ថៃ កំពុងខិតខំបង្កើនការទាក់ទាញភ្ញៀវទេសចរ ក្រោយភ្ញៀវទេសចរចិន ធ្លាក់ចុះខ្លាំង

ទិន្នន័យរបស់ក្រសួងទេសចរណ៍ និងកីឡារបស់ថៃ ដែលបានចេញផ្សាយកាលពីសប្តាហ៍មុនបានបង្ហាញថា ថៃ ដែលមានសេដ្ឋកិច្ចធំបំផុតលំដាប់ទី២ នៅតំបន់អាស៊ាន ទទួលបានភ្ញៀវទេសចរចិន ប្រមាណជិត២លាននាក់ នៅក្នុងរយៈពេល៥ខែ ឆ្នាំ២០២៥ មានការធ្លាក់ចុះ៣៣% បើធៀបនឹងរយៈពេលដូចគ្នាកាលពីឆ្នាំមុន។ ការធ្លាក់ចុះចំនួនភ្ញៀវទេសចរចិននេះ បានទាញទម្លាក់ចំនួនភ្ញៀវទេសចរអន្តរជាតិ សរុបរបស់ប្រទេសនេះ ឱ្យធ្លាក់៣% មកនៅត្រឹមជាង១៤លាននាក់ នៅក្នុងរយៈពេលដូចគ្នានេះ។

ប្រទេសចិន ជាប្រភពភ្ញៀវទេសចរធំបំផុតរបស់ប្រទេសថៃ ក្នុងឆ្នាំ២០២៤ ដោយក្នុងចំណោមភ្ញៀវទេសចរបរទេសជាង៣៥លាននាក់ ដែលបានមកកម្សាន្តនៅប្រទេសនេះនៅក្នុងឆ្នាំនោះ មានភ្ញៀវទេសចរជិត៧លាននាក់ មកពីប្រទេសចិន។ ប៉ុន្តែក្រោយមានការបាត់ខ្លួនតារាសម្ដែងចិនម្នាក់នៅដើមឆ្នាំនេះ បានធ្វើឱ្យភ្ញៀវទេសចរចិន ហាក់លែងសូវចាប់អារម្មណ៍ចំពោះគោលដៅទេសចរណ៍នៅក្នុងប្រទេសនេះ។

តែយ៉ាងណាក្រុមអ្នកវិភាគបានវាយតម្លៃថា ការធ្លាក់ចុះវិស័យទេសចរណ៍របស់ប្រទេសថៃនេះ អាចបណ្តាលមកពីភាពមិនច្បាស់លាស់នៃសេដ្ឋកិច្ចពិភពលោក ដែលរារាំងប្រជាជនមិនឱ្យចំណាយប្រាក់ច្រើនសម្រាប់រដូវកាលវិស្សមកាល។ ការព្រួយបារម្ភរបស់ភ្ញៀវទេសចរអំពីសុវត្ថិភាពនៅក្នុងប្រទេសថៃ បន្ទាប់ពីការរញ្ជួយដី ដែលបណ្ដាលឱ្យដួលរលំអគារកម្ពស់៣០ជាន់មួយកន្លែងក្នុងទីក្រុងបាងកក ក៏ជាកត្តារួមចំណែកមួយផងដែរ៕

ដោយ៖ សុខ មង្គល