គម្រោងផ្អាកមូលនិធិនេះធ្លាក់មកចំពេលដែល ទំនាក់ទំនងរវាងសហភាពអឺរ៉ុប និងហុងគ្រីបានស្ថិតក្នុងភាពផុយស្រួយអស់ជាច្រើនខែមកហើយ ដោយសារតែអឺរ៉ុបសង្ស័យថា រដ្ឋាភិបាលរបស់នាយករដ្ឋមន្ត្រីជាតិនិយមលោក Viktor Orban កំពុងពង្រឹងអំណាចខ្លួន និងកាត់បន្ថយនីតិរដ្ឋ ហើយបានប្រើប្រាស់លុយរបស់សហភាពអឺរ៉ុបដើម្បីពង្រឹងក្រុមបក្ខពួករបស់ខ្លួនថែមទៀត។
គេនៅចាំបានកាលពីពីរឆ្នាំមុន សហភាពអឺរ៉ុបបានដាក់ចេញនូវទណ្ឌកម្មហិរញ្ញវត្ថុថ្មី ដើម្បីឆ្លើយតបទៅនឹងអ្វីដែលខ្លួនចាត់ទុកថា ជាការបំផ្លាញលទ្ធិប្រជាធិបតេយ្យនៅក្នុងប្រទេសហុងគ្រី និងប៉ូឡូញផងដែរ។
អំឡុងពេលកាន់អំណាចជាងមួយទសវត្សមកនេះនាយករដ្ឋមន្ត្រីហុងគ្រី លោក Orban បានបន្ទាបអំណាចឯករាជ្យរបស់តុលាការ ប្រព័ន្ធផ្សព្វផ្សាយ អង្គការក្រៅរដ្ឋាភិបាល និងស្ថាប័នបណ្ឌិតសភាក្នុងប្រទេស ព្រមទាំងការរឹតបន្តឹងលើសិទ្ធិរបស់ជនចំណាកស្រុក សិទ្ធិសហគមន៍ក្រុមអ្នកស្រលាញ់ភេទដូចគ្នា និងស្ត្រី។
ក្រៅពីនោះសហភាពអឺរ៉ុប បានលើកឡើងពីភាពមិនប្រក្រតីជាប្រព័ន្ធនៅក្នុងច្បាប់សាធារណៈរបស់ប្រទេសហុងគ្រី ភាពទន់ខ្សោយក្នុងការកាត់ទោសឱ្យបានត្រឹមត្រូវ និងកង្វះខាតក្នុងវិធានការប្រឆាំងអំពើពុករលួយជាដើម។
ទោះយ៉ាងណា គម្រោងផ្អាកមូលនិធិសម្រាប់ហុងគ្រី មិនមែនធ្វើឡើងលើមូលនិធិទាំងអស់នោះទេ។ គណៈកម្មាការអឺរ៉ុបកំពុងផ្តល់អនុសាសន៍ឱ្យផ្អាកមូលនិធិ ប្រហែលមួយភាគបីប៉ុណ្ណោះនៃមូលនិធិសរុបជាង ១,១ទ្រីលានដុល្លារ ដែលធ្លាប់រំពឹងទុកថា ត្រូវផ្តល់ឱ្យរដ្ឋាភិបាលក្រុងប៊ូដាផេសប្រទេសហុងគ្រី សម្រាប់រយៈពេល៧ឆ្នាំ ចាប់ពីឆ្នាំ២០២១ដល់ឆ្នាំ២០២៧។
អត្ថបទគួរអាន
គួរជម្រាបថា ១ភាគ៣នៃមូលនិធិនេះ មានចំនួនប្រមាណ ៧ពាន់៥រយលានដុល្លារ ស្មើនឹង៥%នៃផលិតផលក្នុងស្រុកសរុប ដែលគេធ្លាប់ប៉ានស្មានសម្រាប់ឆ្នាំ២០២២នេះរបស់ហុងគ្រី។ យ៉ាងណាក៏ដោយចុះ បណ្តាប្រទេសសហភាពអឺរ៉ុប មានពេលរហូតដល់បីខែ ដើម្បីពិចារណា មុននឹងសម្រេចចិត្តលើសំណើរបស់គណៈកម្មាធិការអឺរ៉ុបនេះ។
ជាការឆ្លើយតប កាលពីពេលថ្មីៗនេះ រដ្ឋាភិបាលហុងគ្រីបានអះអាងថា សភារបស់ខ្លួននឹងបោះឆ្នោតនៅសប្តាហ៍ក្រោយ លើច្បាប់ជាមួយចំនួនក្នុងបំណងបន្ធូរបន្ថយ ដោះស្រាយភាពមិនប្រក្រតីដែលលើកឡើងដោយEU។ វិធានការនេះត្រូវបានគេរំពឹងថា នឹងរួមបញ្ចូលការបង្កើតក្រុមឃ្លាំមើលឯករាជ្យមួយប្រឆាំងនឹងអំពើពុករលួយ ដើម្បីត្រួតពិនិត្យការប្រើប្រាស់មូលនិធិរបស់សហភាពអឺរ៉ុប ក៏ដូចជាដើម្បីធ្វើឱ្យដំណើរការនីតិប្បញ្ញត្តិកាន់តែមានតម្លាភាព។
សូមបញ្ជាក់ថា ប្រទេសហុងគ្រី បានក្លាយជាសមាជិកសហភាពអឺរ៉ុបតាំងពីខែឧសភាឆ្នាំ២០០៤មកម្ល៉េះ ខណៈដែលផលិតផលក្នុងស្រុកសរុបរបស់ប្រទេសនេះមានដល់ទៅប្រមាណ ១៨៥ពាន់លានដុល្លារគិតក្នុងឆ្នាំ២០២១៕
