ទន្ទឹមនឹងការផលិតជីកសិកម្មក្នុងស្រុក និងនាំចេញ វៀតណាមក៏មានការនាំចូលជីកសិកម្មពីខាងក្រៅប្រទេសផងដែរ។ ក្នុងនោះ ការនាំចូលជីកសិកម្មរបស់វៀតណាមភាគច្រើនពីប្រទេសចិន រុស្ស៊ី និងបេឡារុស្ស៊ី។
ប៉ុន្ដែ ថ្មីៗនេះអាជីវករវៀតណាមបានចេញប្រតិកម្ម បន្ទាប់ពីក្រសួងពាណិជ្ជកម្មរបស់ប្រទេសរុស្ស៊ីបានផ្តល់អនុសាសន៍ឱ្យផ្អាកការនាំចេញជីកាលពីខែមុន ដោយសារតែឧបសគ្គនៃការដឹកជញ្ជូននៃក្រុមហ៊ុនដឹកជញ្ចួនក្រៅប្រទេស ខណៈដែលប្រទេសរុស្ស៊ីត្រូវបានគេដឹងថា មានកាន់កាប់ចំណែកទីផ្សារចន្លោះពី ១៥% ទៅ ១៨% នៃទីផ្សារជីកសិកម្មពិភពលោកប្រភេទ ប៉ូតាស្យូម អាម៉ូញាក់ និងអ៊ុយរ៉េ។
គួរកត់សម្គាល់ថា តម្លៃជីអ៊ុយរ៉េបានហក់ឡើងដោយសារការភ័យខ្លាចនៃឧបសគ្គផ្គត់ផ្គង់ ខណៈដែលរុស្ស៊ីបានគម្រាមបញ្ឈប់ការចែកចាយឧស្ម័នតាមរយៈបំពងបង្ហូប្រេង Nord Stream ទី ១ ទៅកាន់សហភាពអឺរ៉ុប ខណៈដែលប្រទេសចិនមិនទាន់បានស្តារផលិតកម្មឡើងវិញ ដោយសារតែកង្វះខាតធ្យូងថ្ម។ ម្យ៉ាងវិញទៀត កង្វះខាតធ្យូងថ្មរបស់ចិនអាចនឹងកាន់តែអាក្រក់ទៅៗក្នុងពេលដ៏ខ្លីខាងមុខ ខណៈដែលអ្នកនាំចេញធ្យូងថ្មធំទី ២ របស់ខ្លួនគឺរុស្ស៊ី ត្រូវបានដកចេញពីប្រព័ន្ធទូទាត់ប្រាក់អន្តជាតិ SWIFT ដែលបង្កឱ្យមានការរំខានក្នុងប្រតិបត្តិការ។
អត្ថបទគួរអាន
គួរជម្រាបថា តម្លៃជីអ៊ុយរ៉េនៅក្នុងប្រទេសវៀតណាម កាលពីខែមុនបានកើនឡើងរហូតដល់៨% ដោយតម្លៃកើនដល់កម្រិតខ្ពស់បំផុតរហូតដល់ទៅ ៤៧០ដុល្លារ ក្នុងមួយតោន នៅក្នុងខែមីនា ប៉ុន្តែក្រុមហ៊ុន SSI Securities បានព្យាករថា តម្លៃនឹងចាប់ផ្តើមធ្លាក់ចុះចាប់ពីខែមិថុនា បន្ទាប់ពីប្រទេសចិនបន្ធូរបន្ថយការកំណត់ការនាំចេញជី។
តាមទិន្នន័យស្រាវជ្រាវទីផ្សាររបស់ស្ថាប័នស្រាវជ្រាវទីផ្សារ ReseerchAndMarket.com បានបង្ហាញថា វៀតណាមនៅប៉ុន្មានឆ្នាំចុងក្រោយនេះ មានការនាំចូលជីកសិកម្មប្រហែល១លានតោនជារៀងរាល់ឆ្នាំ ហើយក៏មានការនាំចេញជីកសិកម្មប្រហែល១លានតោនដូចគ្នាដែរ។ ទីផ្សារនាំចេញជីសំខាន់ៗរបស់វៀតណាមរួមមាន ហ្វីលីពីន ម៉ាឡេស៊ី ថៃ ឡាវ និងកូរ៉េខាងត្បូង។ ខណៈដែលទីផ្សារដែលវៀតណាមនាំចូលជីមកវិញមានដូចជា ចិន រុស្ស៊ី និងបេឡារុសជាដើម៕
អត្ថបទ៖ វ៉ាន់ ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
