ដំណឹងល្អសម្រាប់កសិករខ្មែរ! រោងចក្រផលិតជីធម្មជាតិតម្លៃ១០លានដុល្លាររបស់អ្នកឧកញ៉ា ម៉ុង ឬទ្ធី ជិតដាក់ឱ្យដំណើរការហើយ
ថ្លៃដើមនៃការបង្កបង្កើនផល ជាពិសេសតម្លៃជីកសិកម្ម គឺជាកង្វល់ដ៏ធំមួយរបស់ប្រជាកសិករនាពេលបច្ចុប្បន្ន និងទៅអនាគត។ រោងចក្រផលិតជីធម្មជាតិដ៏ធំមួយរ…
ការដាក់ឱ្យដំណើរការប្រព័ន្ធទូទាត់ថ្មី ដែលមានឈ្មោះថា mBridge ដែលគាំទ្រដោយប្រទេសជាច្រើននេះ គឺដើម្បីប្រជែងនឹងប្រព័ន្ធទូទាត់អន្តរជាតិ ដូចជា ប្រព័ន្ធ SWIFT ជាដើម ដែលត្រួតត្រាដោយប្រាក់ដុល្លារអាម៉េរិក។ នេះបើយោងតាមការចុះផ្សាយរបស់សារព័ត៌មាន Financial Times។
ប្រព័ន្ធទូទាត់ថ្មីនេះត្រូវបានគាំទ្រដោយធនាគារកណ្តាលនៃប្រទេសចិន ហុងកុង ថៃ អេមីរ៉ាតអារ៉ាប់រួម និងអារ៉ាប៊ីសាអូឌីត។ ប្រព័ន្ធនេះនឹងអនុញ្ញាតឱ្យប្រទេសនានា អាចទូទាត់ផ្ទាល់ដោយប្រើរូបិយប័ណ្ណឌីជីថលជាតិរបស់ខ្លួនកាត់បន្ថយពេលវេលាប្រតិបត្តិការពីច្រើនថ្ងៃមកនៅត្រឹមតែប៉ុន្មានវិនាទី។ ក្រុមមន្ត្រីចិន បានអះអាងថា ប្រព័ន្ធ mBridge នេះនឹងគិតថ្លៃប្រហែលពាក់កណ្តាលប៉ុណ្ណោះ បើធៀបនឹងថ្លៃសេវាទូទាត់អន្តរជាតិ តាមប្រព័ន្ធទូទាត់ SWIFT ជាដើម ដែលធ្វើឱ្យប្រព័ន្ធថ្មីនេះមានភាពទាក់ទាញ ជាពិសេសសម្រាប់អាជីវកម្មខ្នាតតូច និងមធ្យម។
គម្រោងនេះក៏ត្រូវបានព្យាករថា នឹងជួយបង្កើនការប្រើប្រាស់រូបិយប័ណ្ណយន់របស់ចិន ជាអន្តរជាតិ ជាពិសេសក្នុងចំណោមបណ្ដាប្រទេសដែលមានទំនាក់ទំនងល្អជាមួយគំនិតផ្តួចផ្តើមខ្សែក្រវ៉ាត់ និងផ្លូវ (BRI) របស់ទីក្រុងប៉េកាំង។ ចំណាប់អារម្មណ៍លើប្រព័ន្ធទូទាត់របស់ប្រទេសចិននេះត្រូវបានរាយការណ៍ថា បានកើនឡើងអំឡុងពេលសង្គ្រាមអ៊ីរ៉ង់ថ្មីៗនេះ ខណៈដែលប្រទេសមួយចំនួនកំពុងស្វែងរកជម្រើសជំនួសបណ្តាញដែលមានមូលដ្ឋានលើប្រាក់ដុល្លារ។
បង្កើតឡើងដោយផ្អែកលើបច្ចេកវិទ្យា Blockchain ប្រព័ន្ធទូទាត់ mBridge បានដំណើរការប្រតិបត្តិការទូទាត់ក្នុងទំហំទឹកប្រាក់៤៧០ពាន់លានយន់ ឬ៦៩ពាន់លានដុល្លារអាម៉េរិករួចមកហើយអំឡុងពេលសាកល្បង។ បណ្ដាធនាគារពាណិជ្ជកម្ម ក៏នឹងអាចចូលរួមប្រព័ន្ធនេះផងដែរ ក្រោមការត្រួតពិនិត្យរបស់ធនាគារកណ្តាល។
ក្រុមអ្នកវិភាគបានលើកឡើងថា ប្រព័ន្ធទូទាត់ mBridge អាចជួយបង្កើនឥទ្ធិពលរបស់ប្រទេសចិន ក្នុងវិស័យហិរញ្ញវត្ថុពិភពលោក ពង្រឹងទំនាក់ទំនងសេដ្ឋកិច្ចជាមួយបណ្ដាប្រទេសជាដៃគូ និងពន្លឿនការប្រើប្រាស់ប្រាក់យន់ចិន ជាអន្តរជាតិ។ ទោះជាយ៉ាងណា ក្រុមអ្នករិះគន់បានលើកឡើងពីការព្រួយបារម្ភថា ប្រព័ន្ធទូទាត់នេះអាចជួយប្រទេសមួយចំនួនកាត់បន្ថយការពឹងផ្អែកលើប្រព័ន្ធហិរញ្ញវត្ថុអន្តរជាតិ ដែលដឹកនាំដោយសហរដ្ឋអាម៉េរិក និងអាចគេចផុតពីការដាក់ទណ្ឌកម្មមួយចំនួន។ ខណៈដែលបណ្តាញទូទាត់អន្តរជាតិនានាកាន់តែបែកបាក់គ្នា ប្រព័ន្ធទូទាត់ mBridge របស់ចិន កំពុងលេចធ្លោក្លាយជាជម្រើសដ៏រឹងមាំបំផុតមួយជំនួសឱ្យប្រព័ន្ធទូទាត់ដែលត្រួតត្រាដោយប្រាក់ដុល្លារ៕
ដោយ: តែម សុខុម
