រាជរដ្ឋាភិបាលថៃ ចេញមកព្រមានយ៉ាងម៉ឺងម៉ាត់ ដាស់តឿនពលរដ្ឋខ្លួន កុំឱ្យឈរឈ្មោះតំណាងសម្រាប់ការវិនិយោគរបស់ជនបរទេស

ការព្រមានរបស់រាជរដ្ឋាភិបាលថៃនេះ ធ្វើឡើង បន្ទាប់ពីរកឃើញថា មានមនុស្សជាច្រើនត្រូវបានជនបរទេសប្រើប្រាស់ដោយមិនដឹងខ្លួន ឬដោយចេតនា ដើម្បីឱ្យឈរឈ្មោះតំណាងក្រុមហ៊ុន ដែលមានប្រតិបត្តិការខុសច្បាបនៅក្នុងប្រទេសថៃ។ នេះបើយោងតាម អ្នកនាំពាក្យរងរាជរាជរដ្ឋាភិបាលថៃ លោក Anukul Pruksanusak ដែលបានបញ្ជាក់នៅក្នុងកាសែតបាងកកប៉ុស្ដិ៍។

យោងតាមទិន្នន័យពីនាយកដ្ឋានអភិវឌ្ឍន៍ពាណិជ្ជកម្មរបស់ថៃ ការរៀបចំបញ្ជីឈ្មោះត្រូវបានរកឃើញជាទូទៅនៅក្នុងខេត្តដែលមានសកម្មភាពទេសចរណ៍ខ្លាំងដូចជា នៅ ភូកេត ឈុនបុរី បាងកក និងឈៀងម៉ៃជាដើម។ អាជីវកម្ម ដែលស្ថិតនៅក្រោមការត្រួតពិនិត្យ រួមមាន ភោជនីយដ្ឋាន សណ្ឋាគារ រមណីយដ្ឋាន អចលនទ្រព្យ និងសេវាកម្មដឹកជញ្ជូន។

ប្រតិបត្តិការអាជីវកម្មក្លែងបន្លំទាំងនេះ ត្រូវបានបង្កើតឡើង ដើម្បីជៀសវាងការរឹតបន្ដឹងផ្លូវច្បាប់ ដោយជនបរទេស បានប្រើប្រាស់ជនជាតិថៃ ជាម្ចាស់ភាគហ៊ុនបន្ទាប់បន្សំ ឬជាប្រតិបត្តិករ ដោយគ្មានការវិនិយោគ ឬការចូលរួមប្រតិបត្តិការពិតប្រាកដឡើយ។

បញ្ហានេះ បានធ្វើឱ្យមានការប្រកួតប្រជែងមិនស្មើភាព កង្វះតម្លាភាព និងអាចក្លាយជាមធ្យោបាយមួយ ប្រើប្រាស់ប្រទេសថៃ សម្រាប់ការលាងលុយកង្វក់ ដែលធ្វើឱ្យប៉ះពាល់ដល់កេរ្តិ៍ឈ្មោះអាជីវកម្មរបស់ប្រទេសថៃ។