់លោកកាលពីថ្ងៃទី២៤ ខែសីហាដូចដែលបានកំណត់ដោយរដ្ឋធម្មនុញ្ញ។ ទោះជាយ៉ាងណាក៏ដោយ អ្នកផ្សេងទៀតបានអះអាងថាលោកនៅតែមានពេល២ ឬប្រាំឆ្នាំទៀតដើម្បីបន្តតំណែងនេះដោយអាស្រ័យលើការបកស្រាយពីច្បាប់រដ្ឋធម្មនុញ្ញតែប៉ុណ្ណោះ៕
