អគ្គលេខាធិការអង្គការសហប្រជាជាតិលោក Antonio Guterres បាននិយាយថា ផលប៉ះពាល់នៃសង្រ្គាមរុស្ស៊ី-អ៊ុយក្រែន លើសន្តិសុខស្បៀង ថាមពល និង ហិរញ្ញវត្ថុ កំពុងបង្កឱ្យមានបញ្ហាយ៉ាងធ្ងន់ធ្ងរសម្រាប់ពិភពលោកទាំងមូល ខណៈការអះអាងរបស់លោក គឺដោយផ្អែកលើរបាយការណ៍លើកទីពីររបស់អង្គការសហប្រជាជាតិស្ដីអំពី ផលប៉ះពាល់នៃជម្លោះនៅអ៊ុយក្រែន។
លោកបានបន្ថែមថា សង្រ្គាមកំពុងគំរាមកំហែង និង បង្កភាពវឹកវរដល់សេដ្ឋកិច្ចសកលជាខ្លាំង ហើយកំពុងបង្កើតនូវរលកនៃភាពអត់ឃ្លាន សម្រាប់មនុស្សជាច្រើននៅជុំវិញពិភពលោក ខណៈវិបត្តិខ្វះខាតស្បៀងអាហារនៅឆ្នាំនេះនឹងអូសបន្លាយដល់ឆ្នាំក្រោយផងដែរ ។
លោក Guterres បានគូសបញ្ជាក់នៅក្នុងសុន្ទរកថាមួយថា មានវិធីតែមួយគត់ដើម្បីដោះស្រាយបញ្ហាទាំងនេះបាន គឺការឈ្លានពានរបស់រុស្ស៊ីលើអ៊ុយក្រែនត្រូវតែបញ្ចប់។
ថ្វីបើសង្គ្រាមឈ្លានពានរបស់រុស្ស៊ីទៅលើអ៊ុយក្រែននៅតែបន្ត ប៉ុន្ដែ អគ្គលេខាធិការអង្គការសហប្រជាជាតិរូបនេះបាននិយាយថា លោកបានស្នើឱ្យសហការីរបស់លោកជួយស្វែងរក កិច្ចព្រមព្រៀងដែលអនុញ្ញាតឱ្យមានការនាំចេញអាហារ ដែលផលិតដោយអ៊ុយក្រែនប្រកបដោយសុវត្ថិភាព តាមរយៈច្រកកំពង់ផែសមុទ្រខ្មៅ និងការចូលទៅកាន់ទីផ្សារពិភពលោកសម្រាប់ផលិតផលម្ហូបអាហារ និង ជីកសិកម្មរបស់រុស្ស៊ី។
អត្ថបទគួរអាន
ទន្ទឹមនឹងនោះ លោក Guterres បានសង្កត់ធ្ងន់ថា កិច្ចព្រមព្រៀងនេះ គឺចាំបាច់ណាស់សម្រាប់ជួយដល់មនុស្សរាប់រយលាននាក់នៅក្នុងប្រទេសកំពុងអភិវឌ្ឍន៍ ដែលរួមបញ្ចូលទាំងប្រទេសដែលនៅតំបន់សាហារ៉ានៅអាហ្វ្រិកផងដែរ។
តួយ៉ាង អ្នកការទូតលោក Rebeca Grynspan បាននិយាយថា ប្រទេសចំនួន ៩៤ ដែលត្រូវបានប៉ាន់ប្រមាណថា មានប្រជាជនប្រហែល ១ពាន់៦រយលាននាក់ ត្រូវបានរងផលប៉ះពាល់យ៉ាងធ្ងន់ធ្ងរដោយសារតែវិបត្តិនៃសង្គ្រាមនៅអ៊ុយក្រែន។ នេះបើតាមរបាយការណ៍របស់អង្គការសហប្រជាជាតិ។
លោក Grynspan បានបន្ថែមថា ក្នុងចំណោមមនុស្សពី ១ពាន់២រយលាន ទៅ ១ពាន់៦រយលាននាក់ ដែលងាយរងគ្រោះ និង ត្រូវបានប៉ះពាល់យ៉ាងធ្ងន់ធ្ងរ ដោយបញ្ហាធំៗចំនួនបីក្នុងពេលជាមួយគ្នា គឺបញ្ហាហិរញ្ញវត្ថុ ស្បៀងអាហារ និងថាមពល។
របាយការណ៍នេះបាននិយាយថា សង្រ្គាមរុស្ស៊ីឈ្លានពានអ៊ុយក្រែនអាចធ្វើឱ្យប្រជាជនខ្វះខាតស្បៀងអាហារដល់ទៅ ៤៧ លាននាក់ក្នុងឆ្នាំ ២០២២ ដែលនាំឱ្យវាកើនឡើងដល់ ៣២៣ លាននាក់នៅដំណាច់ឆ្នាំនេះផងដែរ។ ទន្ទឹមនឹងនោះ ឯកសារនេះបានប៉ាន់ប្រមាណថា ជនជាតិអាហ្វ្រិករហូតដល់ ៥៨ លាននាក់ទៀតអាចនឹងធ្លាក់ចូលទៅក្នុងភាពក្រីក្រនៅឆ្នាំនេះ។
គួរជម្រាបថា យោងតាមរបាយការណ៍បានឱ្យដឹងថា ភាពក្រីក្រខ្លាំងនៅមជ្ឈិមបូព៌ា និងអាហ្រ្វិកខាងជើងអាចកើនឡើងជិត៣លាននាក់បន្ថែមទៀតនៅឆ្នាំ ២០២២ ខណៈនៅអាស៊ីខាងត្បូងមានប្រជាជន ៥០០ លាននាក់កំពុងប្រឈមនឹងហានិភ័យនៃសង្គ្រាម។
របាយការណ៍អង្គការសហប្រជាជាតិគូសបញ្ជាក់ថា កិច្ចខិតខំប្រឹងប្រែងជាក់ស្ដែងរបស់រដ្ឋ និងស្ថាប័នពាក់ព័ន្ធ គួរតែត្រូវបានធ្វើឡើង ដើម្បីធានាថា ការផ្គត់ផ្គង់ស្បៀងអាហារ និងថាមពល ពិតជាបានទៅដល់ក្រុមមនុស្សដែលងាយរងគ្រោះភាគច្រើន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
