តាមរយៈបណ្ដាញសង្គម Instagram លោកជំទាវ ជា សេរី បានបង្ហោះសារ ថា លោកជំទាវត្រូវបានទូរទស្សន៍ CNBC សម្ភាសអំពីវិធានការរបស់កម្ពុជាក្នុងការដោះស្រាយបញ្ហាកូវីដ១៩។
លោកជំទាវ ជា សេរី បាននិយាយដូច្នេះថា “តើវានឹងគ្រប់គ្រាន់ទេ? ពេលវេលានឹងឆ្លើយសំណួរនេះបាន។ ប៉ុន្តែ ចាប់ពីពេលនេះ រហូតដល់ដំណាច់ឆ្នាំ យើងគួរតែមិនអីទេ។ ប៉ុន្តែ ចាប់ពីពេលនេះ រហូតដល់ពេលនោះ វានឹងផ្តល់ឱ្យរដ្ឋាភិបាលនូវពេលវេលាបន្ថែមទៀត ដើម្បីគិតពីវិធានការបន្ថែមទៀត។”
កម្ពុជា ក៏ដូចជាប្រទេសដទៃទៀតដែរ គឺមិនបានត្រៀមខ្លួនជាមុននោះទេ សម្រាប់ផលប៉ះពាល់ដ៏ធំធេងមកលើវិស័យទេសចរណ៍ ដោយសារវីរុសកូវីដ១៩។ នេះបើយោងតាមការអះអាងរបស់លោកជំទាវ ជា សេរី។
អត្ថបទទាក់ទង
លោកជំទាវបានបន្តថា កម្ពុជាបានដឹងថា នឹងមានផលប៉ះពាល់មកលើវិស័យកាត់ដេរ ហើយរដ្ឋាភិបាលនិងធនាគារជាតិបានត្រៀមខ្លួនរួចជាស្រេចសម្រាប់សេណារីយ៉ូដែលអាក្រក់ នៅពេលដែលផ្នែកខ្លះនៃ EBA ត្រូវបានដក។
ក៏ប៉ុន្តែ លោកជំទាវបានសរសេរដូច្នេះថា “ចំពោះផ្នែកដែលមិនសូវជាវិជ្ជមាន យើងមិនបានត្រៀមខ្លួនសម្រាប់ផលប៉ះពាល់ធំធេងលើឧស្សាហកម្មទេសចរណ៍ទេ (ដូចប្រទេសដទៃទៀតដែរ)។”
បុគ្គលិកសណ្ឋាគារម្នាក់នៅខេត្តសៀមរាប ដែលនិយាយក្នុងលក្ខខណ្ឌសុំមិនបញ្ចេញអត្តសញ្ញាណ បានអះអាងថា និយោជកបានកាត់ប្រាក់ខែគាត់ ៥០ភាគរយ ដោយឲ្យធ្វើការកន្លះខែ សម្រាកកន្លះខែ បន្ទាប់ពីមានការប៉ះពាល់ដោយសារកូវីដ១៩ ហើយសណ្ឋាគារនេះប្រកាសផ្អាករហូតដល់ខែមិថុនា។
លោកបាននិយាយដូច្នេះថា “អ៊ីចឹងខ្ញុំគិតថា អូតែលផ្សេង ដែលមិនមែនអូតែលផ្កាយ៥ ឬ ផ្កាយ៥ ក្នុងស្រុក គឺប៉ះពាល់ខ្លាំងជាងនេះ។”
លោកបាននិយាយថា “សម្រាប់ប្រាក់ខែខ្ញុំ គឺត្រៀមសម្រាប់តែបង់ធនាគារទាំងអស់ ហើយប្រាក់ខែប្រពន្ធ គឺសម្រាប់តែថ្លៃចាយប្រចាំថ្ងៃ តែឥឡូវ ពួកខ្ញុំទាំងពីរត្រូវកាត់ប្រាក់ខែ អ៊ីចឹង វារាងលំបាកបន្តិចហើយ តែបើធនាគារអាចពន្យារពេល ឬឲ្យបង់តែ ៥០ភាគរយ គឺអាចដោះស្រាយបាន៕”
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
