អង្គការសហប្រតិបត្តិការ និងអភិវឌ្ឍន៍សេដ្ឋកិច្ច ដែលមានមូលដ្ឋាននៅប្រទេសបាំរាំង បានបញ្ចេញរបាយការណ៍សិក្សាស្រាវជ្រាវមួយនៅដើមសប្តាហ៍នេះ ដោយបានព្យាករថា សេដ្ឋកិច្ចរបស់ប្រទេសចិន នឹងសម្រេចបានកំណើនក្នុងរង្វង់៤,៨% នៅឆ្នាំ២០២៥ នេះ ដោយសារការធ្លាក់ចុះតម្រូវការក្នុងវិស័យឧស្សាហកម្ម និងវិស័យទ្រទ្រង់កំណើនសេដ្ឋកិច្ចមួយចំនួនទៀត។
ជាមួយគ្នានេះ អង្គការនេះ បានព្រមានថា សេដ្ឋកិច្ចចិន អាចប្រឈមនឹងការធ្លាក់ចុះបន្ថែមទៀត ដោយសារការដាក់គំនាបពន្ធថ្មីរបស់លោក ដូណាល់ ត្រាំ និងឥទ្ធិពលរបស់វាទៅលើសេដ្ឋកិច្ចពិភពលោក។ ស្ថាប័នជំនាញសេដ្ឋកិច្ចដដែលនេះ បានព្យាករថា សេដ្ឋកិច្ចចិន អាចនឹងថមថយកំណើនបន្ថែមទៀតនៅឆ្នាំ២០២៦ ដោយធ្លាក់ចុះមកនៅត្រឹម៤,៤% តែប៉ុណ្ណោះ។
ការកើនឡើងភាពតានតឹងផ្នែកពាណិជ្ជកម្ម និងពន្ធគយរវាងប្រទេសមហាអំណាចសេដ្ឋកិច្ចធំជាងគេទាំងពីរនៅលើពិភពលោក ចិន និងអាម៉េរិក បានបង្កឱ្យមានការព្រួយបារម្ភជាសកល ដោយអ្នកជំនាញជាច្រើនមានការបារម្ភថា បញ្ហាជម្លោះពាណិជ្ជកម្មរវាងប្រទេសទាំងពីរអាចនឹងអូសបន្លាយពេលយូរជាងកាលដែលលោក ត្រាំ បានអនុវត្តនៅក្នុងអាណត្តិដំបូងរបស់លោក។
ជាក់ស្តែងឆ្លើយតបនឹងការដំឡើងពន្ធរបស់ទីក្រុងវ៉ាស៊ីនតោន ចិន បានដំឡើងពន្ធបន្ថែម២០% លើទំនិញរាប់ចាប់តាំងពីសាច់សត្វរហូតដល់កសិផល និងផលិតផលទឹកដោះគោ។ ស្ថិតក្នុងស្ថានភាពនេះអង្គការសហប្រតិបតិ្តការ និងអភិវឌ្ឍន៍សេដ្ឋកិច្ច បានព្យាករថា សេដ្ឋកិច្ចអាម៉េរិក នៅឆ្នាំនេះអាចនឹងធ្លាក់ចុះ០,២% ពោលគឺនឹងសម្រេចបានកំណើនក្នុងរង្វង់២,២% ស្របពេលសេដ្ឋកិច្ចរបស់កាណាដា និងម៉ិកស៊ិក ដែលរងសម្ពាធពន្ធពីអាម៉េរិក ក៏នឹងមានការធ្លាក់ចុះដូចគ្នាដែរនៅឆ្នាំនេះ៕
ដោយៈ សរ សុជាតិ
