នាយករដ្ឋមន្ត្រីវៀតណាម ស្នើឱ្យសហគ្រាសរដ្ឋទាំងឡាយជួលនាយកប្រតិបត្តិ ឬ CEO បរទេសមកគ្រប់គ្រងដើម្បីជួយបណ្ដុះធនធានមនុស្ស

អំឡុងជំនួបជាមួយនាយកប្រតិបត្តិមកពីសហគ្រាសរដ្ឋធំៗជាង១៥០ កាលពីថ្ងៃទី១៦ ខែមិថុនា នាយករដ្ឋមន្ត្រីវៀតណាម លោក ផាម មិញ ជិញ (Pham Minh Chinh) បានគូសបញ្ជាក់ថា ការបណ្ដុះធនធាន​មនុស្សជាកត្តាដ៏សំខាន់ក្នុងការរួមចំណែកជួយអភិវឌ្ឍប្រទេសជាតិ ហើយលោកបានស្នើឱ្យសហគ្រាសរដ្ឋទាំងនោះពិចារណាជួលនាយកប្រតិបត្តិ (CEO) ឬថ្នាក់ដឹកនាំកំពូលៗជាជនបរទេសឱ្យមកគ្រប់គ្រង ដើម្បីជួយបណ្ដុះធនធានមនុស្ស។

លោកបានជំរុញឱ្យបណ្ដាសហគ្រាសរដ្ឋកែសម្រួលគោលនយោបាយប្រាក់បៀវត្សរ៍កាន់តែប្រសើរ ដើម្បីទាក់ទាញធនធានមនុស្សប្រកបដោយគុណភាពខ្ពស់ពីក្រៅប្រទេស ខណៈអាជីវកម្មភាគច្រើនដែលត្រូវបានគ្រប់គ្រងដោយថ្នាក់ដឹកនាំក្នុងស្រុក ពោលគឺជនជាតិវៀតណាម មានសមត្ថភាពមានកម្រិត និងប្រសិទ្ធភាពអាជីវកម្មទាប។

ទន្ទឹមនឹងនេះនៅក្នុងកិច្ចប្រជុំមួយកាលពីខែមីនា រដ្ឋមន្ត្រីក្រសួងផែនការ និងវិនិយោគលោក ង្វៀន ជី ឌុង (Nguyen Chi Dung) បាននិយាយថា បច្ចុប្បន្នបណ្ដាសហគ្រាសរដ្ឋមិនមានស្វ័យភាពទេ ហើយកម្មករនិយោជិតជាពិសេសនៅថ្នាក់គ្រប់គ្រងមិនត្រូវបានលើកទឹកចិត្តឱ្យបង្កើនសមត្ថភាពរបស់ខ្លួនឱ្យអស់លទ្ធភាពនោះឡើយ។

សូមបញ្ជាក់ថា កាលពីឆ្នាំមុន ប្រាក់ចំណូលសរុបរបស់បណ្ដាសហគ្រាសរដ្ឋត្រូវបានប៉ាន់ប្រមាណថាមានចំនួនជាង៦៧ពាន់លានដុល្លារអាម៉េរិក និងទទួលបានប្រាក់ចំណេញមុនកាត់ពន្ធប្រមាណ៤,៩ពាន់លានដុល្លារអាម៉េរិក៕

ដោយ: តែម សុខុម