ព្រឹត្តិការណ៍កីឡាអូឡាំពិកដ៏ធំនៅជប៉ុនឆ្នាំនេះអាចនឹងពន្យាពេល ឬ លុបចោល?

ក្នុងចំណោមទីក្រុងសរុប ៥២៨ ដែលបានចុះឈ្មោះជាទីតាំងត្រៀមទទួលអត្តលិកបរទេសសម្រាប់ព្រឹត្តិការណ៍អូឡាំពិក មានប្រមាណជាង៤០ ទីក្រុងហើយ ដែលអាជ្ញាធរជប៉ុនសម្រេចដកខ្លួនចេញ លែងទទួលកីឡាករបរទេសទៀតហើយ។

អាជ្ញាធរខេត្តអ៊ីបារ៉ាគីប្រទេសជប៉ុន បានប្រាប់សារព័ត៌មាន Nikkei ថា ការដែលសម្រេចចិត្តដកខ្លួនឈប់ទទួលកីឡាករបរទេសដែលនឹងមកប្រកួតកីឡាអូឡាពិក ដោយសាររដ្ឋាភិបាលជប៉ុនបានប្រាប់ឲ្យខេត្ត ត្រៀមគ្រែពេទ្យសម្រាប់កីឡាករទាំងនោះ។

អាជ្ញាធរនៃខេត្ត និងក្រុងជាប់មាត់សមុទ្រមួយនេះបានអះអាងទៀតថា ខ្លួនមិនអាចផ្តល់អាទិភាពឲ្យទៅជនបរទេសមុនប្រជាជនខ្លួនបានទេ អំឡុងពេលកូវីដ-១៩រាតត្បាតដូចនេះ។

គេសង្កេតឃើញថា រដ្ឋបាលនៅតាមខេត្តក្រុងទាំង ៤០ ដែលដកខ្លួននេះ បានទទូចឲ្យរដ្ឋាភិបាលជប៉ុនដឹកនាំដោយ លោក ស៊ូហ្កា លើកពេលព្រឹត្តិការណ៍អូឡាំពិកបន្តទៀត ឬក៏អាចពិចារណាលុបចោលព្រឹត្តិការណ៍នេះតែម្តង។

ទោះបីកន្លងមក រដ្ឋាភិបាលជប៉ុនបានធានាអះអាងថា ខ្លួននឹងរៀបចំអូឡាំពិកឲ្យបានល្អ និងមានសុវត្ថិភាពក្តី ប៉ុន្តែភាពស្រពេចស្រពិលជុំវិញការរៀបចំព្រឹត្តិការណ៍កីឡាដ៏ធំនេះនៅតែកើតមាន។ ស្រពេចស្រពិល គឺដោយសារតែ សាធារណជនភាគច្រើនបានបង្ហាញមតិផ្ទុយពីរដ្ឋាភិបាលជប៉ុន ជាក់ស្តែង បើតាមការស្ទង់មតិ មានប្រជាជនជប៉ុនដល់ជាង ៧០%ទៅហើយចង់ឲ្យរដ្ឋាភិបាលលើកពេល ឬលុបការប្រារព្ធកីឡាអូឡាំពិកចោលតែម្តង។

ផ្ទុយទៅវិញ គណៈកម្មាធិការអូឡាំពិកអន្តរជាតិ ហៅកាត់ថា IOC នៅថ្ងៃពុធសប្តាហ៍នេះ បែរជាគាំទ្រឲ្យជប៉ុន គោលជំហររបស់រដ្ឋាភិបាលជប៉ុនក្នុងការបន្តប្រារព្ធអូឡាំពិកទៅវិញ ទោះបីជាប្រឆាំងគ្នានឹងសាធារណមតិក្តី។

គួរជម្រាបថា បើតាមគម្រោងព្រឹត្តិការណ៍កីឡាអូឡាំពិកដ៏ធំនៅជប៉ុនក្នុងឆ្នាំនេះ នឹងត្រូវធ្វើឡើងនៅថ្ងៃទី២៣ កក្កដា ដល់៨សីហា ឆ្នាំ២០២១។ 

ការប្រឆាំងជាសាធារណៈ ថែមទាំងមានការធ្វើបាតុកម្មផងដែរ ចំពោះព្រឹត្តិការណ៍កីឡាអូឡាំពិកកំពុងកើនឡើងច្រើននៅក្នុងប្រទេសជប៉ុន ខណៈដែលប្រទេសមួយនេះ កំពុងព្យាយាមទប់ទល់នឹងការឆ្លងរាលដាលកូវីដ-១៩ រលកទីបួន ដែលកំពុងជំរុញឲ្យធនធានវេជ្ជសាស្ត្រសុខាភិបាលជប៉ុនប្រឈមនឹងហានិភ័យកាន់តែខ្លាំង។

រដ្ឋាភិបាលជប៉ុន បានរងការរិះគន់ថា មិនបានចាត់វិធានការ បិទខ្ទប់ប្រទេសឱ្យបានគ្រប់ជ្រុងជ្រោយ ហើយការចាក់វ៉ាក់សាំងដល់ពលរដ្ឋមានកម្រិតតិចតួចខ្លាំងបើធៀបនឹង ប្រទេសអ្នកមានផ្សេងទៀត។

សូមបញ្ជាក់ថា បើតាមទិន្នន័យពីភ្នាក់ងារ Reuters ប្រទេសជប៉ុន មានអ្នកឆ្លងកូវីដ-១៩ជាមធ្យម ៦ពាន់នាក់ក្នុងមួយថ្ងៃ ខណៈដែលអ្នកឆ្លងសរុបមានជាង ៦៦ម៉ឺននាក់ ស្លាប់ជាង១ម៉ឺន១ពាន់នាក់៕