កញ្ចប់ថវិកានេះ កំពុងត្រូវបានពិនិត្យ និងពិភាក្សានៅក្នុងសភាថៃ ហើយវាមានច្រើនជាងកញ្ចប់ថវិកាចំណាយនៅឆ្នាំ២០២២ប្រហែជិត៣% ហើយបើធៀបនឹងទំហំផលិតផលក្នុងស្រុកសរុប (GDP) របស់ប្រទេសថៃ កញ្ចប់ថវិកាចំណាយឆ្នាំ២០២៣ គឺមានប្រហែលជិត៤% ។
ប្រទេសថៃ គឺជាប្រទេសដែលមានសេដ្ឋកិច្ចធំទីពីរនៅតំបន់អាស៊ីអាគ្នេយ៍ ហើយអ្នករៀបចំផែនការថវិកានេះ បានសន្មត់ថា កញ្ចប់ថវិកាដែលស្នើឡើងនេះ អាចជួយដោយបង្កើននូវតម្រូវការក្នុងស្រុក និងជួយឲ្យមានការងើបឡើងវិញនៃវិស័យទេសចរណ៍ ក្រោយវិបត្តិកូវីដ១៩។
នាយករដ្ឋមន្ត្រីថៃ លោក ប្រាយុទ្ធ ចាន់អូចា (Prayuth Chan-ocha) បានប្រាប់ទៅកាន់សភាអំពីកញ្ចប់ថវិកាចំណាយនេះថា ក្រោមកាលៈទេសៈបែបនេះ រដ្ឋាភិបាលត្រូវអនុវត្ត និងពង្រីកផងដែរនូវគោលនយោបាយសារពើពន្ធ ដើម្បីគាំទ្រដល់ការងើបឡើងវិញនៃសេដ្ឋកិច្ចជាតិ" ។
អត្ថបទគួរអាន
លោកបានបន្ថែមថានៅក្នុងឆ្នាំ ២០២៣ ខាងមុខ ប្រាក់ចំណូលដែលបានមកពីសារពើពន្ធ ត្រូវបានគេរំពឹងថា នឹងប្រសើរឡើងជាបណ្តើរៗ នៅពេលដែលសេដ្ឋកិច្ចមានសម្ទុះឡើងវិញ ក្រោយពីការធូរស្បើយនៃការឆ្លងនៃកូវីដ១៩។
គួររំលឹកថា កញ្ចប់ថវិកាដែលស្នើដោយលោក ប្រាយុទ្ធនេះ គឺមានសារៈសំខាន់ណាស់សម្រាប់បន្តតំណែងនាយករដ្ឋមន្ត្រីរបស់លោក ពីព្រោះបើមានការបរាជ័យក្នុងការការផ្ទៀងផ្ទាត់នៃសេចក្តីព្រាងជាលើកដំបូងនេះ អាចបង្ខំឱ្យគាត់លាលែងពីតំណែង ឬរំលាយសភាតែម្តង។
ប្រសិនបើសភាអនុម័ត នោះកញ្ចប់ថវិកាចំណាយនេះ នឹងតម្រូវឱ្យផ្ចៀងផ្ទាត់ពីរដងទៀតក្នុងខែសីហា មុនពេលបញ្ជូនទៅព្រឹទ្ធសភា និងព្រះមហាក្សត្រ ដើម្បីឡាយព្រះហស្ថលេខាដាក់ឲ្យអនុវត្ត។
បើទោះបីជាបែបនេះក្តី លោក ភីតា លីមចារួនរាត (Pita Limjaroenrat) មេដឹកនាំគណបក្សប្រឆាំងមួយបាននិយាយថា គណបក្សរបស់លោកមិនអាចយល់ព្រមអនុម័តសំណើកញ្ចប់ថវិកាចំណាយនេះបានទេ ដោយសារវាមិនទាន់មានភាពជាក់លាក់ ក្នុងការជួយដល់ការស្តារសេដ្ឋកិច្ចឡើងវិញ បន្ទាប់ពីជំងឺរាតត្បាត Covid-19 ។ លោកបន្ថែមថា រដ្ឋាភិបាលគួរតែរៀបចំផែនការថវិការបស់ខ្លួនឱ្យកាន់តែប្រសើរឡើងជាងនេះ ដើម្បីនាំមកនូវការងើបឡើងវិញនៃសេដ្ឋកិច្ចរបស់ប្រទេស និងបង្កើនក្តីសង្ឃឹមរបស់សាធារណជន៕
អត្ថបទ៖ ហ៊ុន គន្ធថៃ
None
