កាលពីពេលថ្មីៗនេះ មានប្រភពសំខាន់២ បានប្រាប់ទៅកាន់ សារព័ត៌មាន Financial Times ថា ក្រុមហ៊ុនមេរបស់ TikTok គឺ ByteDance មានគម្រោងនឹងបោះផ្សាយមូលបត្រក្នុងផ្សារហ៊ុន នៅត្រីមាសទី១នៅឆ្នាំក្រោយនេះ ហើយក្រុមហ៊ុននេះ បានជ្រើសយកផ្សារហ៊ុនហុងកុង រំលងផ្សារហ៊ុននៅទីក្រុង New York។
ទោះយ៉ាងណា អ្នកនាំពាក្យក្រុមហ៊ុន TikTok បានបដិសេធយ៉ាងដាច់អហង្ការនៅក្នុងសារព័ត៌មាន Business Insider ថា «គ្មានពិតសូម្បីតែបន្ដិច ចំពោះពាក្យចចាមអារាម ដែលថា យើងមានគម្រោងនឹងចុះបញ្ចីផ្សារហ៊ុននៅហុងកុង នៅត្រីមាសទី១»។ ទន្ទឹមនឹងនេះ តាមការរាយការណ៍ពីសារព័ត៌មាន Reuters ដែលបានស្រង់សម្ដីពីប្រភពចំនួន៤ ដែលជិតស្និទនឹងក្រុមហ៊ុន ByteDance ក៏បានបញ្ជាក់ដែរថា ក្រុមហ៊ុនគ្មានគម្រោងជាក់លាក់ថា នឹងចុះបញ្ជីផ្សារហ៊ុននោះឡើយ។
អត្ថបទទាក់ទង!
Bytedance គឺជាក្រុមហ៊ុនមេរបស់ បណ្ដាញសង្គម TikTok ដែលជាបណ្ដាញសង្គមមួយដ៏ពេញនិយមបំផុត និងមានអ្នកប្រើប្រាស់នៅទូទាំងពិភពលោក។ ថ្មីៗនេះ តាមការរាយការណ៍ បានឲ្យដឹងថា បណ្ដាញសង្គមរបស់ចិនមួយនេះមានតម្លៃ ជាទឹកប្រាក់ ប្រមាណ៧៥ ពាន់លានដុល្លារអាមេរិក។
TikTok ទទួលបានជោគជ័យលើទីផ្សារសកលលោកខ្លាំងជាងគេបំផុត គឺនៅសហរដ្ឋអាមេរិក និងឥណ្ឌា ដែលមានអ្នកពេញនិយមប្រើប្រាស់ខ្លាំងជាងគេ។ មិនតែ ប៉ុណ្ណោះ បណ្ដាញសង្គមយក្សរបស់ចិនមួយនេះ ក៏ត្រូវបានគេចាត់ទុកថា ជាដៃគូប្រកួតប្រជែងដ៏ធំមួយរបស់ក្រុមហ៊ុនបណ្ដាញសង្គមយក្សរបស់អាមេរិក គឺ Facebook ផងដែរ។
តាមការបែកធ្លាយនូវសំឡេងឆ្លើយឆ្លងសំណួរជាមួយនឹងលោក Mark Zuckerberg ស្ថាបនិក និងជានាយកប្រតិបត្តិ ក្រុមហ៊ុន Facebook បានបង្ហាញថា លោក Mark ចាត់ទុកបណ្ដាញសង្គម TikTok គឺជាការគំរាមកំហែង ហើយមានអ្នកនយោបាយអាមេរិកជាច្រើន បានសម្ដែងការព្រួយបារម្ភអំពីកម្មវិធីបណ្ដាញសង្គមមួយនេះ។
ក្រុមហ៊ុនមេបណ្ដាញសង្គម TikTok ត្រូវបានរាយការណ៍ថា បានរកចំណូលពីកម្មវិធីបណ្ដាញសង្គមនេះ ចន្លោះពី ៧ពាន់លាន ទៅ ជាង៨ពាន់លានដុល្លារអាមេរិក កាលពីពាក់កណ្ដាលឆ្នាំ២០១៩ កន្លងមកនេះ ដែលវាគឺជាប្រាក់ចំណូលដែលមានខ្ពស់លើសអ្វីដែលជាការរំពឹងទុករបស់ក្រុមហ៊ុន។
ដោយសារតែប្រាក់ចំណូលបង្ហាញពីកំណើនខ្ពស់ ក្រុមហ៊ុនមេរបស់ TikTok រំពឹងប្រាក់ចំណូលនៅឆ្នាំ២០១៩នេះ ប្រមាណ ១៧ ពាន់លានដុល្លារអាមេរិក ខណៈដែលការកំណត់ដៅ កាលពីមុនមានតែ១៤ ពាន់លានដុល្លារអាមេរិកប៉ុណ្ណោះ។
តាមរបាយការណ៍មួយពី បណ្ដាញសារព័ត៌មានបច្ចេកវិទ្យាអនឡាញ The Information បានឲ្យដឹងថា ប្រាក់ចំណូលរបស់ TikTok កាលពីឆ្នាំ២០១៨ មាន៧,២ ពាន់លានដុល្លារអាមេរិក៕
None
