ទោះបីតម្លៃមាសបានហក់ឡើងដល់កម្រិតកំណត់ត្រាយ៉ាងណាក្តី តែលោក វ៉ារ៉េន ប៊ូហ្វេត ប្រធានក្រុមប្រឹក្សាភិបាលគ្រប់គ្រងក្រុមហ៊ុន Berkshire Hathaway ដែលជាកំពូលមហាសេដ្ឋីមានទ្រព្យដល់ទៅ១៣៩ពាន់លានដុល្លារ និងជាអ្នកវិនិយោគជោគជ័យបំផុតមួយនៅលើពិភពលោកបែរជាមិនចាប់អារម្មណ៍វិនិយោគលើលោហៈដ៏មានតម្លៃមួយនេះទៅវិញ។ ហេតុអ្វីមហាសេដ្ឋីរូបនេះមិនចាប់អារម្មណ៍វិយោគលើមាស?
ឆ្លើយតបទៅនឹងសំណួរនេះ គេហទំព័រព័ត៌មានទីផ្សារភាគហ៊ុន ដែលមានឈ្មោះថា Investing News Network បានអះអាងថា មានហេតុផលជាច្រើន ដែលធ្វើឱ្យកំពូលមហាសេដ្ឋីវ័យ៩៣ឆ្នាំរូបនេះមិនចាប់អារម្មណ៍វិនិយោគក្នុងវិស័យនេះ។ ក្នុងនោះលោក ប៊ួហ្វេត បានបញ្ជាក់តាំងពីឆ្នាំ២០១១ មកថា មាសជាទ្រព្យសម្បត្តិ និងជាឧបករណ៍ជូញដូរ ដែលផលិតភាពរបស់វាមានកម្រិត។ កំពូលមហាសេដ្ឋីរូបនេះអះអាងថា ទោះបីបច្ចុប្បន្នតម្លៃមាស បានហក់ឡើងយ៉ាងណាក៏ដោយ តែដល់ពេលណាមួយវាឡើងឆ្អែត ហើយនឹងលែងមានអ្នកចាប់អារម្មណ៍ទិញវា ហើយពេលនោះតម្លៃរបស់វានឹងដាំក្បាលចុះដោយស្វ័យប្រវត្តិ។
អត្តបទគួរអាន
លោក ប៊ូហ្វេត បានសង្កត់ធ្ងន់ថា ការវិនិយោគលើភាគហ៊ុន ឬកសិកម្ម អាចនឹងទទួលបានផលចំណេញ និងប្រយោជន៍ ក៏ដូចជាភាគលាភច្រើន ចំណែកមាសពេលទិញមួយអោន គឺវានៅតែមួយអោន មិនអាចបានពីរអោននោះទេ។ អ្នកជំនាញផ្នែកហិរញ្ញវត្ថុរូបនេះ ក៏បានព្រមានប្រឆាំងនឹងការធ្វើឱ្យមាសក្លាយជាធាតុផ្សំដ៏សំខាន់នៃផលប័ត្រវិនិយោគណាមួយផងដែរ។
ពាក់ព័ន្ធនឹងបញ្ហានេះលោក ឌូង បូណេផាត (Doug Boneparth ) អ្នករៀបចំផែនការហិរញ្ញវត្ថុ និងជាប្រធានក្រុមហ៊ុនទីប្រឹក្សាហិរញ្ញវត្ថុសហរដ្ឋអាម៉េរិក Bone Fide Wealth បាននិយាយថា មាសមិនអាចនៅតែជាឃ្លាំងតម្លៃ ដែលមនុស្សអាចរំពឹងទុកបានរហូតនោះទេ។ សម្រាប់អ្នកជំនាញរូបនេះ មាសមានតម្លៃនៅពេលដែលគេត្រូវការវាតែប៉ុណ្ណោះ ហើយវានឹងអស់តម្លៃនៅពេលដែលវាលែងក្លាយជាទ្រព្យសកម្មដែលមនុស្សត្រូវការ ដូច្នេះសូមប្រុងប្រយ័ត្ននៅក្នុងការវិនិយោគនៅលើមាស។
អ្នកវិភាគបានអះអាងថា អ្នកដែលកំពុងកាន់កាប់មាសនៅតែមានសុទិដ្ឋិនិយម ដោយលើកឡើងថា មាសជាឧបករណ៍ជួញដូរ ដែលអាចការពារហានិភ័យពីការកើនឡើងអតិផរណា និងវិបត្តិបំណុលដែលកំពុងកើនឡើងនៅក្នុងប្រព័ន្ធសេដ្ឋកិច្ចសកល៕
ដោយៈ សរ សុជាតិ
None
