ថ្លែងនៅក្នុងពិធីបើកសន្និសីទនៅទីក្រុងលូហ្កាណូ (Lugano) នៅប្រទេសស្វីស ស្ដីពីការស្ដារអ៊ុយក្រែនឡើងវិញនោះ នាយករដ្ឋមន្ត្រីអ៊ុយក្រែនលោក ដេនីស ស្ម៊ីហល់ (Denys Shmyhal) បានរៀបរាប់ពីការបំផ្លិចបំផ្លាញដ៏មហាធំធេង នៅអ៊ុយក្រែន និងបានទទួលស្គាល់ថា តម្រូវការផ្សេងៗបានកើនឡើងយ៉ាងខ្លាំង។
លោក ស្ម៊ីហល់ បាននិយាយថា ការស្ដារប្រទេសអ៊ុយក្រែនឡើងវិញ គឺគេបានប៉ាន់ប្រមាណរួចហើយថា នឹងត្រូវការថវិកា៧៥០ពាន់លានដុល្លារ ហើយអ៊ុយក្រែនជឿថា ប្រភពសំខាន់នៃការស្ដារឡើងវិញនេះគួរតែយកទ្រព្យសម្បត្តិ ដែលគេរឹបអូសបានពីប្រទេសរុស្ស៊ី និងមន្ត្រីរុស្ស៊ីមួយចំនួនទៀត ដើម្បីប្រើប្រាស់សម្រាប់កសាងប្រទេសអ៊ុយក្រែនឡើងវិញ។
លោកនាយករដ្ឋមន្ត្រីរូបនេះបានបញ្ជាក់ថា ប្រទេសរុស្ស៊ី គឺជាអ្នកបង្កសង្គ្រាមដ៏បង្ហូរឈាមនេះ ហើយពួកគេក៏ជាអ្នកបង្កការបំផ្លិចបំផ្លាញដ៏មហាវិនាសកម្មនេះផងដែរ ដូច្នេះហើយពួកគេត្រូវតែទទួលខុសត្រូវចំពោះសោកនាដកម្មទាំងអស់នេះ។
ចំណែកលោក ហ្សេលេស្គី ប្រធានាធិបតីអ៊ុយក្រែនវិញបាននិយាយតាមវីដេអូ ដោយសង្កត់ធ្ងន់ថា ការស្ដារប្រទេសអ៊ុយក្រែនឡើងវិញ គឺមិនមែនជាភារកិច្ចរបស់រដ្ឋាភិបាល និងប្រជាជនអ៊ុយក្រែនតែម្ខាងនោះទេ ប៉ុន្តែវាក៏ជាភារកិច្ចរួមនៃបណ្ដាប្រទេសគោរពកាន់លទ្ធិប្រជាធិបតេយ្យអស់នៅទូទាំងពិភពលោកផងដែរ ព្រោះការស្ដារអ៊ុយក្រែងឡើងវិញនេះ គឺជាការរួមចំណែកដ៏ធំបំផុតដល់ការគាំទ្រសន្តិភាពពិភពលោក។
អត្ថបទគួរអាន
ទោះជាយ៉ាងណានៅពេលជំនួយរាប់ពាន់លានដុល្លារបានហូរចូលក្នុងប្រទេសអ៊ុយក្រែននោះ គេនៅតែព្រួយបារម្ភពីការកើតមានអំពើពុករលួយដែលកំពុងរីករាលដាលនៅក្នុងប្រទេសនេះដែលចាំបាច់ត្រូវតែធ្វើកំណែទម្រង់ដ៏ទូលំទូលាយជាដដែល ហើយវានឹងក្លាយជាលក្ខខណ្ឌសម្រាប់ផែនការស្តារប្រទេសនេះឡើងវិញដែលគេបានសម្រេចនៅទីនោះផងដែរ។
លោក អ៊ីកណាស៊ីយ៉ូ ខាស៊ីស (Ignazio Cassis) ប្រធានាធិបតីស្វីសនិងជាសហប្រធានរៀបចំសន្និសីទនេះបានសង្កត់ធ្ងន់ថា កំណែទម្រង់នៅតែជាត្រីវិស័យនាំមុខ និងជាស្នូលដ៏សំខាន់ ដែលត្រូវតែជជែកគ្នានៅក្នុងកិច្ចប្រជុំនេះ ដើម្បីជា«គ្រឹះសម្រាប់ដំណើរការនយោបាយប្រកបដោយប្រសិទ្ធភាព និងតម្លាភាព»។
លោក ខាស៊ីស បាននិយាយថា លោកជឿជាក់ថា ភាពរឹងមាំរបស់អ៊ុយក្រែនក្នុងការប្រឈមមុខនឹងការឈ្លានពានរបស់រុស្ស៊ីនេះ គឺភាគច្រើនដោយសារតែកំណែទម្រង់ ដែលបានអនុវត្តនៅក្នុងប្រទេសនេះ។
លោក បានបញ្ជាក់ថា វាសំខាន់ណាស់ដែលកិច្ចខិតខំប្រឹងប្រែងទាំងនេះ បានបន្តដោយឥតងាករេជាពិសេសក្នុងការប្រយុទ្ធប្រឆាំងនឹងអំពើពុករលួយ និងការកែលម្អប្រព័ន្ធតុលាការឱ្យកាន់តែមានតម្លាភាពនិងឯករាជ្យភាពជាងមុន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
