បើតាមសារព័ត៌មានសឹង្ហបុរី CNA, បច្ចុប្បន្ននេះ គណបក្សភឿថៃកំពុងមានមហិច្ឆតា និងកំណត់គោលដៅយកជ័យជម្នះ ដោយផ្តោតលើគោលនយោបាយប្រកបដោយភាពទាក់ទាញ សម្រាប់ការបោះឆ្នោតជ្រើសរើសនាយករដ្ឋមន្ត្រីនៅថ្ងៃទី ១៤ ឧសភា បូករួមទាំងការផ្តល់នូវប្រាក់ឌីជីថលសម្រាប់ពលរដ្ឋថៃទាំងអស់ក្រោយអាយុ១៦ឆ្នាំផងដែរ។
បក្សប្រឆាំងដ៏មានឥទ្ធិពលបំផុតរបស់ថៃមួយនេះក៏បានបង្ហើបអំពីបេក្ខភាពនាយករដ្ឋមន្ត្រីដ៏លេខធ្លោរបស់បក្សទៀតផង គឺលោកស្រី ប៉ៃតុងតាន ស៊ីនណាវ៉ាត្រា ដែលត្រូវជាកូនស្រីបង្កើតរបស់លោក ថាក់ស៊ីន ស៊ីនណាវ៉ាត្រា និងជាក្មួយស្រីរបស់អតីតនាយករដ្ឋមន្ត្រីថៃគឺលោកស្រី យ៉ីងឡាក់។
លោកស្រី ប៉ៃតុងតាន គឺជាបេក្ខភាពមួយរូបសម្រាប់តំណែងានាយករដ្ឋមន្ត្រីនៃបក្សភឿថៃ។ នៅក្នុងការឃោសនាបោះឆ្នោតមួយនៅទីក្រុងបាងកកកាលពីខែមុន លោកស្រីបានប្រាប់ទីភ្នាក់ងារ CNA ថា៖ «ខ្ញុំបានធ្វើដំណើរស្ទើរពេញមួយប្រទេសទៅហើយ ហើយអ្វីដែលយើងស្តាប់ឮនោះគឺយើងជាជម្រើសដ៏ល្អបំផុតសម្រាប់ប្រជាជនថៃក្នុងពេលឥលូវនេះ។ ប្រសិនបើពួកគេបោះឆ្នោតដើម្បីប្រជាធិបតេយ្យ ពួកគេត្រូវតែបោះឱ្យពួកយើង ព្រោះថាយើងមានជម្រើស និងសមត្ថភាពគ្របគ្រាន់ក្នុងការធ្វើឱ្យប្រទេសនេះជាទីដ៏ល្អប្រសើរឡើងវិញបាន»។
ទោះយ៉ាងណាក៏ដោយ អ្នកសង្កេតការណ៍មានការយល់ឃើញថា អ្នកបោះឆ្នោតក៏នឹងពិចារណាផងដែរនូវសមិទ្ធិផលរបស់បក្សភឿថៃនៅពេលកាន់អំណាចពីមុន។ បក្សភឿថៃ បានឈ្នះរាល់ការបោះឆ្នោតចាប់តាំងពីឆ្នាំ២០០១ ដែលគ្រប់ដណ្តប់ភាគច្រើននៅភាគខាងជើង និងភាគឦសាននៃប្រទេស ប៉ុន្តែវាប្រហែលជាមិនងាយស្រួលទេក្នុងការបង្វែរនិន្នាការនយោបាយឱ្យពួកគេពេញចិត្តនៅពេលនេះ។ ហេតុអ្វី?
អត្ថបទគួរអាន
បើតាមលោកបណ្ឌិត នុត្តាខន វីទីតាណុន (Nuttakorn Vititanon) មកពីមហាវិទ្យាល័យនយោបាយនិងរដ្ឋាភិបាលនៃសាកលវិទ្យាល័យឈៀងម៉ៃ បានប្រាប់ CNA ថា អ្នកបោះឆ្នោតជំនាន់ក្រោយដែលមិនធ្លាប់មានបទពិសោធន៍អំពីភាពជោគជ័យ និងសមទ្ធិផលរបស់បក្សភឿថៃ នឹងមិនបោះឆ្នោតឱ្យគណបក្សនេះឡើយ។
គួរជម្រាបដែរថា គណបក្សភឿថៃមានមហិច្ឆតាចង់យកឈ្នះយ៉ាងហោចណាស់៣១០អាសនៈក្នុងចំណោមអាសនៈទាំងអស់៥០០អាសនៈ។ នៅក្នុងការបោះឆ្នោតចុងក្រោយរបស់ខ្លួនកាលពីឆ្នាំ២០១១ បក្សនេះបានឈ្នះ ២៦៥អាសនៈប៉ុណ្ណោះ។ ទន្ទឹមគ្នានេះ បក្សប្រឆាំងដ៏ធំមួយទៀត ក៏គេមិនអាចមើលរំលងបានដូចគ្នា គឺគណបក្សឆ្ពោះទៅមុខ។
បេក្ខនារីម្នាក់ក្នុងចំណោមបេក្ខជនផ្សេងៗទៀតសម្រាប់តំណែងសមាជិកសភារបស់បក្សឆ្ពោះទៅមុខ គឺលោកស្រី ភេចរ៉ាត់ ម៉ៃចុមប៉ូ (Phetcharat Maichompoo) បាននិយាយថា អ្នកស្រីមានការព្រួយបារម្ភបន្តិចអំពីសន្ទុះរបស់បក្សភឿថៃ តែគោលនយោបាយគណបក្សរបស់លោកស្រីគឺជា «ដំណោះស្រាយប្រកបដោយនិរន្តរភាព»។ លោកស្រីបានបន្តថា៖ «មនុស្សមួយចំនួនប្រហែលជាគិតថាគណបក្សរបស់យើងជ្រុលនិយមពេក។ ប៉ុន្តែបន្ទាប់ពីបានចុះទៅមើលសហគមន៍ និងពន្យល់ពីគោលនយោបាយរបស់យើងដល់ប្រជាពលរដ្ឋក្នុងមូលដ្ឋាន ពួកគេបានដឹងថា យើងត្រូវកែទម្រង់រចនាសម្ព័ន្ធដែលជាមធ្យោបាយដោះស្រាយឫសគល់នៃបញ្ហា»៕
