ចំនួនជនភៀសខ្លួនបន្ដកើនឡើងកាន់តែច្រើន ស្របពេលដែលរុស្ស៊ីបន្ដការប្រយុទ្ធកាន់តែខ្លាំងក្លា ទៅលើអ៊ុយក្រែន ពិសេសបង្កើនការបាញ់មីស៊ីលដល់ភាគខាងលិចនៃប្រទេសអ៊ុយក្រែនតែម្ដង។ វិបត្តិជនភៀសខ្លួនលើកនេះ ត្រូវបានគេមើលឃើញថា កំពុងតែសាកល្បងគោលជំហររបស់ប្រទេសនានា ពិសេសសម្ព័ន្ធមិត្តអ៊ុយក្រែន ក្នុងកិច្ចសហប្រតិបត្តិការជាអន្តរជាតិ ថាតើ ប្រទេសទាំងអស់នោះ អាចទទួលយកជនភៀសខ្លួនអ៊ុយក្រែនបានក្នុងកម្រិតណា?
ជនភៀសខ្លួនចេញពីប្រទេសអ៊ុយក្រែនមានចំនួនច្រើនជាង១០ម៉ឺននាក់ ហើយជួនកាលអាចមានដល់ជាង ២០ម៉ឺននាក់ជារៀងរាល់ថ្ងៃ ចាប់តាំងពីសង្គ្រាមបានចាប់ផ្តើមនៅថ្ងៃទី២៤ខែកុម្ភៈមក។ ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន បាចាត់ទុកលំហូរប្រជាជនចាកចេញពីប្រទេសលើកនេះថាជា វិបត្តិជនភៀសខ្លួនដែលលឿនបំផុតនៅអឺរ៉ុបចាប់តាំងពីសង្គ្រាមលោកលើកទីពីរមក ព្រមទាំងបានធ្វើការព្យាករថា ជនភៀសខ្លួននឹងមានដល់ ៤លាននាក់ ឬច្រើនជាងនេះ នឹងចាកចេញពីអ៊ុយក្រែនក្នុងពេលដ៏ខ្លីខាងមុខ។
ក្នុងចំណោមជនភៀសខ្លួនសរុប មានប្រហែល៦០% ឬស្មើនឹងជាង ១,៨លាននាក់ បានឆ្លងព្រំដែនចូលទៅក្នុងប្រទេសប៉ូឡូញ។ ប៉ូឡូញបានរៀបចំឲ្យជនភៀសខ្លួន ស្នាក់នៅបណ្ដោះអាសន្ននៅតាមស្ថានីយ៍រថភ្លើង សណ្ឋាគារ និងកន្លែងប្រកួតកីឡា ហើយបានអនុញ្ញាតឱ្យពួកគេប្រើប្រាស់មធ្យោបាយធ្វើដំណើរសាធារណៈដោយឥតគិតថ្លៃផងដែរ។
អ្នកដែលបានទៅជ្រកកោននៅប៉ូឡូញទាំងអស់ មានមនុស្សរាប់រយនាក់បានធ្វើដំណើរទៅដល់ កណ្តាលក្រុងវ៉រសរ(Warsar) រដ្ឋធានីរបស់ប៉ូឡូញ។ ប្រការនេះធ្វើឲ្យទីតាំងជាច្រើនកកកុញទៅដោយមនុស្សឈរតម្រង់ជួរ ស្ទើរទទួលលែងបាន។
អត្ថបទគួរអាន
ដំណាក់កាលនេះ កាតព្វកិច្ចផ្តល់ជំនួយដល់ជនភៀសខ្លួនអ៊ុយក្រែន បានធ្លាក់ចុះដល់ប្រទេសនានា ពិសេសប្រទេសដែលមានព្រំដែនជាប់នឹងអ៊ុយក្រែន ប៉ុន្តែកាតព្វកិច្ចទាំងនេះធ្លាក់មក មិនសមាមាតទៅតាមប្រទេសនីមួយៗនោះទេ។ ជាពិសេសបន្ទុកទាំងនេះកំពុងក្លាយជាបញ្ហាប្រឈមសម្រាប់តំបន់អឺរ៉ុបទាំងមូល។
ជាក់ស្តែង ប្រទេសម៉ុលដាវីបានទទួលជនភៀសខ្លួនតែជាង៣០ម៉ឺននាក់ប៉ុណ្ណោះ ស្មើនឹងជាង១០% នៃចំនួនជនភៀសខ្លួនសរុប។ អាល្លឺម៉ង់ទើបតែបានប្រកាសកាលពីថ្ងៃសៅរ៍ថា នឹងទទួលយកជនភៀសខ្លួនមួយចំនួនដែរ។ ចក្រភពអង់គ្លេសប្រកាសផ្តល់ថវិកាជិត៥០០ដុល្លារក្នុងមួយខែ ដល់គ្រួសារពលរដ្ឋអង់គ្លេសណា ដែលទទួលយកជនភៀសខ្លួនអ៊ុយក្រែនឲ្យស្នាក់នៅជាមួយ។
សូមជម្រាបថា សហភាពអឺរ៉ុបចាត់ទុកជម្លោះនៅអ៊ុយក្រែនថា ជាការគំរាមកំហែងដោយផ្ទាល់ដល់សន្តិសុខរបស់ខ្លួន។ ប្លុកនេះបានអនុម័តភ្លាមៗ យល់ព្រមផ្តល់អាទិភាពជាបណ្តោះអាសន្នដល់ជនភៀសខ្លួនអ៊ុយក្រែន រួមទាំងសិទ្ធិស្នាក់នៅ ការទទួលបានការងារ និងការអប់រំ ក្នុងពេលត្រឹមតែមួយសប្តាហ៍បន្ទាប់ពីសង្គ្រាមបានចាប់ផ្តើម។ យ៉ាងណាមិញ ការចំណាយត្រូវបានរំពឹងថា នឹងកើនឡើងនៅពេលដែលសង្គ្រាមនៅតែបន្ត ហើយចំនួនជនភៀសខ្លួនក៏នឹងកើនឡើងបន្ថែមទៀតដែរ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
