ក្រសួងដឹកជញ្ជូនរបស់សហរដ្ឋអាម៉េរិក (DOT) បាននិយាយក្នុងសេចក្តីថ្លែងការណ៍មួយកាលពីថ្ងៃចន្ទ ទី២៦ ខែកុម្ភៈថា ចាប់ពីថ្ងៃទី៣១ ខែមីនា ក្រុមហ៊ុនដឹកជញ្ជូនរបស់ចិន នឹងអាចហោះហើរ៥០លើកប្រចាំសប្តាហ៍ទៅនិងមកពីសហរដ្ឋអាម៉េរិក ពោលគឺកើនឡើងពីចំនួន៣៥ជើងក្នុងពេលបច្ចុប្បន្ននេះ។ ទោះបីជាមានការបង្កើនចំនួនជើងហោះហើរក៏ដោយ តែវានៅតែជាចំនួនដ៏តូចមួយនៃការធ្វើដំណើរសរុបជាង១៥០ជើងប្រចាំសប្តាហ៍ ដែលត្រូវបានអនុញ្ញាតដោយភាគីនីមួយៗនៅមុនពេលការទប់ស្កាត់ត្រូវបានអនុវត្តកាលពីដើមឆ្នាំ២០២០ ដោយសារតែជំងឺរាតត្បាតកូវីដ-១៩។
ក្រសួងដឹកជញ្ជូននេះបាននិយាយថា ការសម្រេចចិត្តបង្កើនជើងហោះហើរនេះបានធ្វើឡើងបន្ទាប់ពីបានវាយតម្លៃពីស្ថានភាពទីផ្សារ និងបានពិចារណាពីផលប្រយោជន៍ជាសាធារណៈ។ ក្រសួងនេះបានបន្ថែមថា នេះគឺជាជំហានដ៏សំខាន់មួយឆ្ពោះទៅមុខក្នុងការធ្វើឱ្យមានលក្ខណៈធម្មតាបន្ថែមទៀតនៃទីផ្សារសហរដ្ឋអាម៉េរិក-ចិន នៅក្នុងការរំពឹងទុកពីរដូវកាលធ្វើដំណើរនៅរដូវក្តៅឆ្នាំ២០២៤។ នេះគឺជាចំណាត់ការលើកទីប្រាំហើយដែលក្រុមនិយ័តករអាម៉េរិក បានបង្កើនចំនួនកូតាផ្តល់ទៅឱ្យក្រុមហ៊ុនដឹកជញ្ជូនរបស់ចិនបន្ទាប់ពីការបើកដំណើរការឡើងវិញរបស់ប្រទេសចិន ក្រោយពីការឆ្លងកូវីដដោយលើកទីមួយត្រូវបានធ្វើនៅក្នុងខែឧសភា ឆ្នាំ២០២៣។
ក្រុមអ្នកវិភាគនៅក្រុមហ៊ុន Citi បាននិយាយនៅក្នុងកំណត់ត្រាស្រាវជ្រាវមួយកាលពីថ្ងៃអង្គារទី២៧ ខែកុម្ភៈថា ការស្ទុះងើបឡើងវិញបន្តិចម្តងៗនូវចំនួនជើងហោះហើរអាម៉េរិក-ចិននេះ គឺជាកត្តាជំរុញដ៏វិជ្ជមានដល់ការធ្វើដំណើរចេញក្រៅដ៏ច្រើនបំផុតក្នុងរដូវក្តៅឆ្នាំនេះ និងដល់ការកែលម្អតម្លៃ ដោយសារវាបានបង្កើនការប្រើប្រាស់ដ៏ធំទូលាយ។ ក្រសួងដឹកជញ្ជូនអាម៉េរិក បាននិយាយថា ក្រសួងនេះក៏កំពុងពិភាក្សាជាមួយនឹងរដ្ឋបាលអាកាសចរណ៍ស៊ីវិលនៃប្រទេសចិន (CAAC) ជុំវិញ«ការបើកជាបណ្តើរៗ»នូវសេវាកម្មផ្លូវអាកាសទ្វេភាគីផងដែរ៕
អត្ថបទ៖ សុខ ជា
