កាលពីថ្ងៃពុធតុលាការធម្មនុញ្ញថៃបានព្យួរតំណែងលោកប្រាយុទ្ធ ចាន់អូរចារ នាយករដ្ឋមន្ត្រីថៃ ជាបណ្ដោះអាសន្ន ខណៈដែលតុលាការកំពុងពិចារណាថា តើលោកប្រាយុទ្ធ បានរំលោភលើការកំណត់អណត្តិរយៈពេល ៨ ឆ្នាំ សម្រាប់តួនាទីជានាយករដ្ឋមន្រ្តី ដែលបានកំណត់នៅក្នុងរដ្ឋធម្មនុញ្ញឆ្នាំ២០១៧ មែនឬយ៉ាងណា រាប់ចាប់តាំងពីលោកឧត្តមសេនីយ៍ ប្រាយុទ្ធ បានក្លាយជានាយករដ្ឋមន្ត្រីនៅខែសីហា ឆ្នាំ២០១៤មកនោះ។
តុលាការបានទុកពេលឱ្យលោក ប្រាយុទ្ធ រយៈពេល ១៥ ថ្ងៃដើម្បីឆ្លើយតប ឬក៏តវ៉ាពីការព្យួរតំណែងរបស់លោក ហើយឧបនាយករដ្ឋមន្ត្រីលោក ប្រាវីដ វ៉ុងស៊ូវ៉ុន Prawit Wongsuwon នឹងត្រូវឡើងជានាយករដ្ឋមន្ត្រីស្ដីទី ជំនួសឲ្យលោក Prayut ចាន់អូរចារដែលត្រូវបាត់ពីមុខតំណែង។ នេះបើយោងតាមអ្នកនាំពាក្យរដ្ឋាភិបាលថៃ លោក អានុចា ប៊ូរ៉ាប៉ាឆៃស្រ៊ី Anucha Burapachaisri បានឱ្យដឹងនៅថ្ងៃទី ២៥ ខែសីហានេះ។
ការព្យួរតំណែងរបស់លោក Prayut នេះត្រូវបានគេរំពឹងថា នឹងមានរយៈពេលប្រហែល១ខែ ខណៈដែល តុលាការធម្មនុញ្ញថៃ កំពុងពិចារណាពីការប្រកាសសាលក្រមដំបូងរបស់ខ្លួនពាក់ព័ន្ធនឹងករណីនេះ។
ការព្យួរតំណែងរបស់នាយករដ្ឋមន្ត្រីនេះដែរ វាបានធ្វើឲ្យក្រុមអ្នកដឹកនាំធុរកិច្ច និងវិនិយោគិនមួយចំនួនក្នុងប្រទេសថៃរំពឹងថា វានឹងមានផលប៉ះពាល់តិច ឬច្រើនជាក់ជាមិនខានឡើយ ទៅលើកិច្ចការរដ្ឋបាលនៃរដ្ឋាភិបាល និងកិច្ចខិតខំប្រឹងប្រែងរបស់រដ្ឋាភិបាលថៃក្នុងការជំរុញបង្កើនសេដ្ឋកិច្ចដែលកំពុងតែផុយស្រួយរបស់ប្រទេសថៃ។
លោក សាណាន អានហ្គួបុលគុល Sanan Angubolkul ប្រធានសភាពាណិជ្ជកម្មថៃបាននិយាយថា ទោះបីជានាយករដ្ឋមន្ត្រីត្រូវបានព្យួរពីតំណែងរហូតដល់ករណីនេះត្រូវសម្រេចចុងក្រោយក៏ដោយ ប៉ុន្តែកិច្ចប្រជុំរបស់គណៈរដ្ឋមន្ត្រី និងរដ្ឋបាលដែលកំពុងកាន់អំណាចនៅតែមិនរងផលប៉ះពាល់នោះទេ ប៉ុន្តែលោកក៏បានទទួលស្គាល់ដែរថា ការព្យួរតំណែងនេះ អាចជំរុញឱ្យក្រុមវិនិយោគិនមួយចំនួនពិចារណាពីការសម្រេចចិត្តដាក់ការវិនិយោគរបស់ពួកគេ។
អត្ថបទគួរអាន
ទោះយ៉ាងណាក៏ដោយចុះ លោក Sanan បានបញ្ជាក់ថា បើទោះបីជា មានអ្វីកើតឡើងចំពោះការព្យួរតំណែងនាយករដ្ឋមន្ត្រីក៏ដោយ ក៏វិស័យពាណិជ្ជកម្មថៃនៅតែមានចក្ខុវិស័យល្អដដែលគឺថាសេដ្ឋកិច្ចថៃអាចគ្រប់គ្រងបាននៅក្នុងកំណើនចន្លោះពីជាង ២,៧% ទៅ ៣,៥% ដូចទៅនឹងការព្យាករទុកអ៊ីចឹង។
ដោយឡែក លោកឆៃចាន់ ឆារឿនស៊ុក Chaichan Charoensuk ប្រធានក្រុមប្រឹក្សា ក្រុមហ៊ុនដឹកជញ្ជូនជាតិថៃ បាននិយាយថា ក្នុងរយៈពេលខ្លីនៃការផ្អាកតំណែងនាយករដ្ឋមន្ត្រីនេះ ទំនងជាមិនប៉ះពាល់ដល់ផែនការសេដ្ឋកិច្ចជាតិនោះទេ ជាពិសេសសម្រាប់វិស័យនាំចេញតែម្ដង ដោយសារការបញ្ជាទិញជាធម្មតាត្រូវបានធ្វើមុននេះរួចអស់ទៅហើយ។
ចំណែកឯ លោក ចំណាន ស្រ៊ីសាវ៉ាត Chamnan Srisawat ប្រធានក្រុមប្រឹក្សាទេសចរណ៍នៃប្រទេសថៃ (TCT) បានអះអាងដែរថា ឧស្សាហកម្មទេសចរណ៍ឯណេះនេះវិញ គឺត្រូវរង់ចាំមើលលទ្ធផលសាលក្រមចុងក្រោយរបស់តុលាការ ដែលគេរំពឹងថានឹងប្រកាសនៅខែក្រោយនេះជាមុនសិន ទើបពួកគេអាចវិនិច្ឆ័យពីផលប៉ះពាល់នៃការព្យួរតំណែងនេះបាន។ ទោះយ៉ាងណា លោកបានបន្ថែមថា ស្ថានភាពនេះអាចប៉ះពាល់ខ្លះដល់អារម្មណ៍ភ្ញៀវទេសចរ ខណៈដែលដៃគូពាណិជ្ជកម្ម និងទេសចរណ៍អន្តរជាតិកំពុងតាមដានយ៉ាងដិតដល់នូវស្ថានភាពនេះ ជាពិសេសទាក់ទងនឹងសន្តិសុខផ្ទាល់តែម្ដង៕
