ធនាគារពិភពលោក

ធនាគារពិភពលោក ផ្ដល់ហិរញ្ញប្បទានថវិកា និងជំនួយឥតសំណងសរុប ១០៥ លានដុល្លារ សម្រាប់ការសិក្សារបស់កុមារ ១,៧លាននាក់នៅកម្ពុជា


ធនាគារពិភពលោក នៅថ្ងៃទី ២៩ ខែសីហា ឆ្នាំ ២០២៥ បានសម្រេចអនុម័តគម្រោងកែលម្អការអប់រំកម្រិតមូលដ្ឋាននៅប្រទេសកម្ពុជា ជាមួយនឹងទំហំសហហិរញ្ញប្បទានថវិកា និងជំនួយឥតសំណងសរុប ១០៥លានដុល្លារអាម៉េរិក ដោយរំពឹងថា កុមារកម្ពុជាជាង ១,៧ លាននាក់ នឹងទទួលបានប្រយោជន៍ពីគម្រោងមួយនេះ។
ធនាគារពិភពលោក
ដោយ

បើតាម​ធនាគារពិភពលោក គម្រោងដែលទើបអនុម័តថ្មីនេះ មាន ១០០ លានដុល្លារ ជាជំនួយ​សហហិរញ្ញប្បទាន​ថវិកា ពីសមាគមអភិវឌ្ឍន៍អន្តរជាតិ (IDA) របស់ធនាគារពិភពលោក និងជំនួយ​ឥតសំណង ៥លានដុល្លារ ពីមូលនិធិបរធនពហុម្ចាស់ជំនួយសម្រាប់ភាពជាដៃគូសម្រាប់​ការរៀនសូត្រតាំងពីវ័យ​ក្មេងខ្ចី (Early Learning Partnership Multi-Donor Trust Fund)។ គម្រោងនេះ​នឹង​ជួយ​ពង្រឹងជំនាញអក្ខរកម្ម និងគណិតវិទ្យាមូលដ្ឋាននៅតាមសាលាបឋមសិក្សា​ទូទាំងប្រទេស។ គម្រោង​កែលម្អការអប់រំ​កម្រិតមូលដ្ឋាននេះ នឹង​ជួយ​ពង្រឹងជំនាញអក្ខរកម្ម និងគណិតវិទ្យាមូលដ្ឋាននៅតាមសាលាបឋមសិក្សាទូទាំងប្រទេស។ លើស​ពីនេះ គម្រោងក៏នឹងពង្រីកលទ្ធភាពទទួលបានសេវាអប់រំកុមារតូច និងសេវាថែទាំកុមារ, កែលម្អគុណភាពនៃការបង្រៀន, ធ្វើឱ្យប្រសើរឡើងនូវហេដ្ឋារចនាសម្ព័ន្ធសាលារៀន និងពង្រឹងប្រព័ន្ធគ្រប់គ្រងវិស័យអប់រំផងដែរ។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា៖ «គម្រោងនេះឆ្លុះបញ្ចាំងពីការប្តេជ្ញាចិត្តយ៉ាងមុតមាំរបស់រាជរដ្ឋាភិបាលកម្ពុជា ក្នុងការវិនិយោគលើមូលធនមនុស្ស និងធានាថាកុមារគ្រប់រូបមានឱកាសរៀនសូត្រ។ តាមរយៈការផ្តោតលើការរៀនសូត្រជាមូលដ្ឋាន យើងកំពុងរៀបចំមូលដ្ឋានគ្រឹះសម្រាប់អនាគតមួយដែលកាន់តែ​មានភាពធន់ និងវិបុលភាពជាងមុន»។

ប្រទេសកម្ពុជាមានការរីកចម្រើនគួរឱ្យកត់សម្គាល់ក្នុងការពង្រីក​លទ្ធភាពទទួលបានការអប់រំ ប៉ុន្តែការវាយតម្លៃនានាបានបង្ហាញថា កុមារជាច្រើនមិនទាន់ទទួលបានជំនាញអក្ខរកម្ម និងគណិតវិទ្យាមូលដ្ឋានដែលចាំបាច់​សម្រាប់ការបន្តការសិក្សា ឬសម្រាប់ទទួលបានការងារដែលត្រូវការជំនាញខ្ពស់នៅឡើយទេ។ គម្រោងកែលម្អការអប់រំកម្រិតមូលដ្ឋាននឹងដោះស្រាយបញ្ហាប្រឈមទាំងនេះ តាមរយៈការ​អនុវត្ត​សកម្មភាពដែលមានប្រសិទ្ធភាពក្នុង​ការ​ចំណាយ និងផ្អែកលើភស្តុតាងជាក់ស្តែង ដើម្បីកែលម្អលទ្ធផលនៃការរៀនសូត្ររបស់​កុមារ​។

លោកស្រី តានញ៉ា​ ម៉េយ័រ (Tania Meyer) ប្រធានគ្រប់គ្រងការិយាល័យធនាគារពិភពលោកប្រចាំប្រទេសកម្ពុជា បានមានប្រសាសន៍ថា៖ «កំណើនវែងឆ្ងាយទៅមុខ​របស់កម្ពុជា អាស្រ័យលើភាពរឹងមាំនៃមូលធនមនុស្សរបស់ប្រទេស​នេះ​។ គម្រោងនេះនឹងជួយធានាថាកុមារទទួលបានជំនាញមូលដ្ឋានដែលពួកគេត្រូវការ ដើម្បីឈានទៅ​សម្រេច​ជោគជ័យនៅក្នុង​សាលា និងការងាររបស់ពួកគេនាអនាគត។ ធនាគារពិភពលោកមានមោទនភាពក្នុង​ការ​ជួយ​គាំទ្រ​ការកសាងប្រព័ន្ធអប់រំមួយកាន់តែ​រឹងមាំ និងមានភាពធន់ជាងមុន ដែលអាចជួយរៀបចំដល់កុមារកម្ពុជាសម្រាប់ការងារនាពេលខាងមុខ»។

គម្រោងនេះនឹងជួយ​ដល់​ការ​ការបង្កើតមជ្ឈមណ្ឌលថែទាំកុមារសាធារណៈចំនួន ៦០ កន្លែង និងថ្នាក់មត្តេយ្យសិក្សាថ្មីចំនួន ៦០ ថ្នាក់ ដើម្បីជួយម្តាយ​ដែលកំពុងធ្វើ​ការ​ឱ្យ​មាន​លទ្ធភាព​ទទួល​បាន​នូវ​សេវាថែទាំកុមារ​មាន​សុវត្ថិភាព និង​មាន​តម្លៃសមរម្យ ហើយស្របគ្នានោះ​ជួយកុមារត្រៀមលក្ខណៈសម្រាប់ចូលរៀននៅកម្រិត​​បឋមផងដែរ។ បន្ថែមលើសិស្សបឋមសិក្សាជាង ១,៧លាន់នាក់ ដែលនឹងទទួលផលប្រយោជន៍ពីគម្រោងនេះ មានកុមារតូចអាយុពី ០ ដល់ ២ឆ្នាំ ប្រហែល២២០០នាក់ និងកុមារអាយុពី៣ដល់៥ឆ្នាំជាង៥០០០០នាក់ នឹងទទួលបានអត្ថប្រយោជន៍ពីការពង្រីកមណ្ឌលថែទាំកុមារ និងថ្នាក់មតេ្តយ្យសិក្សា។ ដើម្បីពង្រីកកម្មវិធីអំណាន និងកម្ម​វិធី​គណិតវិទ្យាថ្នាក់ដំបូងនៅទូទាំងប្រទេស គម្រោងនឹងផ្តល់ការណែនាំ និងការបង្វឹកដល់គ្រូបង្រៀនជាង ៣៧ ០០០ នាក់ និងផ្តល់ការបង្រៀន​ដល់សិស្សដែលរៀន​អន់ជាងគេដែលជាគោលដៅត្រូវជួយ​។ លើស​ពីនេះ ដើម្បីកាត់​បន្ថយ​ភាពណែនណាន់​ក្នុង​ថ្នាក់ និង​បង្ក​​បរិយាកាស​សម្រាប់​រៀនសូត្រឱ្យ​បានកាន់​តែប្រសើរ​​ គម្រោងនឹងគាំទ្រ​ថវិកា​សម្រាប់​ការ​សាងសង់​ថ្នាក់​រៀនថ្មី​ចំនួន ៩០០បន្ទប់ និងសម្រាប់​​សង់​បន្ទប់​ទឹក និង​កន្លែងលាងដៃ​សម្រាប់​​កុមារា និង​កុមារី ប្រើ​ប្រាស់​ដោយ​ឡែកពីគ្នា ផង​ដែរ។




អត្ថបទបន្ទាប់


សមាគមអ្នកអភិវឌ្ឍន៍លំនៅឋានកម្ពុជាបរិច្ចាគថវិកាចំនួន៤៣៤លានរៀលដល់មូលនិធិគន្ធបុប្ផាកម្ពុជា ក្រោមយុទ្ធនាការ«១ម៉ឺនរៀល១ម៉ឺននាក់»

លោកអ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជាព្រមទាំងសមាជិក សមាជិកានៅថ្ងៃទី២៩ ខែសីហា ឆ្នាំ២០២៥ បានប្រគល់ថវិកាចំនួន៤៣៤លាន…

តើបញ្ហាជម្លោះព្រំដែនជាមួយថៃ អាចក្លាយជារបៀបវារៈសំខាន់សម្រាប់ដំណើរទស្សនកិច្ចរបស់ប្រធានាធិបតីហ្វីលីពីន មកកម្ពុជា ឬយ៉ាងណា?

បើយោងតាមការចុះផ្សាយរបស់សារព័ត៌មានក្នុងស្រុករបស់ហ្វីលីពីន ប្រធានាធិបតីហ្វីលីពីន លោក ហ្វឺឌីណង់ ម៉ាកូស នឹងមកបំពេញទស្សនកិច្ចនៅកម្ពុជា ចន្លោ…
More

Related Stories


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ