បច្ចុប្បន្ននៅអាមេរិកមានពលរដ្ឋប្រមាណជាង ៥លាននាក់ ឬស្មើនឹងជិត៨% នៃអ្នកដែលបានចាក់វ៉ាក់សាំង ប្រភេទវ៉ាក់សាំង Pfizer និង Moderna ដូសទី១ មិនបានមកទទួលការចាក់ដូសទី២នោះទេ។ នេះបើតាមតួលេខពីមជ្ឈមណ្ឌលគ្រប់គ្រង និងការពារជំងឺឆ្លងរបស់អាមេរិក។នេះបើតាមការរាការណ៍ដោយសារព័ត៌មាន The New York Times។
មានហេតុផលផ្សេងៗគ្នាជាច្រើន ដែលធ្វើឲ្យប្រជាជនអាមេរិកមិនព្រមមកទទួលយកការចាក់វ៉ាកសាំងដូសទី២។ តាមរយៈការសម្ភាស៍របស់កាសែតអាមេរិកដដែលនេះ បានឲ្យដឹងថា ពលរដ្ឋអាមេរិកខ្លះនិយាយថា ដោយសារតែពួកគេបារម្ភពីផលប៉ះពាល់ក្រោយការចាក់វ៉ាក់សាំងដូសទី២ ហើយមានខ្លះទៀតនិយាយថា ពួកគេមានអារម្មណ៍ថា ការចាក់វ៉ាក់សាំងតែមួយដូសក៏អាចមានប្រសិទ្ធភាពការពារបានដែរ។ ទាំងនេះ គ្រាន់តែជាការលើកឡើងពីការយល់ឃើញរបស់បុគ្គលខ្លួនឯងប៉ុណ្ណោះ ប៉ុន្ដែ បញ្ហាមួយទៀត ដែលជាឧបសគ្គក្នុងការទទួលវ៉ាក់សាំងដូសទី២នោះ ក៏ព្រោះតែខ្វះវ៉ាក់សាំងចាក់ ឬមានវ៉ាក់សាំងក្នុងស្ដុកដែរ តែម៉ាកផ្សេងគ្នាពីការវ៉ាក់សាំងដែលបានចាក់កាលពីដូសទី១។ នេះបើតាម The New York Times។
ក្រុមអ្នកជំនាញសុខភាពសាធារណៈអាមេរិកធ្លាប់បានលើកឡើងពីក្ដីបារម្ភដែរថា ក្រោយពីចាក់វ៉ាក់សាំងដូសទី១មួយហើយ វាអាចនឹងមានការលំបាក ដើម្បីឲ្យពួកគេមកទទួលដូសទី២ នៅក្នុងរយៈពេល៣ ទៅ៤សប្ដាហ៍បន្ទាប់នោះ។ ឆ្លើយតបទៅនឹងបញ្ហានេះ មានអាជ្ញាធរក្នុងរដ្ឋមួយចំនួនក្នុងសហរដ្ឋអាមេរិក បានរៀបចំក្រុមការងារដើម្បីតេទូរស័ព្ទទៅដោយផ្ទាល់ ឬផ្ញើសារទៅកាន់អ្នកដែលបានចាក់វ៉ាក់សាំងដូសទី១ឲ្យមកទទួលដូសទី២។
អត្ថបទគួរអាន
មានរដ្ឋខ្លះទៀត ក៏បានព្យាយាមធ្វើយ៉ាងណាឲ្យនិស្សិតអាចទទួលបានវ៉ាក់សាំងដូសទី២ បន្ទាប់ពីពួកគេនឹងត្រូវឈប់សម្រាកពីការសិក្សានៅរដូវក្ដៅនេះ។
យោងតាមភ័ស្ដុតាងដែលប្រមូលបាននៅអំឡុងយុទ្ធនាការចាក់វ៉ាក់សាំងសាកល្បង បានឲ្យដឹងថា អ្នកដែលមិនទទួលបានការចាក់ដូសទី២ គឺងាយប្រឈមនឹងការឆ្លងកូវីដ-១៩ ពិសេសមេរោគដែលបំប្លែងខ្លួនថ្មី បើធៀបនឹងអ្នកដែលបានចាក់គ្រប់ទាំងពីរដូស។ មានន័យថា អ្នកចាក់បានតែ១ដូស គឺនៅមានប្រព័ន្ធការពារមេរោគខ្សោយជាងអ្នកដែលបានចាក់គ្រប់ពីរដូស។ ទោះយ៉ាងណា អ្នកដែលបានចាក់ត្រឹមតែ ១ដូស រាងកាយក៏នឹងមានប្រព័ន្ធការពារមេរោគដែរ ប៉ុន្ដែគេមិនច្បាស់ថា តើវាអាចនឹងការពារបានក្នុងរយៈពេលប៉ុន្មាននោះទេ។
យោងតាមទិន្នន័យពី Bloomberg គិតមកត្រឹមថ្ងៃទី២៦ ខែមេសា ការចាក់វ៉ាក់សាំងនៅទូទាំងពិភពលោកមានជាង ១ពាន់លានដូសហើយ ប៉ុន្ដែវាទើបបានត្រឹមតែប្រមាណ៦,៧% ប៉ុណ្ណោះនៃចំនួនប្រជាជនសរុបទូទាំងពិភពលោក។ ក្នុងនោះ សហរដ្ឋអាមេរិក បានចាក់វ៉ាក់សាំងដល់ពលរដ្ឋរបស់ខ្លួនសរុបប្រមាណ ២៣០លានដូសរួចហើយ ស្មើនឹងជាង៣៥%នៃចំនួនប្រជាជនសរុប។ ប្រទេសចិនឯណោះវិញ ក៏បានចាក់វ៉ាក់សាំងជូនប្រជាជនខ្លួនជាង២២០លានដូសដែរ ឬស្មើនឹងប្រមាណ ៨% នៃចំនួនប្រជាជនសរុប ខណៈដែលឥណ្ឌាចាក់បានជាង ១៤០លានដូសស្មើនឹងជាង៥% និងអឺរ៉ុបចាក់បាន១៣០លានដូស ស្មើនឹងជិត១៥% នៃចំនួនប្រជាជនសរុប៕ចុច Like Facebook Page របស់ខេមបូណូមីសនិងចូលរួមក្នុង Telegram ដើម្បីទទួលបានព័ត៌មានថ្មីៗលឿនរហ័សមុនគេ: https://t.me/cambonomist
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
