រដ្ឋមន្ត្រីក្រសួងពាណិជ្ជកម្ម លោក ជូរិន ឡាកសាណាវីសិត (Jurin Laksanawisit) បាននិយាយនៅក្នុងកម្មវិធីពិព័រណ៍ពាណិជ្ជកម្មមួយថា ប្រទេសថៃមានការផ្គត់ផ្គង់អាហារយ៉ាងបរិបូណ៍។ លោកបានបន្តទៀតថា ពេលវេលាបានកំពុងផ្តល់នូវឱកាសដ៏ល្អមួយ ដើម្បីបង្ហាញពិភពលោកថា ប្រទេសថៃគឺជាមជ្ឈមណ្ឌលនៃផលិតផលកសិកម្ម និងម្ហូបអាហារប្រកបដោយគុណភាព ដែលការណ៍នេះវានឹងជួយបង្កើនការនាំចេញអាហារពីប្រទេសថៃបានមួយថែមទៀត។
លោក Jurin បាននិយាយថា ក្រសួងពាណិជ្ជកម្មបានកំពុងរក្សាការឃ្លាំមើលយ៉ាងដិតដល់ ទៅលើស្តុកអាហារសំខាន់ៗក្នុងស្រុក ដើម្បីធានាបាននូវបរិមាណគ្រប់គ្រាន់។ ក្រសួងក៏មានគម្រោងជំរុញការនាំចេញមុខទំនិញដែលលើសតម្រូវការក្នុងស្រុកផងដែរ។
លោកបន្តទៀតថា ជាពិសេស ឧស្សាហកម្មម្ហូបអាហារ និងភេសជ្ជៈដើរតួនាទីយ៉ាងសំខាន់ក្នុងសេដ្ឋកិច្ចថៃ។ ប្រទេសថៃគឺជាប្រទេសនាំចេញអាហារធំជាងគេទី ១៣ ទៅកាន់ពិភពលោកជាមួយនឹងចំណែកទីផ្សារ ២,៣% នៃពិភពលោកសរុប និងជាប្រទេសធំជាងគេទី ៤ នៅក្នុងតំបន់អាស៊ី។
បើទោះបីជា ជំងឺរាតត្បាតសកល (Covid-19) ធ្វើឲ្យមានឧបសគ្គរារាំងដល់ដំណើរការពាណិជ្ជកម្មអន្តរជាតិយ៉ាងណាក៏ដោយ ក៏ការនាំចេញផ្នែកម្ហូបអាហារ និងភេសជ្ជៈរបស់ប្រទេសថៃមានតម្លៃដល់ទៅ៨ពាន់លានដុល្លារនៅក្នុងត្រីមាសទីមួយនៃឆ្នាំ ២០២២ កើនឡើងជិត៣០% ធៀបនឹងរយៈពេលដូចគ្នាកាលពីឆ្នាំមុន។
អត្ថបទគួរអាន
លោក ប្រាស៊ីត (Prasit Boondoungprasert) នាយកប្រតិបត្តិនៃក្រុមហ៊ុនចំណីអាហារ CPF(Charoen Pokphand Foods) បាននិយាយថា ការហាមឃាត់ការនាំចេញអាហារទៅក្រៅប្រទេស ទំនងជាមិនអានកើតមាននៅក្នុងប្រទេសថៃបានទេ ដោយសារប្រទេសថៃមានអាហារលើសលប់សម្រាប់ផ្គត់ផ្គង់ទីផ្សារក្នុងស្រុក ដូចនេះការនាំចេញ វាគ្មានបញ្ហានោះឡើយ។
លោកបានបន្តថា រយៈពេលនេះគឺជាឱកាសដ៏ល្អមួយ សម្រាប់ប្រទេសថៃ ដើម្បីជំរុញម៉ាកយីហោអាហាររបស់ខ្លួនទៅកាន់ទីផ្សារពិភពលោកឲ្យគេបានស្គាល់។
យោងតាមនាយកក្រុមហ៊ុនចីណីអាហារខាងលើថា បន្ទាប់ពីរដ្ឋាភិបាលម៉ាឡេស៊ីបានហាមឃាត់ការនាំចេញសាច់មាន់កាលពីថ្ងៃទី ២៤ ខែឧសភាកន្លងទៅ វាគឺជាឱកាសសម្រាប់ក្រុមហ៊ុន CP ដែលបានត្រៀមខ្លួនជាស្រេចក្នុងការនាំចេញផលិតផលសាច់មាន់ ព្រោះតែផលិតកម្មសាច់មាន់ ដែលផ្គត់ផ្គង់នៅក្នុងប្រទេសថៃលើសតម្រូវការប្រមាណ ៦០% ទៅ៧០% ឯណោះ។
លោក វីស៊ីត លីមលួឆា (Visit Limlurcha) ប្រធានកិត្តិយសនៃសមាគមអ្នកកែច្នៃចំណីអាហារថៃបាននិយាយថា ប្រទេសថៃមិនមានការព្រួយបារម្ភអំពីសុវត្ថិភាពម្ហូបអាហារនោះ ទោះបីជាតម្លៃអាហារមួយចំនួនបានឡើងថ្លៃដោយសារតម្លៃវត្ថុធាតុដើមខ្ពស់ក៏ដោយ។
លោក វីស៊ីត បានប្រាប់ថា "ជាមួយនឹងជំងឺរាតត្បាត និងសង្គ្រាមរុស្ស៊ី-អ៊ុយក្រែន ដែលបណ្តាលឱ្យមានការកើនឡើងនៃតម្រូវការស្បៀងអាហារនៅទូទាំងពិភពលោកនោះ យើងគួរតែឆ្លៀតយកឱកាសនេះ ដើម្បីជំរុញការនាំចេញឲ្យបានកាន់តែច្រើន"។
គួររំលឹកថា ក្នុងប៉ុន្មានថ្ងៃថ្មីៗនេះ ប្រទេសនៅអាស៊ីជាច្រើនបានទប់ស្កាត់ការនាំចេញទំនិញកសិកម្មរបស់ពួកគេ ដើម្បីការពារការឡើងថ្លៃតម្លៃក្នុងស្រុក។ តួយ៉ាង ប្រទេសម៉ាឡេស៊ីបានហាមប្រាមការនាំចេញឧស្សាហកម្មសាច់សត្វរបស់ខ្លួន ខណៈដែលប្រទេសឥណ្ឌាបានរឹតបន្តឹងការនាំចេញស្ករសជាលើកដំបូងក្នុងរយៈពេលប្រាំមួយឆ្នាំ ដើម្បីការពារការកើនឡើងនៃតម្លៃក្នុងស្រុក បន្ទាប់ពីទើបតែបានហាមឃាត់ការនាំចេញស្រូវសាលីរួច។ និន្នាការនេះ ក៏ត្រូវបានអ្នកជំនាញមើលឃើញថា វាអាចនឹងធ្វើឲ្យបញ្ហាកង្វះខាតស្បៀងអាហារ និងអាចកើតមានកាន់តែខ្លាំងថែមទៀតនៅទូទាំងពិភពលោកប្រសិនបើប្រទេសកាន់តែច្រើនប្រកាន់យកវិធានការគាំពារនិយមបែបនេះ ហើយវាអាចនឹងរុញច្រានឲ្យមានសង្គ្រាមពាណិជ្ជកម្មកើតមាននៅពាសពេញពិភពលោកផងដែរ៕
អត្ថបទ: ហ៊ុន គន្ធថៃ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
