និយ័តករបរធនបាលកិច្ច ផ្ដល់នូវការបណ្ដុះបណ្ដាលស្តីពី “យន្តការ ការគ្រប់គ្រង និងការត្រួតពិនិត្យបរធនបាលកិច្ច” សម្រាប់ថ្នាក់ដឹកនាំ និងបុគ្គលិករបស់ក្រុមហ៊ុន កាណា ត្រាស ឯ.ក

កម្មវិធីបណ្ដុះបណ្ដាលនេះត្រូវបានរៀបចំឡើងក្នុងគោលដៅលើកកម្ពស់ការយល់ដឹងពីវិស័យបរធនបាលកិច្ច និងការអនុវត្តជាក់ស្ដែងឱ្យកាន់តែស៊ីជម្រៅដល់ថ្នាក់ដឹកនាំ និងបុគ្គលិករបស់ក្រុមហ៊ុន កាណា ត្រាស ឯ.ក ដែលជាប្រតិបត្តិករក្នុងវិស័យបរធនបាលកិច្ច។

សូមបញ្ជាក់ផងដែរថា បរធនបាលកិច្ច គឺជាចំណងគតិយុត្ត ដែលក្នុងនោះ បរធនបាលទាយក (ម្ចាស់ទ្រព្យ) ប្រគល់ទ្រព្យរបស់ខ្លួនឱ្យបរធនបាល (អ្នកជំនាញវិជ្ជាជីវៈ និងមានអាជ្ញាបណ្ណ) ឱ្យធ្វើការគ្រប់គ្រង ចាត់ចែង និងថែរក្សាសុវត្ថិភាព ឬថែរក្សាទុកជំនួស ដើម្បីជាប្រយោជន៍ដល់បរធនបាលទាយកវិញ ឬដល់ភាគីផ្សេងទៀត។

ដើម្បីអាចធ្វើប្រតិបត្តិការបរធនបាលកិច្ចបានដោយស្របច្បាប់ ក្រុមហ៊ុនបរធនបាលត្រូវមានគុណវុឌ្ឍិគ្រប់គ្រាន់​បំពេញតាមលក្ខខណ្ឌតម្រូវស្របតាមច្បាប់​និងបទប្បញ្ញត្តិដែលមានជាធរមាន​ និងទទួលបានអាជ្ញាបណ្ណ និងការអនុញ្ញាតពីនិយ័តករបរធនបាលកិច្ច។