នៅទីបំផុត សេចក្ដីព្រាងច្បាប់ស្ដីពី ការការពាររុក្ខជាតិ និងភូតគាមអនាម័យ ត្រូវបានព្រឹទ្ធសភាអនុម័តយល់ព្រមទាំងស្រុងទៅតាមសំណើរបស់រាជរដ្ឋាភិបាលកម្ពុជា។
ថ្លែងក្នុងសម័យប្រជុំលើកទី៨ នីតិកាលទី៤ នៃព្រឹទ្ធសភា នៅថ្ងៃទី២០ ខែមេសា ឆ្នាំ២០២២ ឯកឧត្តមបណ្ឌិត ម៉ុង ឫទ្ធី ប្រធានគណ:កម្មការផែនការ វិនិយោគ កសិកម្ម ធនធានទឹក ឧតុនិយម អភិវឌ្ឍន៍ជនបទ និងបរិស្ថាន បានមានប្រសាសន៍ថា ដំណើរការប្រព្រឹត្តទៅនៃការកសាងឯកសារគតិយុត្តមួយនេះ សេចក្តីត្រូវការចាំបាច់ដែលត្រូវរៀបចំសេចក្តីព្រាងច្បាប់នេះឡើង គឺការដាក់ឆ្លងពិនិត្យ និងពិភាក្សាផ្ទៃក្នុង ជាមួយក្រសួង-ស្ថាប័នពាក់ព័ន្ធ ដាក់ឆ្លងសម័យប្រជុំគណ:រដ្ឋមន្ត្រី ដាក់ឆ្លងគណៈកម្មការទី៣ និងគណៈកម្មការជំនាញផ្សេងទៀតនៃរដ្ឋសភា ដាក់ឆ្លងសម័យប្រជុំពេញអង្គរដ្ឋសភាលើកទី៧ នីតិកាលទី៦ និងចុង ក្រោយបានដាក់ឆ្លងកិច្ចប្រជុំគណ:កម្មការទី៣ និងគណ:កម្មការផ្សេងទៀតនៃព្រឹទ្ធសភា កាលពីថ្ងៃទី១១ ខែមេសាកន្លងមក។
អត្ថបទគួរអាន
ឯកឧត្តមបន្ថែមថា ទាំងទម្រង់ ខ្លឹមសាររួម ខ្លឹមសារទូទៅ និងអត្ថប្រយោជន៍នៃសេចក្តីព្រាងច្បាប់ក្នុងការការពាររាល់កសិផល និងរុក្ខជាតិនាំចូលក្នុងព្រះរាជាណាចក្រកម្ពុជា និងជាពិសេសជំរុញ និងលើកកម្ពស់សមត្ថភាពនាំចេញកសិផល ឆ្លើយតបតាមលក្ខខណ្ឌតម្រូវភូតគាមអនាម័យនៃទីផ្សារនាំចូល។
សេចក្តីព្រាងច្បាប់សេចក្ដីព្រាងច្បាប់ ដែលមាន១៥ជំពូក និង១១៣មាត្រានេះ គឺមានកំណត់អំពីការគ្រប់គ្រងសុខភាពរុក្ខជាតិ ការអនុវត្តវិធានការការពាររុក្ខជាតិ និងវិធានការភូតគាមអនាម័យ ការពារធនធានរុក្ខជាតិគ្រប់ប្រភេទ ការទប់ស្កាត់ការបង្ក ការរាលដាលឆ្លងនិងការរាតត្បាតពីសំណាក់សមាសភាពចង្រៃ ការលើកកម្ពស់ផលិតភាពកសិកម្ម សន្តិសុខស្បៀងអនាម័យគុណភាព និងសុវត្ថិភាពផលិតផលកសិកម្ម។ សេចក្ដីព្រាងច្បាប់នេះ ក៏នឹងជួយសម្រួលដល់ការធ្វើពាណិជ្ជកម្មក្នុងវិស័យកសិកម្ម ក៏ដូចជា រួមចំណែកក្នុងការអភិវឌ្ឍសេដ្ឋកិច្ចសង្គមជាតិ ថែមទាំងដើម្បីធានាការគ្រប់គ្រង ការការពាររុក្ខជាតិ និងភូតគាមអនាម័យ នៅក្នុងប្រទេសកម្ពុជា ផងដែរ៕
អត្ថបទ សោម ស្រីពេជ្រ
None
