ឯកឧត្តម ឡុង ឌីម៉ង អភិបាលរងខេត្តព្រះសីហនុបានបញ្ជាក់ឱ្យដឹងថា ការសម្រេចបង្កើតក្រុងកំពង់សោមនេះ គឺជាក្រុងទី៣ហើយនៅក្នុងខេត្តព្រះសីហនុ ដ្បិតថា កន្លងមកខេត្តព្រះសីហនុមានក្រុងចំនួន២ និងស្រុកចំនួន៣ រួមមានក្រុងព្រះសីហនុ និងក្រុងកោះរ៉ុង រួមជាមួយស្រុកព្រៃនប់ ស្រុកកំពង់សីលា និងស្រុកស្ទឹងហាវ។ បើតាមមន្ត្រីជាន់ខ្ពស់រូបនេះ កត្តាដែលជំរុញឱ្យរាជរដ្ឋាភិបាលសម្រេចកាត់យកឃុំចំនួន៥ពីស្រុកព្រៃនប់ ដើម្បីបង្កើតជាក្រុងកំពង់សោមនេះ គឺដោយសារស្រុកព្រៃនប់ គឺជាស្រុកដែលមានវិសាលភាពភូមិសាស្រ្តធំជាងគេ ដែលទាមទារឱ្យមានការយកចិត្តទុកដាក់ ដើម្បីបង្ខិតសេវាសាធារណៈ និងការការពារសន្តិសុខសណ្ឋាប់ធ្នាប់ជូនប្រជាពលរដ្ឋ អ្នកវិនិយោគ និងភ្ញៀវទេសចរឱ្យបានកាន់តែរឹងមាំបន្ថែមទៀត។
បើតាមការអះអាងរបស់ឯកឧត្តម ឡុង ឌីម៉ង ការបង្កើតក្រុងថ្មីនេះ គឺស្របគ្នាជាមួយនឹងប្លង់គោលនៃការអភិវឌ្ឍខេត្តព្រះសីហនុនាថ្ងៃអនាគត ពោលគឺតំបន់រាមដែលជាទីតាំងរដ្ឋបាលរបស់ក្រុងកំពង់សោមនេះ ត្រូវបានអ្នកជំនាញសេដ្ឋកិច្ច និងនគរូបនីយកម្មវាយតម្លៃថា នឹងក្លាយជាទីតាំងដ៏ទាក់ទាញមួយដែលមានប្រជាពលរដ្ឋរស់នៅច្រើន ហើយនឹងក្លាយជាតំបន់ពហុបំណងនាថ្ងៃអនាគត ដែលមានមជ្ឈមណ្ឌលហិរញ្ញវត្ថុអន្តរជាតិបង្កើតឡើងនៅទីនោះ ដែលវានឹងក្លាយជាទីតាំងអំណោយផលក្នុងការទាក់ទាញអ្នកវិនិយោគ និងភ្ញៀវទេសចរ។
សូមជមម្រាបថា រាជរដ្ឋាភិបាលកម្ពុជាបានសម្រេចបង្កើតក្រុងកំពង់សោម នៃខេត្តព្រះសីហនុ ដោយ ក្រុងកំពង់សោមនេះមានសង្កាត់ចំនួន៥ គឺសង្កាត់រាម សង្កាត់បិតត្រាំង សង្កាត់អូរឧកញ៉ាហេង សង្កាត់បឹងតាព្រហ្ម និងសង្កាត់អូរជ្រៅ ដែលកាត់ចេញពីស្រុកព្រៃនប់។ ហើយចំណែកទីតាំងរដ្ឋបាលក្រុងថ្មីនេះវិញ គឺស្ថិតនៅក្នុងសង្កាត់រាម៕
អត្ថបទ សោម ស្រីពេជ្រ និងរូបភាពឯកសារ
