តើសេដ្ឋកិច្ចវៀតណាមដើរលឿនកម្រិតណាហើយ?

ឆ្នាំ២០១៦ សេដ្ឋកិច្ចវៀតណាមមានកំណើនក្នុងអត្រា ៦,២១ភាគរយ ខណៈដែលប្រទេសអាស៊ានដទៃទៀត ដូចជា ឥណ្ឌូនេស៊ី ថៃ ម៉ាឡេស៊ី និងសិង្ហបុរី មានកំណើនសេដ្ឋកិច្ចយឺតជាងបណ្ដាឆ្នាំមុនៗ ដោយសារតែការថមថយចុះនៃពាណិជ្ជកម្មពិភពលោក និងកំណើនយឺតនៅក្នុងប្រទេសចិន។

ទិដ្ឋភាពអគារខ្ពស់ៗនៅក្នុងទីក្រុងហូជីមិញ វៀតណាម

នេះបើយោងតាមការចុះផ្សាយរបស់សារព័ត៌មានលើអ៊ិនថឹណិតមួយ ឈ្មោះ Asian Correspondent។

សារព័ត៌មានដដែល សរសេរថា នៅបណ្ដាឆ្នាំខាងមុខ សេដ្ឋកិច្ចវៀតណាមក៏ទំនងនៅតែបន្តកើនឡើងក្នុងអត្រាខ្ពស់គួរឲ្យកត់សម្គាល់ដដែល។

ឆ្នាំ២០១៦ វិនិយោគទុនផ្ទាល់ពីបរទេស (FDI) របស់ប្រទេសវៀតណាម បានកើនឡើង ៩ភាគរយ គឺកើនឡើងដល់ចំនួន ១៥,៨ពាន់លានដុល្លារ ដែលខ្ពស់ជាងបណ្ដាឆ្នាំណាៗទាំងអស់កន្លងមក។ វិស័យរោងចក្រផលិតកម្មរបស់ប្រទេសនេះ កើនឡើង ១៣,៦ភាគរយ។ បរិមាណនាំចូលសរុបប្រចាំឆ្នាំ២០១៦ កើនឡើង ៤,៦ភាគរយ រីឯការនាំចេញវិញ កើនឡើងដល់ទៅ ៨,៦ភាគរយ ដែលនាំឲ្យសម្រេចបានអតិរេកពាណិជ្ជកម្ម (ផលលើសនៃពាណិជ្ជកម្ម) ចំនួន ២ពាន់ ៦៨០លានដុល្លារអាមេរិក។

មូលហេតុ៣យ៉ាងដែលជំរុញសេដ្ឋកិច្ចវៀតណាមឲ្យដើរលឿន

មូលហេតុទី១ - សេដ្ឋកិច្ចវៀតណាមមានពិពិធកម្មល្អ

ប្រទេសវៀតណាមបានធ្វើពិពិធកម្មសេដ្ឋកិច្ចរបស់ខ្លួន ទាំងការផលិតទំនិញសម្បូរបែបច្រើនមុខ និងទាំងគោលដៅនាំចេញកាន់តែច្រើន។ បច្ចុប្បន្ន វៀតណាមនាំផលិតផលចេញទៅកាន់ទីផ្សារច្រើនជាងមុន និងបានពង្រីកការនាំចេញក្នុងវិស័យរោងចក្រផលិត និងវិស័យគ្រឿងអេឡិចត្រូនិក យ៉ាងឆាប់រហ័ស ដោយកាត់បន្ថយការពឹងផ្អែកខ្លាំងទៅលើតែការនាំចេញផលិតផលកសិកម្ម។

មូលហេតុទី២ - ចំនួនប្រជាជនវៀតណាមកើនឡើង

វៀតណាមបានក្លាយជាគោលដៅវិនិយោគដែលកាន់តែមានភាពទាក់ទាញ ដោយសារចំនួនប្រជាជនកើនឡើងយ៉ាងរហ័ស ដែលបច្ចុប្បន្ន ប្រទេសនេះមានប្រជាជនសរុបដល់ទៅជាង ៩១លាននាក់ ដែលនាំឲ្យសម្បូរកម្លាំងពលកម្មវ័យក្មេងនិងមានសមត្ថភាព ទាំងពលកម្មជំនាញ ទាំងពលកម្មគ្មានជំនាញ។ មួយវិញទៀត ភូមិសាស្ត្ររបស់វៀតណាមក៏នៅតែជាកត្តាសំខាន់ ដោយបង្កលក្ខណៈងាយស្រួលដល់ការធ្វើពាណិជ្ជកម្មតាមផ្លូវសមុទ្រជាមួយប្រទេសនានានៅក្នុងតំបន់ជុំវិញ និងហួសពីនេះទៅទៀត។

មូលហេតុទី៣ - ថ្លៃពលកម្មនិងចំណាយប្រតិបត្តិការទាប

ការចំណាយលើថ្លៃពលកម្មនិងប្រតិបត្តិការនៅប្រទេសវៀតណាម គឺស្ថិតនៅកម្រិតទាបនៅឡើយ ជាពិសេស ធៀបនឹងមហាយក្សចិនដែលជាអ្នកជិតខាង។ កត្តានេះបាននាំឲ្យមានកំណើនលើវិស័យរោងចក្រផលិត និងបើកឱកាសដល់ក្រុមហ៊ុនពហុជាតិសាសន៍ និងវិនិយោគិនបរទេសមករកស៊ីគគ្រឹកគគ្រេង។ ក្រុមហ៊ុនជាច្រើនបានបង្កើតនិងអនុវត្តយុទ្ធសាស្ត្រ «ចិនបូកមួយ» ដែល «មួយ» គឺវៀតណាមនេះឯង៕