ទន្ទឹមនឹងការថ្លែងដូចនេះ ប្រធានាធិបតីអ៊ុយក្រែន លោកហ្សេលេនស្គី បានបង្ហាញខ្សែវីដេអូខ្លីមួយ ដែលបង្ហាញអំពីសាកសពកំពុងឆេះ ស្នាមប្រឡាក់ឈាម ត្រូវបានគេបាញ់សម្លាប់ចងដៃទៅក្រោយ ក្នុងនោះរួមមាន សាកសពកុមារផងដែរក្នុងទីក្រុង អ៊ីបភីន(Irpin) ឌីមើការ(Dymerka) ក្រុងកំពង់ផែម៉ារីយូប៉ូល(Mariupol) និងរូបភាពនៅក្រុងប៊ូឆា(Bucha) ជាដើម ដែលទាំងអស់នេះសុទ្ធសឹងជាកន្លែងដែលអ៊ុយក្រែនចោទប្រកាន់ថា ទាហានរុស្ស៊ីបានសម្លាប់ជនស៊ីវិលរាប់រយនាក់។ នេះបើតាមការចុះផ្សាយដោយសារព័ត៌មានអន្តរជាតិធំៗជាច្រើន។
ក្រោយការថ្លែងពីភាគីអ៊ុយក្រែន ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ លោក វ៉ាស៊ីលី ប៊េននេហ្សៀ(Vassily Nebenzia) បានប្រាប់ក្រុមប្រឹក្សាសន្តិសុខថា កងទ័ពរុស្ស៊ីមិនបានកំណត់គោលដៅវាយប្រហារលើជនស៊ីវិលនោះទេ។ លោកបានច្រានចោលការចោទប្រកាន់នេះ ហើយចោទត្រឡប់ទៅភាគីអ៊ុយក្រែនវិញថា កំពុងតែភូតភរកុហកអន្តរជាតិ។ ដូចការបដិសេធពីវិមានក្រឹមឡាំងកាលពីពេលកន្លងមកដែរ តំណាងរបស់រុស្ស៊ីនៅក្រុមប្រឹក្សាសន្តិសុខរូបនេះ និយាយថា ពេលដែលក្រុងប៊ូឆា(Bucha) ស្ថិតនៅក្រោមការគ្រប់គ្រងរបស់រុស្ស៊ីមិនមានជនស៊ីវិលណាម្នាក់បានទទួលរងអំពើហិង្សាណាមួយឡើយ។
យ៉ាងណាក្តី នេះជាការសាចទឹកដាក់គ្នាទៅវិញទៅមក រវាងភាគីទាំងពីរជុំវិញបញ្ហាសម្លាប់ជនស៊ីវិលនៅអ៊ុយក្រែននេះ។ គេអាចវិនិច្ឆ័យ ស-ខ្មៅបាន លុះត្រាតែមានការប្រមូលភស្តុតាង និង ការស៊ើបអង្កេតដោយអ្នកជំនាញតែប៉ុណ្ណោះ។
ប៉ុន្តែអ្វីដែលគួរឲ្យចាប់អារម្មណ៍នោះគឺនៅត្រង់ថា ប្រធានាធិបតីអ៊ុយក្រែនបានចោទសួរចំៗតែម្តង ទៅកាន់ក្រុមប្រឹក្សាសន្តិសុខអង្គការសហប្រជាជាតិ ដែលអស់ពេលជាងមួយខែមកហើយចាប់តាំងពីការឈ្លានពានរបស់រុស្ស៊ីមកលើអ៊ុយក្រែន ស្ថាប័នមួយនេះមិនមានសកម្មភាពអ្វីសោះទៅលើរុស្ស៊ី។
អត្ថបទគួរអាន
គួរជម្រាបថា ប្រទេសរុស្ស៊ី ក្នុងនាមជាសមាជិកអចិន្ត្រៃយ៍មួយក្នុងចំណោមសមាជិកអចិន្ត្រៃយ៍ទាំង៥ នៃក្រុមប្រឹក្សា មានសិទ្ធិវេតូ ដើម្បីរារាំងដំណោះស្រាយ និងទណ្ឌកម្មនានា ដែលដាក់មកលើខ្លួន។ ជាក់ស្តែងកន្លងមក ក្រុងម៉ូស្គូបានប្រើសិទ្ធិនេះម្តងហើយម្តងទៀត ដើម្បីការពារខ្លួនឯងពីសម្ពាធនានា។
នៅចំពោះមុខក្តីលំបាកនេះ លោកហ្សេលេនស្គីបានជំរុញឲ្យស្ថានប័នអន្តរជាតិមួយនេះ ធ្វើការកែទម្រង់ស្ថាប័នរបស់ខ្លួន ព្រោះលោកអះអាងថា រុស្ស៊ីកំពុងប្រើប្រាស់សិទ្ធិវេតូ មកធ្វើអ្វីតាមតែអំពើចិត្ត និងប្រឆាំងជាមួយអង្គការសហប្រជាជាតិវិញហើយ។
ក្រឡេកមើលចិនវិញម្តងលោកអ្នកនាង, ចិនដែលបានបោះឆ្នោតអនុប្បវាទក្នុងសេចក្តីសម្រេចមហាសន្និបាតអង្គការសហប្រជាជាតិថ្កោលទោសរុស្ស៊ី ហាក់បង្ហាញការស្ទាក់ស្ទើរអំឡុងកិច្ចប្រជុំក្រុមប្រឹក្សាសន្តិសុខ កាលពីថ្ងៃអង្គារ។ លោក ចាង ជុន (Zhang Jun) តំណាងទីក្រុងប៉េកាំងនៅUN មិនបាននិយាយអ្វីច្រើនឡើយពេលឃើញខ្សែវីដេអូ ជនស៊ីវិលត្រូវបានគេសម្លាប់ដែលបង្ហាញដោយភាគីអ៊ុយក្រែន។ លោក ចាង ជុន គ្រាន់តែបានទទូចឲ្យ ស៊ើបអង្កេតបន្ថែមដើម្បីបញ្ជាក់ពីការពិតលើការសម្លាប់ជនស៊ីវិលទាំងអស់នេះ។
យ៉ាងណាមិញ គេឃើញមានភាពភ្ញាក់ផ្អើរបន្តិចដែរ ភ្ញាក់ផ្អើលក៏ដោយសារតែភាគីឥណ្ឌា ដែលកន្លងមកតែងព្យាយាមឈរជំហរកណ្តាលក្នុងសំណុំរឿងនៅអ៊ុយក្រែន មិនគាំទ្ររុស្ស៊ី ហើយក៏មិនបានប្រឆាំងរុស្ស៊ី បានចេញមុខមកថ្កោលទោសការសម្លាប់អាយុជីវិតជនស៊ីវិលនៅប៊ូឆា។ តំណាងក្រុងញូដេលី បានអំពាវនាវឲ្យមានការស៊ើបអង្កេតឯករាជ្យលើបញ្ហានេះ។
ទណ្ឌកម្មថ្មីៗបន្តធ្លាក់មក លើម៉ូស្គូដូចភ្លៀងរលឹម
រដ្ឋមន្ត្រីការបរទេសអង់គ្លេស លោកស្រី លីស ទ្រឺស និយាយថា ៦០%នៃល្បែងបង្ហូរឈាមរបស់លោកពូទីន ត្រូវបានគាំងជាប់ហើយ ដោយសារតែទណ្ឌកម្ម។ ប្រមុខការទូតចក្រភពអង់គ្លេសរូបនេះ បានអះអាងថា ទណ្ឌកម្មច្រើនទៀតគួរតែត្រូវបានធ្វើឡើង ដើម្បីសង្កត់រុស្ស៊ីឲ្យបានតែម្តង។
រដ្ឋមន្ត្រីការបរទេសរូបនេះ បាននិយាយថា ការដាក់ទណ្ឌកម្មតាំងពីដើមរហូតមកទល់នឹងពេលនេះ កំពុងជំរុញសេដ្ឋកិច្ចរុស្ស៊ីឱ្យធ្លាក់ចុះដុនដាប ត្រឡប់ទៅរកសម័យសហភាពសូវៀតវិញហើយ។ លោកស្រីបានបន្ថែមថា ប្រាក់បម្រុងរូបិយបណ្ណបរទេសមានតម្លែជាង ៣៥០ពាន់លានដុល្លារ របស់រុស្ស៊ីគឺបានបង្កករួចហើយ។
ប្រមុខការទូតចក្រភពអង់គ្លេសរូបនេះ បានអំពាវនាវវិធានការបន្ថែម រួមមានការហាមឃាត់កប៉ាល់ដឹកទំនិញរុស្ស៊ីមិនឲ្យចេញពីកំពង់ផែ ការបង្ក្រាបលើធនាគាររុស្ស៊ី បិទខ្ទប់ការជួញដូរមាស និងចុងក្រោយ ការព្រមព្រៀងគ្នាលើការឈប់នាំចូលប្រេង និង ឧស្ម័នរបស់រុស្ស៊ី។
សូមជម្រាបថា សហភាពអឺរ៉ុបកាលពីថ្ងៃអង្គារ បានស្នើឡើងពីការហាមឃាត់លើការនាំចូលធ្យូងថ្មពីប្រទេសរុស្ស៊ី ក្នុងកិច្ចខិតខំប្រឹងប្រែងដាក់ទណ្ឌកម្មជាលើកដំបូង ក្នុងក្របខណ្ឌសហភាពអឺរ៉ុប ដែលផ្តោតទៅលើឧស្សាហកម្មថាមពល និងជាវិស័យមួយជួយឲ្យប្រទេសរុស្សីរកចំណូលបានច្រើន។
គួរបញ្ជាក់ថា ប្រសិនបើទណ្ឌកម្មលើការនាំចេញធ្យូងថ្មនេះត្រូវសហភាពអឺរ៉ុបដាក់លើរុស្ស៊ីពិតមែន នោះរុស្ស៊ីនឹងខាតបង់ប្រាក់៤ពាន់លានដុល្លារក្នុងមួយឆ្នាំ។ យ៉ាងណាមិញ សហភាពអឺរ៉ុបមិនបាននិយាយពីទណ្ឌកម្ម លើប្រេង និងឧស្ម័ន ដែលអឺរ៉ុបនៅតែត្រូវការចាំបាច់នោះទេ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
