តារាងរាយលក់រាយប្រេងឥន្ធនៈនៅកម្ពុជា ដែលបង្ហាញដោយក្រសួងពាណិជ្ជកម្មបានឲ្យដឹងថា សម្រាប់ចាប់ពីថ្ងៃទី ១៦ ដល់ថ្ងៃទី៣០ ខែមិថុនាឆ្នាំ២០២១ តម្លៃប្រេងសាំងធម្មតាត្រូវដាក់លក់ក្នុងតម្លៃ៣.៩០០រៀលក្នុងមួយលីត្រ កើនឡើង១០០រៀលថែមទៀត បើធៀបនឹងតម្លៃកាលខែមុនមានតែត្រឹម៣.៨០០រៀលក្នុងមួយលីត្រ ហើយប្រេងម៉ាស៊ូតវិញ លក់ក្នុងតម្លៃ ៣.៥៥០រៀលក្នុងមួយលីត្រ ឡើងថ្លៃ១០០រៀលដូចគ្នាដែរ។
ការកើនឡើងតម្លៃប្រេងឆៅនៅកម្ពុជា គឺកើតឡើងស្របពេលតម្លៃប្រេងឆៅក្នុងទីផ្សារសកលលោកក៏ហក់ឡើងកាន់តែខ្ពស់ទៅៗដែរ ដោយតម្លៃប្រេងឆៅនៅទីផ្សារអាមេរិកកើនឡើងថ្លៃដល់ទៅជាង៧២ដុល្លារអាមេរិកហើយក្នុងមួយធុងបារ៉ែល ខណៈដែលនៅទីផ្សារអង់គ្លេសវិញ ប្រេងឆៅលក់ក្នុងតម្លៃជាង៧៤ដុល្លារអាមេរិកក្នុងមួយធុងបារ៉ែល។
អត្ថបទទាក់ទង!
តម្លៃប្រេងឆៅពិភពលោកបានហក់ឡើងថ្លៃក្រឺតៗ ចាប់តាំងពីចុងឆ្នាំ២០២០មកម្ល៉េះ ពោលគឺតម្លៃប្រេងឆៅកាលពីខែវិច្ឆិកាឆ្នាំ២០២០ ធ្លាប់មាននៅត្រឹមតែជាង ៣៧ដុល្លារក្នុងមួយបារ៉ែលប៉ុណ្ណោះ ប៉ុន្ដែមកទល់បច្ចុប្បន្នតម្លៃប្រេងឆៅបានហក់ឡើងដល់ទៅជាង ៧០ដុល្លារហើយក្នុងមួយធុងបារ៉ែល។
ការកើនឡើងថ្លៃនៃទីផ្សារប្រេងឆៅពិភពលោក ក៏ដោយសារតែការមានក្ដីរំពឹងនៃការងើបឡើងនៃសេដ្ឋកិច្ចពិភពលោក ដែលជំរុញឲ្យមានការធ្វើដំណើរកាន់តែច្រើនឡើងវិញ។ មួយវិញទៀត ការឈប់សម្រាករដូវក្ដៅនៅតំបន់អឺរ៉ុប និងអាមេរិកក៏ជាកត្តាជំរុញឲ្យមានតម្រូវការប្រើប្រាស់ប្រេងឥន្ធនៈហក់ឡើងខ្ពស់ផងដែរ។
ទាក់ទងនឹងការកើនឡើងតម្លៃប្រេងឥន្ធនៈនេះដែរ ថ្មីៗនេះ ប្រទេសម៉ាឡេស៊ីត្រូវបានគេរំពឹងថា គ្រោងនឹងបង្កើនការចំណាយដល់ទៅប្រមាណជិត ២ពាន់លានដុល្លារ ទៅលើការឧបត្ថម្ភសម្រាប់មុខទំនិញប្រេងឥន្ធនៈ និងប្រេងឆា នៅក្នុងឆ្នាំ២០២១ ដោយការចំណាយឧបត្ថម្ភនេះ គឺមានច្រើនជាងដល់ទៅជាង២ដង នៃថវិកាដែលរដ្ឋបានបែងចែកស្រាប់កាលពីពេលកន្លងទៅ។ ការបង្កើនថវិកាឧបត្ថម្ភធនទៅលើតម្លៃប្រេងឥន្ធនៈ និងប្រេងឆារបស់ម៉ាឡេស៊ី គឺសំដៅធ្វើយ៉ាងណាមិនឲ្យតម្លៃប្រេងទាំងនេះឡើងថ្លៃខ្ពស់ពេក ដើម្បីជួយសម្រាលបន្ទុកចំណាយដល់ពលរដ្ឋ ដែលកំពុងរងផលប៉ះពាល់ដោយសារតែកូវីដ-១៩រាតត្បាត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
