លោក ត្រាំ ច្រានចោលសាលក្រម ដែលបញ្ជាឱ្យរដ្ឋបាលខ្លួនទូទាត់ជំនួយបរទេសទំហំ២ពាន់លានដុល្លារ

រដ្ឋបាលរបស់លោក ដូណាល់ ត្រាំ កាលពីថ្ងៃទី២៦ ខែកុម្ភៈ បានដាក់បណ្តឹងឧទ្ធរណ៍បន្ទាន់មួយនៅតុលាការកំពូលប្រឆាំងនឹងការសម្រេចរបស់សាលាដំបូងកម្រិតស្រុក ដែលបានយល់ព្រមតាមសំណើទាមទារដោយក្រុមអង្គការមិនរកប្រាក់ចំណេញ ដែលស្នើសុំឲ្យរដ្ឋាភិបាលទូទាត់ថវិការជំនួយ ដែលមានតម្លៃប្រមាណ២ពាន់លានដុល្លារ។ បច្ចុប្បន្នសំណុំរឿងនេះ កំពុងស្ថិតក្នុងដៃរបស់តុលាការកំពូល ហើយក្រុមអ្នកច្បាប់កំពុងពិចារណាលើសំណើនេះ។

គួររំលឹកថា ក្រុមអង្គការមិនរកប្រាក់ចំណេញ និងអ្នកម៉ៅការ បានប្តឹងរដ្ឋបាលរបស់លោក ត្រាំ ជុំវិញការបង្កកមូលនិធិរបស់ទីភ្នាក់ងារសហរដ្ឋអាម៉េរិក សម្រាប់ការអភិវឌ្ឍន៍អន្តរជាតិ (USAID) និងរបស់ក្រសួងការបរទេស ដែលគ្រោងចំណាយដល់ពួកគេ។ បើយោងតាមដីកាសម្រេច ចៅក្រមនៃសាលាដំបូងកម្រិតស្រុកបានបញ្ជាឱ្យក្រសួងការបរទេស និង USAID ស្តារមូលនិធិសម្រាប់កិច្ចសន្យាដែលព្យួរដោយរដ្ឋបាលរបស់លោក ត្រាំ ដែលមានតម្លៃប្រមាណ២ពាន់លានដុល្លារ។

ជុំវិញការទាមទារនេះ រដ្ឋបាលរបស់លោក ត្រាំ បានប្រាប់តុលាការកំពូលថា រដ្ឋាភិបាលមិនអាចធ្វើការទូទាត់ប្រាក់តាមការទាមទារដែលបានកំណត់តាមអំពើចិត្តតាមការសម្រេចរបស់សាលាដំបូងបានទេ។ ក្រុមអ្នកច្បាប់របស់រដ្ឋបាល ត្រាំ បានលើកឡើងថា ផែនការនៃការទូទាត់មិនអាចទទួលយកបាននោះទេដោយសារវាខុសពីកាតព្វកិច្ចរបស់ប្រធានាធិបតី ដែលមានតួនាទីការពារសិទ្ធិអធិបតេយ្យ នៃសារពើពន្ធសហព័ន្ធ និងវិនិច្ឆ័យសមស្របពីជំនួយបរទេស។

គួរបញ្ជាក់ថា រឿងក្តីក្តាំនេះបានកើតឡើងក្រោយលោក ត្រាំ បញ្ជាឱ្យផ្អាករាល់ប្រតិបត្តិការជំនួយបរទេសទាំងអស់ ដែលប្រតិបត្តិការដោយទីភ្នាក់ងារសហរដ្ឋអាម៉េរិក សម្រាប់ការអភិវឌ្ឍន៍អន្តរជាតិ រយៈពេល៩០ថ្ងៃ៕

ដោយៈ សរ សុជាតិ