រដ្ឋមន្ត្រីដឹកជញ្ជូនថៃ លោក សូរិយា ជុងរុនរឿនគិត (Suriya Jungrungreangkit) បាននិយាយកាលពីថ្ងៃចន្ទ ថា ក្រសួងនឹងផ្តល់អាទិភាពដល់ការវិនិយោគលើប្រព័ន្ធដឹកជញ្ជូនផ្លូវដែក ដើម្បីកែលម្អ សេវាកម្មដឹកជញ្ជូនអ្នកដំណើរ និងទំនិញនៅលើបណ្តាញផ្លូវដែកទាំង៧ខ្សែនៅក្នុងប្រទេស ដែលមានប្រវែងសរុបជិត១ពាន់៥រយគីឡូម៉ែត្រ។
បើតាមការអះអាងរបស់រដ្ឋមន្ត្រីរូបនេះ គណៈរដ្ឋមន្ត្រីថៃ បានអនុម័តរួចហើយក្នុងការធ្វើទំនើបកម្មផ្លូវដែកនៅលើកំណត់ផ្លូវខុនកែន-ណងខៃ ដែលមានតម្លៃជាង៨៤០លានដុល្លារ។ គម្រោងនេះ នឹងចាប់ផ្តើមនៅឆ្នាំក្រោយ ហើយត្រូវបានគេរំពឹងថា នឹងបញ្ចប់នៅឆ្នាំ២០២៨។ ដោយឡែកគម្រោងធ្វើបច្ចុប្បន្នភាព និងទំនើបកម្មនៅលើផ្លូវដែក៦ខែ្សរទៀត គឺក្រសួងបានអនុម័តជាបឋម ដោយរង់ចាំការវាយតម្លៃពីក្រសួងហិរញ្ញវត្ថុ និងក្រុមប្រឹក្សាអភិវឌ្ឍន៍សេដ្ឋកិច្ច និងសង្គមថៃ ជាមុនសិន។
លោកបានបន្តថា ការសម្រេចចិត្តត្រូវបានគេរំពឹងទុកថា នឹងអាចសម្រេចបាននៅចុងឆ្នាំនេះ ហើយបន្ទាប់ពីទទួលបានភ្លើងខៀវហើយនោះ ក្រសួងនឹងស្វែងរកការអនុម័តចុងក្រោយពីគណៈរដ្ឋមន្ត្រី មុនបន្តដំណើរទៅរកការដេញថ្លៃ។
លោកបណ្ឌិត ចាយ៉ាតាន ព្រំសន (Chayatan Phromsorn) អគ្គលេខាធិការអចិន្ត្រៃយ៍នៃក្រសួងដឹកជញ្ជូន បានសង្កត់ធ្ងន់ថា ការធ្វើទំនើបផ្លូវដែក គឺមានសារសំខាន់ណាស់សម្រាប់ការបង្កើនប្រសិទ្ធភាពប្រតិបត្តិការ និងសុវត្ថិភាពនៅក្នុងហេដ្ឋារចនាសម្ព័ន្ធផ្លូវដែកថៃ។
មកដល់ពេលនេះថៃ មានផ្លូវដែកដែលមានប្រវែងសរុបប្រមាណជិត៥ពាន់គីឡូម៉ែត្រភ្ជាប់ទីក្រុងបាងកកទៅកាន់ខេត្តនានាជាច្រើន។ ការដឹកជញ្ជូនតាមផ្លូវដែករបស់ថៃ កំពុងដើរតួនាទីយ៉ាងសំខាន់សម្រាប់ការតភ្ជាប់ការធ្វើដំណើរ និងការដឹកជញ្ជូនទំនិញនៅក្នុងស្រុក និងក្រៅប្រទេស ជាពិសេសគឺកំណាត់ផ្លូវដែក ថៃ-ឡាវ-ចិន និងថៃ-ម៉ាឡេស៊ី៕
ដោយៈ សរ សុជាតិ
