លោកស្រី Liz Truss លេខាធិការពាណិជ្ជកម្មអន្តរជាតិរបស់អង់គ្លេសបានគូសបញ្ជាក់ថា អង់គ្លេសចង់ចូលរួមជាមួយកិច្ចព្រមព្រៀងពាណិជ្ជកម្មដ៏ធំមួយនេះ ហើយអ្នកស្រីនឹងដាក់សំណើរជាផ្លូវការទៅកាន់ក្រុមប្រទេសស្ថាបនិកទាំង១១ របស់ CPTPP នៅក្នុងថ្ងៃច័ន្ទទី១ ដើមខែកុម្ភៈផ្ទាល់តែម្តង។
លោកស្រីបន្ថែមថា៖«ចូលរួមជាមួយ CPTPP នឹងជួយកាត់បន្ថយរបាំងពន្ធគយក្នុងការនាំចេញផលិតផលអង់គ្លេសទៅលក់ក្នុងទីផ្សារប្រទេសទាំង១១»
លោក Boris Johnson នាយករដ្ឋមន្រ្តីអង់គ្លេសធ្លាប់បាននិយាយថា ទំហំពាណិជ្ជកម្មទ្វេភាគីនៃប្រទេសសមាជិកទាំង ១១ របស់កិច្ចព្រមព្រៀង CPTPP ជាមួយអង់គ្លេសមានទំហំ ៨,៤% នៃការនាំចេញសរុបរបស់ចក្រភពអង់គ្លេសក្នុងឆ្នាំ ២០១៩។ ដូចនេះ លោកជឿជាក់ថា ការចូលរួមក្នុងកិច្ចព្រមព្រៀងដ៏មានសក្តានុពលនេះ នឹងនាំមកនូវផលប្រយោជន៍សេដ្ឋកិច្ចយ៉ាងច្រើនសម្បើមសម្រាប់ប្រជាជនអង់គ្លេសទាំងមូល។
អត្ថបទទាក់ទង
កិច្ចព្រមព្រៀងវឌ្ឍនភាព និងគ្រប់ជ្រុងជ្រោយ សម្រាប់ភាពជាដៃគូអន្តរប៉ាស៊ីហ្វិក (CPTPP) ត្រូវបានបង្កើតឡើងនៅក្នុងឆ្នាំ២០១៨ ដោយប្រទេសស្ថាបនិកនិងជាសមាជិកចំនួន១១ រួមគ្នារួមមាន អូស្រ្តាលី កាណាដា ឈីលី ជប៉ុន ម៉ិចស៊ិចកូ ញូសស៊ីលែន ប៉េរូ និងប្រទេសនៃសមាជិកអាស៊ានចំនួន ៤ទៀតរួមមាន វៀតណាម ប៊្រុយណេ សិង្ហបុរី និងម៉ាឡេស៊ី ដែលក្នុងនោះប្រទេសជប៉ុនជាប្រទេសសមាជិកដែលមានទំហំសេដ្ឋកិច្ចធំជាងគេ។
បន្ថែមពីលើនេះ ប្រសិនបើអង់គ្លេសត្រូវបានចូលរួមជាមួយ CPTPP មែន អង់គ្លេសនឹងក្លាយជាប្រទេសមិនមែនស្ថាបនិកទី១ ដំបូងគេដែលបានចូលរួមក្នុងកិច្ចព្រមព្រៀងនេះ។
កិច្ចព្រមព្រៀងនេះទៀតសោត ត្រូវបានគេមើលឃើញថា ជាកិច្ចព្រមព្រៀងមួយដ៏មានឥទ្ធិពលសម្រាប់វឌ្ឍនភាពសេដ្ឋកិច្ច ដោយសារតែវានឹងមានការបើកចំហទីផ្សារ ក៏ដូចជាការអនុគ្រោះពន្ធដល់ជាង ៩០% សម្រាប់ប្រទេសជាសមាជិកទាំង១១ក្នុងការនាំចេញទំនិញ ខណៈដែលសរុបទំហំ GDP នៃប្រទេសជាសមាជិកទាំងអស់មានប្រមាណជាង ៤០% នៃសេដ្ឋកិច្ចសកល ឬស្មើនឹងទំហំទឹកប្រាក់ប្រមាណ ១០ទ្រីលានដុល្លារអាមេរិក និងគ្រប់ដណ្តប់លើប្រជាជនសរុបជិត ៥០០លាននាក់។
សូមបញ្ជាក់ថា កិច្ចព្រមព្រៀងវឌ្ឍនភាព និងគ្រប់ជ្រុងជ្រោយ សម្រាប់ភាពជាដៃគូអន្តរប៉ាស៊ីហ្វិក (CPTPP) បានចូលជាធរមានជាផ្លូវការកាលពីថ្ងៃទី ៣០ ខែធ្នូ ឆ្នាំ២០១៨កន្លងទៅ ដែលដើមឡើយកិច្ចព្រមព្រៀងនេះ ក៏មាន សហរដ្ឋអាមេរិកចូលរួមដែរ តែក្រោយមក លោកដូណាល់ត្រាំ ដែលជាប្រធាធិបតីអាមេរិកកាលគ្រានោះ បានសម្រេចដកខ្លួនចេញវិញ៕
None
